1 Dupã tsi ascãpã tulburarea, Pavlu acljimã ucenitsilji ningã nãsu, lji inimusi, lji salutã shi s-nchisi cãtrã Machidunii. 2 Cãndu li tricu atseali locuri lã dãdea curaiu cu multi zboari atsilor oaminji sh-deapoea vini tu Gãrtsii. 3 Aclo armasi di trei meshi. Cãndu ma s-fãtsea etimu s-njidzea tu Siri, Iudeilji avea curdusit un plan contra lui, trã atsea elu apofãsi si s-turna prit Machidunii. 4 Pavlu eara sotsãsit di Sopatru, hiljilu al Piro di Veria, Aristarcu sh-Secundul di Sãruna, Gailu di Derbe, Timoteu, Titicu sh-Trofimu di Asia. 5 Aeshti eara nchisitã ma nãinti di noi sh-nã ashtipta tu Troas. 6 Iarã noi nã nchisim prit amari di Filipii dupã sãrbãtoarea a Adzãmilor sh-di tsintsi dzãli agiumsim ãn Troas, iu armasim shapti dzãli.

7 Ma tu prota dzuã a stãmãnãljei, cãndu noi ucenitsilji earam adunatsi ti frãndzearea a pãniljei, Pavlu, cai prindea s-nchisea alantã dzuã, zbura cu nãshi sh-cuvenda s-lundzi pãnã tu njeadzãnoapti. 8 Tu udãlu di nsus iu eara adunats avea multã lunjinã. 9 Un tinir cu numa Eutic, tsi shidea pri pirvazu a fireastrãljei, lu acãtsã un somnu greu, anda Pavlu lundzea zborlu. Cum lu acãtsã somnu, cãdzu mpadi di la a treia patumã nghios sh-lu scularã mortu. 10 Atumtsea Pavlu, cum dipunã, s-aplicã pristi nãsu, luãnda mbratsã tinirlu sh-dzãsi: "Nu vã tulburats, cã suflitlu a lui easti tu elu." 11 Atumtsea s-alinã nãpoi, frãmsi pãni sh-mãcã. Elu lã zburã pãnã tu apiritã sh-deapoea s-nchisi. 12 Elji lu dusirã ficiorlu yiu shi s-diznjirdarã multu. 13 Iarã noi tsi earam alinat tu cãravi ma nãinti, nãftisim cãtrã Assos, iu vream s-loam Pavlu. Elu avea apofãsitã ashãtsi s-dutsea aclo pri cicioari. 14 Cãndu nã agiumsi ãn Assos, lom Pavlul cu noi sh-nã dusim tu Mitilini. 15 Alantã dzuã nãftisim di-aclo sh-agiumsim agnanghea di Hios. Unã dzuã ma nãpoi agiumsim Samos. Alantã dzuã agiumsim ãn Milet. 16 Tra s-nu s-amãnã tu Asia, Pavlul avea apofãsit s-nãftãsea prit ningã Efes, cã s-aĝunjisea s-agiundzea ãn Ierusalem dzua a Arusaljilor. 17 Elu dit Milet pitricu tu Efes tsi s-acljima aushlji a bisearicãljei. 18 Sh-cãndu elji vinirã la elu, Pavlu lã dzãsi: "Voi shtits di tu prota dzuã, tsi intrai tu Asii, cã cum am fut cu voi totãna, 19 huzmitipsinda a Domnului cu multã aplicãciuni sh-cu multi lãcrinji sh-cu cãrtirili tsi nji-vinirã dit drãcsirili a Iudeilor. 20 Voi shtits cã mini nu vã am ascumtu tsiva di atseali tsi eara di hãiri, ma vã am predicatã a voauã sh-vã nvitsai nãintea a lumiljei sh-prit cãsi, 21 mãrtirsinda a Iudeilor sh-a Gretsilor mitãnjiusirea la Dumnidzãlu sh-pistipsirea la Domnul a nostru Isus. 22 Tora, Duhlu mi cãlãuzaeshti s-mi duc tu Ierusalem nishtinda cã tsi va nji-undzeascã aclo. 23 Mini shtiu mash cã Duhlu Sãmtu mãrtirseashti trã mini tu cathi cãsãbã, dzãcãnda cã mi ashteaptã prãnghi sh-munduiri. 24 Ma mini nu voi s-shtiu di tsiva sh-nitsi bana a mea nu u tinjisescu ahãntu multu, pãnã-cãndu si mplinescu cu harauã calea a mea sh-huzmitipsirea, tsi u loai di la Domnul Isus s-mãrtirsescu didip Evanghelu a harului a Dumnidzãlui. 25 Tora shtiu cã tuts voi prit cai tricui predicãnda amirãriljea a Dumnidzãlui, nu va-u videts ma fatsa a mea. 26 Trã atsea azã ma vã dau mãrtirii cã mini escu chischin di sãndzili a tutulor. 27 Mini nu mi afirii tra s-nu vã dimãndu tutã nãetea a Dumnidzãlui. 28 S-avets cãshtiga, trã voi sh-trã tuts cupia, pristi cai Duhlu Sãmtu vã ari bãgat voi episcochi tra s-vigljeats bisearica a Dumnidzãlui, tsi elu u-amintã cu sãndzili a lui. 29 Cã mini shtiu cã dupã fudzearea a mea, va s-intrã tu mesea a voastrã luchi arãchitori, tsi nu va s-aibã njilã di cupia. 30 Namisa di voi va sã scoalã bãrbats tsi va s-vã nveatsã nvitsãturi strãmbi, tsi s-tragã dupã nãshi ucenitsi. 31 Trã atsea stats dishtiptat shi adutsets aminti cã trei anji ni-curmat nu pãpsii pute noapti sh-dzuã s-vã prispuneam a cathiunui cu lãcri. 32 Tora, mini ma vã-alasã la Dumnidzãlu sh-la zborlu a harului a lui, cai poati s-vã facã shi s-vã da mushtinirea namisa di tuts sãmtsãlji. 33 Mini nu vrui nits asimi, nits furii, nits stranjili a vãrui. 34 Sh-voi shtits cã aesti mãnji au lucratã trã ananghili a meali sh-trã atselji, cai eara deadun cu mini. 35 Tu itsido vã am aspusã cã, lucrãnda ahãntu multu, prindi s-agiutats lãndzitslji shi s-adutsem aminti zboarili a Domnului Isus, cai dzãsi: ‘Ma mari easti haraua s-dai dicãt s-ljeai!’" 36 Shi, dupã tsi avea dzãsã aesti s-aplicã pri dzinuclji deadun cu elji shi s-rugã. 37 Atumtsea tuts plãmsirã cu mari, lu ambrãtsisirã Pavlul sh-lu bãsharã. 38 Elji simtsãrã multã dureari di zborlu tsi avea dzãsã, cã nu va l-videa ma fatsa a lui. Deapoea lu-dusirã la cãravi.