1 Dupã trei dzãli tsi avea vinit tu provintsã, Festu di Cesarea s-alinã tu Ierusalem. 2 Arhipreftsãlji shi mãrlji a Iudeilor lji pãrãstisirã acuzãli a lor contra al Pavlu sh-lji si rugarã. 3 Elji lj-cãftarã al Festu unã tinjii, tsi s-pitritsea Pavlul tu Ierusalem, cã elji avea etimãsit un lats tra s-lu vãtãma pri cali. 4 Festul apãndãsi: "Pavlu s-veaglji tu Cesarea sh-mini idyiul va mi duc curundu aclo. 5 Niscãntsã di mãrlji a voshtri s-yinã cu mini, sh-macã atsel om ari vãrã cãbati, elji si spunã acuzãli cãtrã nãsu." 6 Dupã tsi armasi namisa di nãshi nu ma multu di optu icã dzatsi dzãli, Festul s-dusi tu Cesarea. Alantã dzua shidzu tu thronlu a giudicãtorlui sh-ordinã s-adutsea Pavlul. 7 Cãndu Pavlu intrã nãuntru, lu anvãrligarã Iudeilji cai avea dipunat di Ierusalem. Elji featsirã acuzi greli contra nãsu, ma tsi nu putea s-li alihipsea. 8 Pavlu s-apãrã ashãtsi: "Mini nu am faptã amãrtii nitsi contra Legea a Iudeilor, nitsi contra templu icã nitsi contra a Cesarului." 9 Festul, metsi vru s-lã fãtsea tinjii a Iudeilor, ntribã Pavlul: "Vrei s-ti duts tu Ierusalem shi s-ti giudits nãintea a mea trã aesti acuzi?" 10 Pavlu lj-apãndisi: "Mini escu nãintea a giudicatãljei a Cesarului sh-aoatsi prindi s-mi giudicã. Mini nu am faptã vãrã nindriptati a Iudeilor, sh-tini shtii multu ghini. 11 Macã mini escu cãbatar sh-axizescu moartea, escu etimu s-mor. Ma macã acuzãli tsi aducã Iudeilji nu suntu dealihea, vãrã nu ari ndriptati s-mi prida mini tu mãnjili a lor. Mini caftu s-mi giudic di Cesarlu!" 12 Atumtsea Festul dupã tsi grãi cu consiliul a lui, apãndisi: "Cãftash s-ti giudits di Cesarlu, la Cesarlu va ti duts."

13 Dupã tsi tricurã niscãnti dzãli amirãlu Agripa sh-Bernica agiumsirã tu Cesarea tra s-fãtsea vizitã la Festu. 14 Metsi elji ma stãtea aclo niscãnti dzãli, Festu lji spusi al amirãlu trã Pavlu. Elu dzãsi: "Aoa easti un om tsi Felixu lu ari alãsat tu hapsi. 15 Cãndu earam tu Ierusalem, arhipreftsãlji sh-aushlji a Iudeilor acuzarã Pavlul shi cãftarã s-lu condamna. 16 Mini lã dzãsh cã nu easti adetea a Romanjilor s-condamnã vãrã, nãinti tsi acuzatlu s-aibã nãinti acuzãtorlji a lui tra s-poatã si s-apãrã di acuza tsi lji si fatsi. 17 Cãndu elji vinirã aoa, mini nu mi amãnai, ma tu alantã dzua shidzui tu thronlu a giudicãtorlui shi ded ordin s-nji adutsea atsel om. 18 Cãndu acuzatorlji si scularã trã greari, elji nu avurã vãrã acuzã contra al Pavlu trã atseali tsi mini ashtiptam. 19 Ma elji avea namisa di nãshi niscãnti lucri di pistea a lor tsi s-ncuntra cu un alantu, sh-trã un om acljimat Isus tsi avea murit, ma Pavlu dzãtsea cã easti yiu. 20 Metsi nu shtiam cum s-u cãftam aestã arasti, mini ntribai Pavlul macã elu vrea s-dutsea tu Ierusalem s-giudica trã aesti lucri. 21 Pavlu idyiul cãfta s-lu tsãnea apãrat pãnã cãndu s-apofãsea imperatorlu. Trã atsea ordinai s-lu veaglji pãnã cãndu s-lu pitretseam la Cesarlu." 22 Atumtsea Agripa lj-dzãsi al Festu: "Mini voi s-lu avdu aestu om." Elu apãndisi: "Mãni va lu avdzi."

23 Alantã dzua Agripa shi Berenica vinirã cu mari sãltãnati. Elji intrarã tu sala a ascultariljei deadun cu tribunjlji sh-bãrbatslji tinjisits a cãsãbãlui. Atumtsea Festul ordinã s-adutsea Pavlul. 24 Festul dzãsi: "Amirã Agripa, sh-voi tuts tsi hits aoa cu noi! Voi videts aestu om, trã cai tuts Iudeilji nj-au cãftat cum tu Ierusalem sh-aoatsi, aurlãnda tsi elu nu prindi s-bãneadzã ma. 25 Ma mini nu aflai vãrã cãbati tsi elu s-axizeascã moartea. Macã elu ari cãftat s-giudicã la Imperatorlu, mini apofãsii s-lu pitrec Roma. 26 Ma nu am tsiva s-lji scriu a domnului a meu trã nãsu. Trã atsea, lu adush aoa nãintea a voastrã, shi ma multu nãintea a ta, amirã Agripa, dupã tsi s-lu avem ntribat, s-shtiu tsi s-lji scriu. 27 Cã nji-si-pari fãrã minti s-lu pitrec hãpsãnitlu Roma fãrã vãrã acuzã contra a lui."