1 Saulu tsi cãnusea totãna ninga sh-cu moarti ucenitsilji a Domnului, s-dusi la arhipreftul 2 shi lji cãftã tsi aestu s-lji scria cãrtsã ti sinagodzãli di Damasc, cu idea tsi ma s-afla vãrã tsi eara di Cala a Domnului, bãrbat icã muljeari, s-lji adutsea ligat tu Ierusalem. 3 Cãndu ma cãlãtorea sh-ma s-apruchea di Damasc, ni-ashtiptat strãlutsi anvãrliga di nãsu unã lunjinã dit tser. 4 Elu cãdzu mpadi sh-avdzã unã boatsi tsi lj-dzãsi: "Saul, Saul cãtse mi priaĝuneshti?" 5 Saulu ntribã: "Cai eshti tini, Doamne?" Elu lj-apãndisi: "Mini escu Isusul, tsi tini lu priaĝuneshti! 6 Scoalã-ti sh-intrã tu cãsãbã, sh-aclo va s-tsã dzãcã cã tsi prindi s-fatsi." 7 Bãrbatslji cai cãlãtorea cu nãsu armasirã fãrã zboari, cã u avdzãrã boatsea, ma nu vidzurã vãrã. 8 Saulu si sculã di mpadi, sh-cu tutã cã ocljilji lji avea discljisi, nu videa. Atumtsea luãnda di mãnã lu dusirã tu Damasc. 9 Elu di trei dzãli nu videa, nu mãcã sh-nu biu. 10 Aclo tu Damasc eara un ucenic cu numa Anania. Domnul lj-dzãsi a lui tu viziuni: "Anania!" Elu lj-apãndisi: "Ia iu escu, Doamne." 11 Domnul lj-dzãsi: "Scoalã-ti sh-duti la calea tsi s-acljeamã ‘Ndreapta’ sh-caftã la casa al Iuda un om di Tarsu cu numa Saul, cã elu ma s-roagã. 12 Elu ari vidzut tu viziuni un om cu numa Anania cai intrã n-casã sh-bãgã mãnjili pri nãsu tra s-videa dinou." 13 Atumtsea Anania apãndisi: "Doamne, am avdzãtã di la multsã oaminji cã cãti arali lã au faptã a sãmtsãlor a tãlji aestu om tu Ierusalem. 14 Iarã aoa ari vinit cu autoritati di la arhipreftsãlji tra s-bagã prãnghi a tutulor tsi greascã numa a ta." 15 Ma Domnul lj-dzãsi: "Duti, cã elu easti hãlatea a mea tsi mini u-am aleaptã tra s-fac cunuscut numa a mea nãintea a pãngãnjilor, amiradzlor sh-a hiljilor al Israel. 16 Mini va lji aspun a-lui cã cãtã multu lipseashti s-mundueascã trã numa a mea." 17 Atumtsea Anania s-dusi sh-intrã tu atsea casã, bãgã mãnjili pri Saulu sh-lji dzãsi: "Frate Saul, Domnul Isus, tsi s-aspusi pri cali cãndu yineai aoa, mi pitricu tra s-vedzi nãpoi shi s-ti umplji di Duhlu Sãmtu." 18 Dinãoarã lj-cãdzu tsiva ca luspã di oclji, sh-a lui lji vini nãpoi videarea. Deapoea si sculã shi s-pãtidzã. 19 Dupã tsi mãcã, lji si turnã fuchia. Saulu armasi niscãnti dzãli cu ucenitsilji tu Damasc.

