1 Niscãntsã oaminji vinirã di Iudea tu Antiochia shi lji nvitsa ucenitsilji ashãtsi: "Macã nu vã anvãrliga-tãljeats dupã legea tsi nã nvitsã Moisiul, voi nu putets s-ascãpats." 2 Atumtsea Pavlu sh-Barnaba avurã ngrãnji sh-debati cu nãshi. Ashã elji apofãsirã tsi Pavlu sh-Barnaba sh-deadun cu niscãntsã ucenitsi, s-alina tu Ierusalem s-aduna cu apostulji sh-aushlji trã aestã niachicãsiri. 3 Bisearica lji nchisi di cali sh-elji tricurã namisa di Fenichia sh-Samaria shi elji spusirã cum pãngãnjlji eara turnats. Atsea hãbari lji hãrsi multã fratslji. 4 Cãndu elji agiumsirã tu Ierusalem, s-ghini-ashtiptarã di bisearica, di apostulji sh-aushlji. Elji spusirã itsido tsi Dumnidzãlu avea faptã prit nãshi. 5 Atumtsea niscãntsã di ucenitsilji di partea a Fariseilor si scularã sh-dzãsirã: "Pãngãnjlji prindi s-hibã anvãrliga-tãljeats sh-lipseashti s-veaglji legea al Moisiu." 6 Apostulji sh-aushlji s-adunarã tra s-mutrea cu cãshtigã aestu lucru. 7 Dupã multã cuvendzi, Petrul si sculã sh-lã dzãsi a lor: "Frats, voi shtits cã putsãn chiro ma nãinti Dumnidzãlu mi aleapsi mini namisa di voi tsi pãngãnjlji s-avdza prit gura a mea zborlu al evanghelu shi s-pistipsea. 8 Dumnidzãlu, cai cunoashti ininjli, nji spusi cã elu lji apruche sh-lã deadi Duhlu Sãmtu atsilor, ashã cum featsi sh-cu noi. 9 Elu nu tsãni cu hãtãri namisa di noi sh-di elji, cã elu ari curatã ininjli a lor prit pisti. 10 Atumtsea, cãtse voi lu bãgats tu cãrteari Dumnidzãlu bãgãnda pri zverca a pãngãnjilor un giug tsi nu lu tsãnum nitsi noi sh-nitsi pãrintsãlji a noshtri? 11 Nu! Noi pistipsim cã prit harul a Domnului Isus noi him ascãpats, ashã cum suntu sh-elji." 12 Tutã multsãmea tãcu sh-asculta Barnaba sh-Pavlu spunãnda trã seamnili sh-thavmatili tsi Dumnidzãlu avea faptã la pãngãnjlji prit elji. 13 Cãndu elji bitisirã cuvenda, Iacovul dzãsi: "Frats, ascultats-mi. 14 Simonul nã spusi cã cum di prota oarã Dumnidzãlu aleapsi un popul trã numa a lui di pãngãnjlji. 15 Zboarili a prufitsilor suntu uidisiti dupã cum easti scriatã:

16 ‘Dupã aestã mini va mi tornu

shi va s-ndregã tenda cãdzutã al David.

Surpãturili iarã va li adar

sh-va u analtsã,

17 ashãtsi tuts oaminjlji s-caftã Domnul,

sh-tuts pãngãnjlji va s-acljeamã numa a mea,

dzãtsi Domnul cai li fatsi atseli lucri

18 cunuscuti di tu eta a etilor.’

19 Trã atsea, minduiescu s-nu lji tulburãm pãngãnjlji tsi suntu turnat la Dumnidzãlu. 20 Ma prindi sã scriem unã carti a lor dzãcãnda tra s-dipãrteadzã di hranea lãvushitã a idoljilor, di putãnsirea, di carnea a nimaljilor supsiti sh-di sãndzili. 21 Cã legea al Moisiu easti predicat tu cathi cãsãbã dit chirolu di ma nãinti sh-easti cãntat tu sinagodzãli cathi Sãmbãtã." 22 Atumtsea, apostulji sh-aushlji deadun cu tutã bisearica, apofãsirã s-aleagã niscãntsã di oaminjlji a lor shi s-lji pitreacã tu Antiochi cu Pavlu sh-Barnaba. Elji aleapsirã Iuda, acljimat Barsaba sh-Sila, bãrbats frãmtashi namisa di pistimenjlji. 23 Elji pitricurã aestã carti cu nãshi:

Apostulji sh-aushlji, fratslji a voshtri, a pãngãnjilor pistimenji tu Antiochia, tu Siria sh-tu Chilichia, sãnãtati!

24 Noi avem avdzãtã cã vinirã niscãntsã di noi fãrã autorizarea a noastrã sh-tulburarã mintili a voastri cu atseali tsi dzãsirã. 25 Noi avem apofãsit tuts pi unã minti sh-aleapsim niscãntsã bãrbats sh-lji pitricum la voi cu sotslji a noshtri vruts Barnaba sh-Pavlu, 26 cai au bãgat bana a lor tu piricljiu ti numa a Domnului a nostru Isus Hristos. 27 Trã atsea, noi ma pitritsem Iuda sh-Sila tra s-vã spunã a voauã cu gura a lor atseali tsi noi avem scriat. 28 Lji si pãru ghini a Duhlui Sãmtu sh-a noauã s-nu vã ngãrcãm cu tsiva ma multu dicãt atseali dimãndari lipsiti: 29 s-vã dipãrtats di hranea curbãnsitã a idoljilor, di sãndzili, di carnea a nimaljilor supsiti sh-di putãnsirea. Voi va fãtsets ghini s-vã afirits di aesti lucri.

S-hits ghini!

30 Ashãtsi, elji s-pitricurã shi-s-dusirã tu Antiochia, adunarã tuts ucenitsilji sh-lã deadirã cartea. 31 Cãndu elji cãntarã cartea, s-hãrsirã di inimusirea tsi loarã. 32 Atumtsea Iuda sh-Sila, cai eara prufitsi, tsãnurã un zbor lungu sh-deadirã inimã a fratsilor sh-lji nvãrtushirã. 33 Stãnda putsãn chiro atsia, s-nchisirã tu pace di fratslji la atselji cai lji avea pitricut. 34 [Iarã al Sila lji pãru ghini s-armãnea aclo.]* 35 Pavlu sh-Barnaba armasirã tu Antiochia, iu elji sh-multsã altsã nvitsa sh-dimãnda zborlu a Domnului.

36 Dupã niscãnti dzãli Pavlu lj-dzãsi al Barnaba: "S-nã turnãm shi s-adunãm fratslji tu tuti cãsãbadzli iu avem predicat zborlu a Dumnidzãlui shi s-lji videm cum suntu." 37 Barnaba vrea s-loa cu nãsu sh-Ioanul, tsi s-acljima Marcu. 38 Iarã Pavlu ipiminisi tra s-nu loa cu nãshi atsel cai eara dipãrtsat di nãshi tu Pamfilia, sh-nu eara dus cu nãshi tu lucrul al Domnu. 39 Elji si ngrãnjirã ntrã nãshi ahãntu multu cãt s-dipãrtsarã di un-alantu. Barnaba lo Marcul sh-nãftãsi cãtrã Chipro. 40 Pavlu aleapsi Sila shi s-nchisi dupã tsi fratslji lji-l-pistipsirã a harului al Domnu. 41 Elu s-dusi cãtrã Siria sh-Chilichia nvãrtushãnda biseritsli.