1 Dupã tsi nã dispãrtsãm di elji, nãftim sh-nã dusim ndreptu tu Cos, alantã dzuã tu Rodos sh-di aclo tu Patara. 2 Deapoea aflãm unã cãravi tsi njidzea tu Fenichia, n-alinãm sh-nãftim. 3 Vidzum di diparti Chipro, lu alãsãm di nastãnga, nãftim cãtrã Siria sh-agiumsim tu Tiro, cã aclo cãravea prindi s-discãrca ncãrcãtura. 4 Aclo aflãm ucenitsilji sh-dãnãsim cu elji shapti dzãli. Prit Duh elji lj-dzãtsea al Pavlu s-nu s-dutsea tu Ierusalem. 5 Cãndu tricurã atseali shapti dzãli nã nchisim sh-nã dusim. Tuts nã sotsãsirã deadun cu muljerili sh-cu cilimenjlji pãnã tu ishita a cãsãbãlui. Mardzina di amari nã aplicãm pri dzinuclji sh-nã rugãm. 6 Apoea nã salutãm cu un-alantu, nã alinãm tu cãravi, iarã elji s-turnarã la cãsili a lor. 7 Cãndu bitisim nãftirea, di Tiro agiumsim tu Ptolemaida. Aclo nã salutãm cu fratslji sh-surãrili shi-shidzum unã dzuã cu elji. 8 Alantã dzuã nã nchisim sh-nã dusim tu Cesarea, intrãm tu casa al Filip evanghelistul, cai eara un di shaptilji✝ shi shidzum la nãsu. 9 Elu avea patru feati virghini tsi prufitipsea. 10 Cãndu noi aveam niscãnti dzãli tsi stãteam aclo, dipunã di Iudea un prufit cu numa Agab. 11 Elu vini la noi, lo curaua al Pavlu, ligã mãnjili sh-cicioarili a lui sh-dzãsi: "Aestã dzãtsi Duhlu Sãmtu: ‘Ashãtsi Iudeilji va leagã tu Ierusalem bãrbatlu, cai ari aestã curauã, sh-va lu da tu mãnjili a pãngãnjilor.’" 12 Cãndu avdzãm aesti zboari, noi sh-bãnãtorlji di aclo lji nã rugãm al Pavlu s-nu njidzea tu Ierusalem. 13 Atumtsea Pavlu lã apãndisi: "Cã tse plãndzets sh-nji durmits inima? Mini escu etimu nu mash cãndu escu ligat, ma shi s-mor tu Ierusalem trã numa a Domnului Isus." 14 Shi, metsi nu lji si umplu mintea, noi tãcum sh-dzãsim: "Si s-facã vrearea a Domnului!" 15 Dupã atseali dzãli, nã etimãsim sh-nã alinãm cãtrã Ierusalem. 16 Cu noi vinirã sh-niscãntsã ucenitsi di Cesarea sh-nã dusirã la un Mnason di Chipro, un ucenic vecljiu la cai va stãteam.

