1 Tu Iconiu Pavlu sh-Barnaba intrarã cum eara adetea tu sinagoga a Iudeilor. Aclo elji zburãrã ahãt ghini cãt unã multsãmi mari cu Iudei sh-pãngãnji pistipsirã. 2 Ma Iudeilji cai nu pistipsirã, elji tulburarã alantsã pãngãnji sh-fãrmãcarã mintili a lor contra a fratsilor a noshtri. 3 Ashãtsi Pavlu sh-Barnaba tricurã multu chiro aclo, spunãnda cu curaiu trã Domnul cai alihipsea zborlu a harului a lui sh-fãcãnda axii atselji trã seamni sh-thavmati. 4 Populu a cãsãbãlui eara mpãrtsãts, niscãntsã eara cu Iudeilji shi altsãlji cu apostulji. 5 Atumtsea s-featsi un plan namisa di pãngãnjlji sh-di Iudeilji, deadun cu mãrlji a lor, tra s-lji bãtea shi s-lji agudea cu chetri. 6 Apostulji loarã di hãbari sh-fudzirã tu cãsãbadzli a Licaoniljei, tu Listra, tu Derbe sh-tu loclu di anvãrliga. 7 Aclo dipriunã hãbãrsirã evanghelu.

8 Tu Listra shidea mpadi un om sãcat. Elu eara amintat ahtar sh-nu avea imnat pute. 9 Elu avdzã Pavlu cãndu ma zbura. Pavlu arcã ocljilji pristi nãsu sh-vidzu cã avea pisti trã vindicari 10 shi lj-dzãsi cu boatsi analtã: "Scoal-ti pri cicioari!" Trãoarã atsel om si sculã pri cicioari shi apãrnji s-imnã. 11 Cãndu multsãmea vidzu Pavlul tsi featsi, elji aurlarã tu limba a lor Licaonã: "Dumnidzadzlji s-featsirã oaminji sh-au dipunat la noi." 12 Elji acljimarã Barnaba Zeus sh-Pavlu Hermes, cã elu eara atsel tsi tsãnea zborlu. 13 Atumtsea preftul al Zeus, tsi templu a lui eara nafoarã dit cãsãbã, adusi dãmalji sh-curunji la portsãli a cãsãbãlui. Elu sh-multsãmea vrea s-fãtsea curbãnji a lor. 14 Ma cãndu apostulji Barnaba sh-Pavlu avdzãrã aestã, elji arupsirã stranjili a lor sh-si sãlãghirã cãtrã multsãmea, aurlãnda: 15 "Bãrbats, cãtse ma u fãtsets aestã? Noi him oaminji ca voi. Noi vã adutsem hãbarea atsea buna, dzãcãnda a voauã s-vã turnats di la lucrili atseali goali, la Dumnidzãlu atsel yiulu, cai adrã tserlu sh-loclu, amarea sh-tuti cai suntu tu nãshi. 16 Tu chirolu tricut, elu alãsã natsiunili tra s-njidzea pri cãljurili a lor. 17 Cu tut atsea, elu nu nã alãsa noi fãrã mãrtirii: Elu vã ari spusã bunãtati dãnda a voauã ploai dit tser sh-biricheti tu chirolu a lor. Elu nã da multã hranã sh-vã umplu ininjli a voastri cu harauã." 18 Cu tutã cã, li dzãsirã aesti zboari, elji avea mari zori s-tsãnea multsãmea trã fãtseari curbani a lor. 19 Atumtsea niscãntsã Iudei cai vinirã dit Antiochia sh-Iconiu lji umplurã mintea ali multsãmi sh-agudirã cu chetsri pri Pavlu sh-lu trapsirã nafoarã di cãsãbã, minduinda cã avea murit. 20 Cãndu ucenitsilji s-adunarã anvãrliga di nãsu, elu si sculã shi intrã tu cãsãbã. Tu alantã dzuã elu sh-Barnaba fudzirã tu Derbe.

21 Elji predicarã evanghelu tu atsel cãsãbã shi amintarã un numir mari di ucenitsi. Atumtsea s-turnarã tu Listra, Iconiu sh-Antiochia. 22 Elji nvãrtushirã suflitli a ucenitsilor sh-lã deadirã curaiu tra s-armãnã alihioshi tu pisti. "Noi prindi s-tritsem namisa di multi munduiri tra s-intrãm tu amirãriljea a Dumnidzãlui," dzãtsea elji. 23 Tu cathi bisearicã Pavlu sh-Barnaba aleapsirã aushlji cu rugãciunji sh-pãreasinji, lji-u deadirã a Domnului, la cai avea pistipsitã. 24 Elji tricurã prit Pisidia sh-agiumsirã tu Pamfilia. 25 Cãndu avea predicat zborlu tu Perga, elji dipusirã tu Attalia. 26 Dupã Attalia elji fudzirã prit amari tu Antiochia, di iu era nchisitã cu harul al Dumnidzãu ti lucrul tsi tora elji avea bitisit. 27 Cãndu agiumsirã aclo, adunarã bisearica sh-aspusirã itsido tsi Dumnidzãlu avea faptã prit nãshi sh-cum avea discljis ushili a pistiljei la pãngãnjlji. 28 Pavlu sh-Barnaba stãturã aclo cu ucenitsilji di multu chiro.