1 Cãndu vini dzua a Arusaljilor, elji eara tuts deadun singur tu idyiul loc. 2 Ni-ashtiptat dit tser s-avdzã unã vãziri, ca atsea a vimtului tsi suflã vãrtos shi s-umplu tutã casa iu stãtea elji. 3 Atumtsea elji vidzurã niscãnti limbi ca di foc, tsi s-mpãrtsa shi acãtsa loc pristi cathiun di elji. 4 Ashãtsi tuts s-umplurã cu Duhlu Sãmtu sh-apãrnjirã si zburãscã pi alti limbi, ashã cum Duhlu Sãmtu lã-u dãdea si zburãscã. 5 Ma tu Ierusalem bãna niscãntsã Iudei, tsi avea fricã di Dumnidzãlu di tuti natsiunili cai suntu sum tser. 6 Cãndu s-avdzã aestã vãziri, multsãmea s-adunã shi s-ciudisi, cã cathiun di elji lji avdza grãinda tu limba a lor. 7 Tuts s-ciudisea, s-thãvmãtisea sh-ntriba un-alantu: "Ia, nu suntu tuts Galileanji aeshti cai grescu? 8 Cum vahi cathiun di noi lji avdi si zburãscã pri limba a noastrã maternã? 9 Noi Partsã, Medzi, Elamitsi, bãnãtorlji di Mesopotamia, di Iudea, di Capadochia, di Pontu sh-di Asia, 10 di Frighia sh-di Pamfilia, di Eghyptu sh-di pãrtsãli a Libiãljei ningã Tsirenea, sh-vinitslji di Roma, 11 Iudei sh-prozelits, Cretanji sh-Araghi, lji avdzãm si zburãscu trã mãri lucri a Dumnidzãlui tu limbili a noastri!" 12 Tuts s-ciudisea sh-eara cihtisits sh-dzãtsea cu un-alantu: "Tsi va s-dzãcã aestã?" 13 Iarã altsã arãdzãnda dzãtsea: "Suntu mplinji di yin dultsi."

14 Ma Petrul si sculã pri cicioari deadun cu Unsprãdzatsilji sh-lã grãi a lor cu boatsi analtã: "Iudei sh-voi tuts cai bãnats tu Ierusalem, loats-u aestã hãbari sh-avdzãts cu cãshtiga zboarili a meali. 15 Aeshti nu suntu mbitats, ashã cum minduits voi, cã oara easti noauã a dimineatsãljei. 16 Ma aestã easti atsea tsi eara dzãsã prit prufitlu Ioel:

17 ‘Tu dzãlili di soni, dzãtsi Dumnidzãlu, va s-undzeascã ashãtsi.

Mini va sã scurpisescu di Duhlu a meu

pristi tuts oaminjlji.

Hiljilji a voshtri sh-hiljili a voastri va s-prufitipseascã,

tinirlji a voshtri va veadã viziunea

sh-aushlji a voshtri va nyiseadzã.

18 Tu atseali dzãli va sã scurpisescu di Duhlu a meu

pristi huzmichearlji a melji sh-pristi huzmichearili a meali

sh-va s-prufitipseascã.

19 Va s-fac thavmati nsus pri tser

sh-seamni nghios pri loc,

sãndzi, foc sh-aburi di fum.

20 Soarili va si s-toarnã tu scutidi sh-luna tu sãndzi,

nãinti tra s-yinã dzua atsea marea sh-mãritã a Domnului.

21 Atumtsea caitsido tsi va s-acljeamã numa a Domnului, va s-ascapã.’

22 Bãrbats Israelits, ascultats aesti zboari: Isus Nazareanlu, eara omlu alihipsit di la Dumnidzãlu ntru voi cu fapti mãri, cu thavmati shi seamni tsi Dumnidzãlu featsi namisa di voi prit nãsu, cum lu shtits sh-voi. 23 Aestu om dupã planul atsel arãdãpsitul sh-dupã pricunushtearea a Dumnidzãlui, s-prideadi la voi sh-voi lu acãtsat sh-prit mãnjili atsilor nindreptsã, lu crutsisit sh-lu vãtãmat. 24 Ma Dumnidzãlu lu ari nyeat, dupã tsi lu dizligã di durearili a moartiljei, cã nu eara putut tsi moartea s-lu tsãnea. 25 Davidul dzãtsi trã nãsu:

‘Domnul lu avui dipriunã nãintea a mea,

cã elu easti tu nandreapta a mea,

tsi mini s-nu mi min.

