1 "Bãrbats, frats sh-prots, avdzãts tora apãrarea a mea nãintea a voastrã." 2 Cãndu avdzãrã cã ma lã zbura pi limba uvreascã, tãcurã sh-ma multu sh-elu dzãsi: 3 "Mini escu un om Iudeu, amintat tu Tarsul a Chilichiiljei sh-criscut tu aestu cãsãbã la cicioarili al Gamaliel. Mini escu nvitsat dupã Legea a pãrintsãlor a noshtri, mplin di vreari di Dumnidzãlu, ashã cum hits voi tuts azã. 4 Mini am avinatã urmashlji aishtei Cali pãnã tu moarti, ligãnda sh-bãgãnda tu hapsi bãrbats sh-muljeri. 5 Ashãtsi da mãrtirii ti mini arhipreftul sh-tut aushaticlu, di la cai loai sh-cãrtsi ti fratslji sh-mi dush tu Damascu ti adutseari ligats tu Ierusalem atselji cai eara aclo trã giudicari. 6 Shi s-featsi tsi, cãndu earam pri cali sh-ma mi aprucheam di Damascu cãtrã njeadzã-dzuã, niashtiptat unã lunjinã mari dit tser strãlutsi anvãrliga di mini. 7 Mini cãdzui mpadi sh-avdzãi unã boatsi tsi ma nj-dzãtsea: ‘Saul, Saul, cãtse mi priaĝuneshti?’ 8 Mini apãndisii: ‘Cai eshti tini, Doamne?’ Elu nj-dzãsi: ‘Mini escu Isus Nazareanlu, tsi tini lu priaĝuneshti.’ 9 Atselji tsi eara cu mini u vidzurã lunjina, ma nu avdzãrã boatsea atsilui, tsi nj-grãi. 10 Mini ntribai: ‘Doamne, tsi s-fac?’ Domnul nj-dzãsi: ‘Scoalã-ti sh-duti tu Damasc! Sh-aclo va li dzãcã tuti atseali tsi tini prindi s-fatsi.’ 11 Cãndu mini nu videam trã itia a strãlutsiriljei atsiljei lunjini, intrai tu Damasc mãnã di mãnã cu atselji, cai eara cu mini. 12 Anania, un om dumnidzãsit dupã Legea, ti cai dãdea mãrtirii bunã tuts Iudeilji, tsi bãna aclo, 13 vini la mini shi, stãnda ningã mini, dzãsi: ‘Saul, frate, mutrea nãpoi!’ Sh-tu oara atsea mini discljish ocljilji sh-vidzui atsel. 14 Atumtsea elu dzãsi: ‘Dumnidzãlu a pãrintsãlor a noshtri ti aleapsi s-cunoshti vrearea a lui, s-lu vedz Ndreptul shi s-avdzã grailu di gura a lui. 15 Tini va s-hii martir nãintea a tuts oaminjlor trã atseali tsi ai vidzut sh-ai avdzãt. 16 Sh-tora, tsi ma ashteptsã? Scoalã-ti, pãteadzã-ti sh-curã-ti di amãrtiili a tali, acljimãnda numa a lui.’

17 Cãndu mi turnai tu Ierusalem sh-earam rugãnda tu templu, tricui tu viziuni, 18 sh-vidzui Domnul tsi nj-dzãtsea: ‘Aĝunjisea-ti sh-dipãrteadz-ti trãoarã di Ierusalem, cã elji nu va-u ascultã mãrtiria a ta trã mini.’ 19 Atumtsea mini dzãsh: ‘Doamne, elji shtiu cã mini tu sinagogã earam atsel cai bãgam tu hapsi sh-bãteam atselji, cai pistipsea la tini. 20 Cãndu s-virsã sãndzili al Stefan, a martirlui a tãu, mini earam aclo u aprovam vãtãmarea a lui sh-vigljeam stranjili atsilor cai lu vãtãmarã.’ 21 Atumtsea Domnul nji dzãsi: ‘Imnã, cã mini va ti pitrec diparti la pãngãnjlji.’"

22 Elji lu ascultarã pãnã la aestu zbor, deapoea scularã boatsea dzãcãnda: "Mutats-lu di lumi un ahtar-om, cã nu prindi s-bãneadzã!" 23 Multsãmea aurla, arca stranjili nsus shi scula pulbirlu tu aerã. 24 Atumtsea tribunlu ursi s-lu adutsea Pavlul tu castel sh-lã dzãsi a lor s-lu ntreabã shi s-lu batã cu cãmciclu, tsi s-loa di hãbari cã ti tsi aurla populu contra a lui. 25 Ma cãndu lu ashtirnarã mpadi ligatã cu curãi, Pavlu lji dzãsi a tsenturionlui cai eara atsia: "Easti tu lege ti voi s-bãtets cu cãmcichi un cãsãbunjiu roman, nigiudicat?" 26 Cãndu u avdzã aestã, tsenturionlu s-dusi sh-lji spusi a tribunlui dzãcãnda: "Tsi va fatsã cu aestu? Cã aestu om easti cãsãbunjiu roman!" 27 Atumtsea tribunlu s-dusi la Pavlu sh-lu ntribã: "Dzã-nji, eshti cãsãbunjiu roman?" Elu dzãsi: "Ie." 28 Tribunlu lj-apãndisi: "Mini am amintat aestã cãsãbunjii cu multi pãradzi." Sh-Pavlul dzãsi: "Iarã mini mi-am amintat cãsãbunjiu roman!" 29 Trãoarã atselji tsi va lu ntriba, s-dipãrtarã di la nãsu. Tribunlu, cãndu lo di hãbari cã eara cãsãbunjiu roman, avu fricã tsi lu-tsinea ligatã.

30 Tribunlu vrea si siguripsea cãtse Pavlul eara acuzat di Iudeilji. Dzua atsea alanta, elu lu sãlãghi sh-ursi arhipreftsãlji sh-tut Sinedriul s-adunã. Deapoea elu adusi Pavlul sh-lu bãgã si sta nãinti a lor.