17 Cãndu noi agiumsim tu Ierusalem, fratslji sh-surãrili nã ashtiptarã cu harauã. 18 Alantã dzuã Pavlu vini cu noi la Iacovul. Aclo avea vinit tuts aushlji a bisearicãljei. 19 Dupã tsi s-ambrãtsisirã, Pavlul lã spusi a lor un pi un, tuti atseali tsi featsi Domnul prit pãngãnjlji cu huzmitipsirea a lui. 20 Cãndu avdzãrã aestã, elji multumãrirã Domnul sh-lji dzãsirã al Pavlu: "Frate, tini ma vedz cã njilji di Iudei pistipsescu sh-ninga s-ducã dupã legea. 21 Elji au avdzãtã cã tini lji nvets Iudeilji, tsi bãneadzã ntrã natsiunili s-dipãrteadzã di legea al Moisiu, dzãcãnda s-nu facã anvãrliga-tãljeari a hiljilor a lor shi s-nu urmeadzã adetsili a noastri. 22 Tsi s-fãtsem? Elji fãrã di altã va s-avdã cã tini ai vinitã. 23 Fã aestã tsi ts-dzãtsem. Cu noi suntu patru bãrbats, tsi au faptã unã spigiurari. 24 Ljea aeshti, curã-ti cu nãshi sh-plãtea trã elji tra surseascã caplu. Ashãtsi tuts va shtibã cã nu suntu tsiva atseali tsi au avdzãtã trã tini, cã sh-tini imnji dupã legea. 25 Iarã a pistimenjilor pãngãnji, noi lã avem scriatã unã carti sh-avem apofãsitã tsi elji si s-apãrã di curbãnsirili a idoljilor, di sãndzili, di nimaljilji supsiti sh-di putãnsirea." 26 Atumtsea Pavlu lji lo cu nãsu bãrbatslji sh-alantã dzuã, dupã tsi s-curarã deadun, intrarã tu templu, dimãndãnda mplinirea a dzãlilor trã curari, pãnã cãndu s-featsi curbãnsirea trã cathiunu di elji.

27 Cãndu ma ascãpa shapti dzãlili, Iudeilji a Asiiljei vidzurã Pavlul tu templu, tãrãsirã tutã multsãmea sh-lu acãtsarã. 28 Elji aurla: "Bãrbats Israelits, nã agiutats! Aestu easti atsel om cai nveatsã tuts sh-iutsido contra a popului a nostru, contra a legiljei, sh-contra aishtui loc. Elu ari adus sh-Elinji tu templu sh-ashãtsi ari pãngãnitã aestu loc sãmtu." 29 (Elji avea vidzutã Pavlul ma nãinti tu cãsabã deadun cu Trofimul di Efes sh-minduea cã Pavlu lu avea adusã tu templu.) 30 Atumtsea tut cãsãbãlu s-tulburã sh-populu s-adunã di tuti cãljuri. Lu acãtsarã Pavlul, lu scoasirã nafoarã di templu azvara sh-portsãli si ncljisirã trãoarã. 31 Cãndu ma cãfta s-lu vãtãma, hãbarea s-dusi la tribunlu a cohortãljei Romanã, cã tut Ierusalemlu eara tulburat. 32 Elu lo niscãntsã suldats sh-niscãntsã tsenturionji shi s-dusi trãoarã cãtrã multsãmea. Elji, vidzãnda tsenturionlu sh-suldatslji, dãnãsirã s-batã Pavlul. 33 Atumtsea tribunlu s-apruche, acãtsã Pavlul sh-ordinã s-lu leagã cu doi singiri. Deapoea apãrnji s-lu ntreabã cã cai eara sh-tsi avea faptã. 34 Niscãntsã oaminji di multsãmea aurla sh-dzãtsea unã tsiva, iarã alantsãlji altã tsiva. Metsi nu putu s-loa di hãbari alihea trã itia a mintituriljei, ordinã s-aduc Pavlul tu castelu. 35 Cãndu Pavlu agiumsi la scãri, multsãmea eara sãluitã sh-suldatslji prindea s-lu purta. 36 Multsãmea tsi ma yinea dinãpoi, aurla: "Vãtãmats-lu!"

37 Cãndu ma lu dutsea tu castelu, lji dzãsi a tribunlui: "Pot s-tsã dzãc tsiva?" Iarã elu ntribã: "Shtii gãrtseshti? 38 Nu eshti tini Eghyptianlu tsi nãinti di niscãnti dzãli arãsculash shi scutesh tu irnjii patru njilji di vãtãmãtori?" 39 Pavlu apãndisi: "Mini escu un om Iudeu di Tarsu a Chilichiiljei, bãnãtor a unui cãsãbã avdzãt. Tsã fac rigeai dã-nji volje s-lji grescu a popului." 40 Tribunul lji deadi volje sh-Pavlul stãtu mprostu la scãri, lj-featsi semnu cu mãna a popului ti tãtseari. Cum s-featsi mari tãtseari, lji grãi a popului pi uvreascã.