20 Deapoea apãrnji s-preadicã tu sinagodzi shi s-dzãtsea cã Isusul easti Hiljilu a Dumnidzãlui. 21 Tuts atselji tsi lu avdza, s-ciudisea sh-dzãtsea: "Nu easti aestu atsel tsi tu Ierusalem dãrãmã atselji tsi alãvda Isusul? Elu vini aoa cu scupolu tra s-lji ducã ligats nãintea a arhipreftlui." 22 Saulu s-nvãrtushea totãna sh-ma multu shi lji tulbura Iudeilji cai bãna tu Damasc, alihipsãnda cã Isusul eara Hristolu. 23 Cum tricurã niscãnti dzãli, Iudeilji apofãsirã deadun s-lu vãtãma. 24 Ma Saulu nvitsã planul a lor. Noaptea sh-dzua elji vigljea portsãli a cãsãbãlui tra s-putea s-lu vãtãma 25 Atumtsea ucenitsilji lu loarã noaptea sh-lu dipunarã di prit cãrpãtura a unui mur cu un cosh.* 26 Cãndu agiumsi la Ierusalem, Saulu cãftã s-apruchea di ucenitsilji, ma tuts avea fricã di nãsu, cã nu pistipsea cã elu eara ucenic. 27 Cu tutã atsea, Barnaba lu lo, lu adusi la apostulji sh-lã spusi cã cum Saulu tu cali avea vidzut Domnul cai lj-avea zburãtã sh-cum tu Damasc avea zburãtã discljisã tu numa al Isus. 28 Atumtsea Saulu stãtea cu apostulji, intrãnda sh-ishinda di Ierusalem sh-predicãnda cu curaiu tu numa a Domnului. 29 Elu zbura sh-discuta cu Iudeilji Elinofonji, iarã elji cãfta s-lu vãtãma. 30 Cãndu fratslji nvitsarã aestã, lu dipunarã Saulul tu Cesarea sh-di aclo lu pitricurã tu Tarsu.

31 Ashãtsi tu tutã Iudea, tu Galilea, sh-tu Samaria bisearica avea pace shi s-nãintea. Bãnãnda cu frica a Domnului, s-crishtea cu diznjirdarea a Duhlui Sãmtu.

32 Cãndu Petrul ma tritsea prit tuti locurili, s-dusi sh-la sãmtsãlji cai bãna tu Lida. 33 Aclo aflã un om cu numa Enea, cai di optu anji eara dzãcut tu pat, cã eara paralizat. 34 Atumtsea Petrul lj-dzãsi: "Enea, Isus Hristolu ti vindicã. Scoalã-ti sh-ndreadz patlu!" Elu si sculã trãoarã. 35 Tuts bãnãtorlji di Lida sh-di Sharon l-vidzurã shi s-turnarã la Domnul.

36 La Ioppa eara unã ucenicã cu numa Tabita (cai tradus va s-dzãcã Gazela). Ea totãna adra fapti buni sh-dãdea dicunji. 37 Tu atseali dzãli ea s-lãndzãi sh-muri. Dupã tsi u aspilarã cu apã u bãgarã tu udãlu di nsus. 38 Lida eara aproapi di Ioppa sh-ucenitsilji cãndu avdzãrã cã Petrul eara aclo pitricurã la nãsu doi bãrbats sh-lji si rugarã: "Haidi la noi fãrã amãnari!" 39 Atumtsea Petrul si sculã sh-fudzi cu nãshi. Cãndu agiumsi, lu dusirã la udãlu di nsus. Tuti veduvili s-apruchearã plãngãnda shi spunãnda a lui tunicãli shi stranjili cai li avea faptã Gazela, cãndu eara cu eali. 40 Petrul lji scoasi tuts nafoarã, cãdzu pri dzinuclji shi s-rugã. Deapoea s-turnã cãtrã moarta shi lj-dzãsi: "Tabita, scoalã-ti!" Ea discljisi ocljilji sh-vidzãnda Petrul, si sculã mproastã. 41 Petrul lji-deadi mãna sh-u sculã. Deapoea acljimã sãmtsãlji sh-veduvili, sh-u bãgã nãintea a lor nyeat. 42 Tu tutã Ioppa u nvitsarã aestã sh-multsã pistipsirã la Domnul. 43 Tu aestã oarã Petrul stãtu niscãnti dzãli tu Ioppa la casa a unui Simon, lucrutor di cheali.