1 Cãndu Apollo eara tu Corintu, Pavlu dupã tsi s-dusi tu locurili di ma nsus, agiumsi tu Efes. Aclo aflã niscãntsã ucenitsi 2 sh-lji ntribã: "Lu avets loatã Duhlu Sãmtu, cãndu avets pistipsitã?" Elji lji dzãsirã: "Noi nu avem avdzãtã dip cã ari Duh Sãmtu." 3 Ashãtsi Pavlu lã dzãsi a lor: "Cu tsi vã pãtidzat atumtsea?" Elji lji dzãsirã: "Cu pitedzlu al Ioan." 4 Atumtsea Pavlul lã dzãsi: "Ioanul pãtidzã cu pitedzlu a mitãnjusiriljei, dzãcãnda a popului s-pistipsea tu atsel tsi va yinea dupã nãsu, tsi easti Isusul." 5 Sh-elji, cum avdzãrã, s-pãtidzarã tu numa al Domnu Isus. 6 Cãndu Pavlu bãgã mãna pristi elji, Duhlu Sãmtu dipunã pristi nãshi sh-elji zbura tu alti limbi sh-prufitipsirã. 7 Atselji eara vãrã doisprãdzatsi di bãrbats. 8 Pavlu intrã tu sinagogã, lã zbura discljis a oaminjlor di trei meshi arada, discutãnda sh-cãndãrsinda atselji ti amirãriljea a Dumnidzãlui. 9 Ma, metsi niscãntsã eara cap-groshi sh-nu pistipsea, zbura arãu trã Calea nãintea a multsãmiljei, Pavlu s-dipãrtã di nãshi, lji mpãrtsã ucenitsilji sh-cathi dzuã lji nvitsa tu sculia a unui cu numa Tiran. 10 Aestã s-lundzi di doi anji, ashã cã tuts bãnãtorlji di Asia, Iudei sh-Elinji lu avdzãrã zborlu a Domnului. 11 Dumnidzãlu fãtsea thavmati ciudioasi prit mãnjili al Pavlu, 12 tsi cãndu adutsea a nipututslor mãndilili sh-stranjili, tsi avea pusputitã truplu al Pavlu, sh-niputerili s-dipãrta di la nãshi sh-duhurili atseali arali ishea di la elji. 13 Niscãntsã Iudei nomadz exortsishti imnãnda tu multi locuri vrurã s-acljima numa a Domnului Isus pristi atselji tsi avea duhuri arali, dzãcãnda: "Vã ursim pri Isusul, trã cai preadicã Pavlu!" 14 Atselji tsi fãtsea aestã eara shapti hiljilji al un arhipreftu Iude cu numa Schevi. 15 Ma duhlu atsel arãulu apãndisi: "Mini l-cunoscu Isusul sh-Pavlu, ma voi cai hits?" 16 Atumtsea atsel om, tsi avea duhlu atsel arãu, s-arcã pristi nãshi sh-cum lji bãtu, lã featsi un ahtari bãteari sh-elji fudzirã di atsea casã dispuljeats sh-pliguits. 17 Cãndu loarã di hãbari tuts Iudeilji sh-Elinji, tsi bãna tu Efes, tuts lji acãtsã frica sh-numa a Domnului Isus s-multu-mãri. 18 Sh-multsã di elji, cai avea pistipsitã, yinea mãrtirsinda sh-spunãnda faptili a lor. 19 Multsã di atselji, tsi s-loa cu mãyii, adusirã cãrtsili a lor sh-li arsirã nãintea a tutulor. Cãndu lugursirã costul a lor, aflarã cã eara tsindzãtsi di njilji di asimi. 20 Ashãtsi zborlu a Domnului s-arãspãndea shi si nvãrtushea ma multu.