26 Trã atsea s-hãrsi inima a mea shi s-hãrãcupsi limba a mea,

sh-truplu a meu va s-discurmã tu nãdii.

27 Cã tini nu va lu alashi suflitlu a meu tu Colasi

sh-nu va alashi tsi Sãmtul a tãu s-veadã putridzarea.

28 Tini nj-ai aspusã cãljurili a banãljei,

tini va mi umpli di harauã nãintea a fatsãljei a ta.’

29 Frats sh-surãri, pot s-vã dzãc discljis trã patriarhul David cã elu muri shi s-ngrupã, sh-murmintul a lui easti aoa la noi pãnã tu dzua di azã. 30 Metsi, elu eara prufit, shtia cã Dumnidzãlu lji si eara spigiurat cã vãrã di simintsa a truplui va s-bagã pri thronlu a lui. 31 Prividãnda aestã, elu grãi di nyearea a Hristolui, dzãcãnda cã elu nu va si s-alasã tu Colasi sh-truplu a lui nu va s-veadã aspãrdzeari. 32 Aestu Isus, Dumnidzãlu lu ari nyeat sh-trã aestã tuts noi him martirii. 33 Elu easti anãltsat tu nandreapta a Dumnidzãlui sh-ari loat di la Tatãl tãxirea a Duhlui Sãmtu sh-ari virsatã atsea cai voi tora videts sh-avdzãts. 34 Cã Davidul nu s-alinã tu tser, ma elu idyiul dzãtsi:

‘Domnul lji ari dzãsã a Domnului a meu:

"Shedz tu nandreapta a mea,

35 pãnã cãndu mini va ts-li bagã neamitsilji a tãlji

ca scamnu la cicioarili a tali."’

36 S-u shtibã ghini tutã casa al Israel cã atsel Isus tsi voi lu avets crutsisit, Dumnidzãlu lu ari faptã Domnu sh-Hristos."

37 Cãndu li avdzãrã aesti, si nvirinarã tu inimã shi ntribarã Petrul sh-apostulji: "Frats, tsi prindi s-fãtsem?" 38 Atumtsea Petrul lã dzãsi a lor: "Mitãnjusits-vã sh-cathiun di voi si s-pãteadzã tu numa al Isus Hristos trã ljirtarea a amãrtiilor. Ashãtsi, voi va loats doara a Duhlui Sãmtu. 39 Cã tãxirea easti trã voi, trã cilimenjlji a voshtri, trã tuts atselji cai suntu diparti sh-trã atselji tsi Domnul, Dumnidzãlu a nostru va lji acljeamã." 40 Petrul mãrtirsi sh-cu ma multi zboari alti sh-lã dimãndã dzãcãnda: "Ascãpats-vã di aestã gheneratã arauã." 41 Atselji tsi lu apruchearã zborlu a lui, s-pãtidzarã. Atsea dzuã s-adãvgarã anvãrliga di trei njilji di oaminji.

42 Elji eara ipiminisits tu nvitsãtura a apostuljilor sh-tu unitati, tu frãndzearea a pãniljei sh-tu rugãciuni. 43 Tuts lã acãtsã frica, cã multi seamni sh-thavmati s-fãtsea di mãna a apostuljilor. 44 Tuts atselji tsi pistipsea eara deadun sh-itsido lu avea deadun. 45 Elji vindea ciuflichili sh-averili sh-lã-u mpãrtsa a tutulor dupã ananghea a cathiunui. 46 Cathi dzuã stãtea deadun tu templu, frãndzea pãnea prit cãsi, loa hranã cu harauã sh-cu inima discljisã. 47 Elji alãvda Dumnidzãlu avãnda bunãtati nãintea a tut popului. Domnul lji-adãvga a bisearicãljei cathi dzuã atselji tsi eara ascãpats.