1 Tu atseali dzãli iarã numirlu a ucenitsilor ma crishtea, Iudeilji cai grea gãrtseshti murmurea contra a Iudeilor cai grea uvreieshti, cã veduvili a lor ma s-alãsa dupã mãnã cu huzmitipsirea di cathi dzuã. 2 Atumtsea di doisprãdzatslji acljimarã tutã comunitatea a ucenitsilor sh-dzãsirã: "Nu easti ghini trã noi s-alãsãm dinãparti zborlu al Dumnidzãu shi s-nã apucãm cu measili. 3 Trã atsea, frats, alidzets namisa di voi shapti bãrbats cu numã bunã, umplut di Duhlu Sãmtu sh-cu mintimenilji, tra s-lji bãgãm tu aestu lucru. 4 Noi va s-armãnem rugãnda sh-predicãnda zborlu." 5 Aestã minduiri lj-arsi a multsãmiljei. Aleapsirã Stefanlu, un bãrbat cu multã pisti sh-cu Duhlu Sãmtu, Filipul, Prohorul, Nikanorul, Timonul, Parmenul sh-Nicola, un prozelit di Antiochia. 6 Aeshti lji dusirã nãintea a apostuljilor cai s-rugarã sh-bãgarã mãnjili pri nãshi. 7 Ashãtsi zborlu a Dumnidzãlui si scurpisea. Numirlu a ucenitsilor tu Ierusalem crishtea trãoarã. Tutashã sh-multsã preftsã pistipsirã la Isusul sh-lji si-cãndãrsirã a lui.

8 Stefanlu, om mplin di har sh-puteari, fãtsea thavmati sh-seamni mãri tu popul. 9 Atumtsea niscãntsã di sinagoga tsi s-acljima a Liberatslor, a Tsireneilor, a Alexandrinjlor, sh-atsilor di Chilichia sh-Asia si scularã si ncãcea cu Stefanul. 10 Cu tutã atsea elji nu putea s-ncuntra a mintimeniljei sh-a Duhlui cu cai elu grea. 11 Atumtsea pri ascumtu bãgarã niscãntsã oaminji s-dzãtsea: "Noi avem avdzãt Stefanul s-greascã zboari di blãstenji contra al Moisiu sh-contra al Dumnidzãu." 12 Ashãtsi cãrtirã populu, aushlji sh-scriblji. Deapoea s-apruchearã, lu acãtsarã sh-lu dusirã nãintea a Sinedriului. 13 Aclo adusirã martiri arãdioshi cai dzãtsea: "Omlu aestu nu pãpseashti s-greascã zboari contra aishtui loc sãmtu sh-contra a Legiljei. 14 Noi lu avem avdzãt dzãcãnda cã aestu Isus Nazareanlu va lu aspargã aestu loc sh-va s-alãxeascã adetsili tsi nã ari alãsatã Moisiul." 15 Tuts atselji cai shidea tu Sinedriul arcarã ocljilji pi Stefanlu sh-vidzurã cã fatsa a lui eara ca fatsa a unui anghil.