21 Dupã aesti tsi undzirã, Pavlu apofãsi s-ducã tu Ierusalem, tricãndã prit Machidunii sh-prit Ahaia, sh-dzãtsea: "Dupã tsi s-hiu aclo, prindi s-ved sh-Roma." 22 Atumtsea pitricu tu Machidunii doi di atselji tsi lj-agiuta, Timoteu sh-Erastu, sh-elu armasi di putsãn chiro tu Asia. 23 Sh-tu atsel chiro s-featsi un tulburari mari trã itia a Caliljei. 24 Un om cu numa Dimitru, asimgi, cai fãtsea tu asimi templi njitsi ali Artemisi, lã adutsea a masturilor multã amintatic. 25 Elu lji adunã zãnãtceadzlji deadun cu lucrutorlji tsi avea idyia tehni, sh-lã dzãsi: "Bãrbats, voi u shtits cã buneatsa a noastrã yini di aestã tehni. 26 Voi videts sh-avdzãts cã aestu Pavlu lã ari cãndãrsitã sh-ari alãxitã mintea a mults oaminji nu mash tu Efes, ma aproapi tu tutã Asia, dzãcãnda cã nu suntu dumnidzadz atselji cai suntu faptsã cu mãnjili a oaminjlor. 27 Trã atsea easti piricljiu nu mash trã noi tsi aestã tehni si s-arucã hima, ma sh-templul a mariljei dumnidzoanji Artemisa si nu s-tinjiseascã nits-niheamã shi s-lji fugã mãriljea atsiljei tsi u tinjiseashti tut Asia sh-tut lumea." 28 Elji, cãndu li avdzãrã aesti, s-umplurã cu inati sh-aurlarã, dzãcãnda: "Mari easti Artemisa a Efesianjlor!" 29 Tu tutã cãsãbãlu s-featsi unã mintiturã, loarã cu zori Gaiul sh-Aristarcul, Machidunienjlji sotslji al Pavlu, shi-tuts pi un minti s-dusirã cãtrã teatru. 30 Pavlu vrea s-ishea nãintea a popului, ma ucenitsilji nu lu alãsarã. 31 Niscãntsã di autoritãtsili a loclui, tsi eara oaspits a lui, pitricurã oaminji la nãsu sh-lji featsirã rigeai s-nu dutsea la teatru. 32 Atumtsea s-featsi unã mintiturã la adunatslji. Niscãntsã aurla sh-dzãtsea unã tsiva, alantsã altã tsiva, ma multsãlji nu shtia cã trã tsi s-adunarã. 33 Atumtsea dit multsãmea scoasirã nãinti Alexandrul, sh-Iudeilji lji dãdea curaiu s-grea. Alexandrul, cum featsi cu mãna, vrea s-dzãtsea un zbor trã apãrari nãintea a popului. 34 Ma, cãndu lu achicãsirã cã eara Iude, tuts cu unã boatsi, apãrnjirã s-aurla aproapi di doauã ori di chiro: "Mari easti Artemisa a Efesianjlor!" 35 Secretarlu a cãsãbãlui, dupã tsi acumtinã multsãmea, dzãsi: "Bãrbats Efesienji, cai easti vahi atsel om tsi nu lu shti cã cãsãbãlu a Efesianjlor easti apãrãtorlu a templui a mariljei dumnidzoanji Artemisa sh-icoana a ljei tsi cãdzu dit tser? 36 Metsi aesti suntu ni-cundriti, voi prindi s-vã acumtinats shi s-nu fãtsets tsiva aĝunjisit. 37 Voi adusit aeshti oaminji tsi nu suntu nitsi furii di templi, nitsi blãstimãtori a dumnidzoanjiljei a voastrã. 38 Macã Dimitrul sh-masturlji tsi suntu cu nãsu, au tsiva contra a vãrui, giudicata easti discljis sh-proconsulji suntu, aclo s-giudicã unu cu altu. 39 Ma macã avets tsiva altã, si s-ndreagã tu cuvendã dupã legea. 40 Noi him tu piricljiu s-him acuzats trã rebilipsirea di azã, cã nu ari vãrã itii cum si sitãxeascã adunarea aestã." 41 Sh-cum li dzãsi aesti, u arãspãndzã adunarea.