1 Atumtsea arhipreftul ntribã Stefanlu: "Suntu alihioasi aesti lucri?" 2 Elu apãndisi: "Bãrbats, frats sh-pãrintsã, ascultats! Dumnidzãlu a mãririljei lji si fãnirusi a tatãlui a nostru Abraham cãndu elu eara ninga tu Mesopotamia, nãinti tsi s-bãna tu Haran. 3 Dumnidzãlu lj-dzãsi a lui: ‘Eshi di loclu a tãu shi di soia a ta sh-duti tu loclu tsi mini va tsã aspun.’✝ 4 Atumtsea elu ishi dit loclu a Caldeilor sh-bãnã tu Haran. Dupã tsi lj-muri tatã-su, Dumnidzãlu l-mutã di aclo sh-lu adusi tu aestu loc iu bãnats tora voi. 5 Aclo nu lj-deadi mushtiniri nitsi unã palmã di loc, ma lj-deadi zborlu cã va lji-u da tu domnilji a lui sh-a mushtinitorilor a lui dupã nãsu, cu tutã cã Abrahamul ninga nu avea cilimean.✝ 6 Dumnidzãlu lj-dzãsi: ‘Dupãyinitorlji a tãlji va s-bãneadzã ca xenji patru sutã di anji tu un loc xen, sh-aclo va s-hibã tu sclãyii sh-va s-tirãnseascã.✝ 7 Ma mini va u-giudicã fara a cui elji va lj-huzmitipseascã ca sclayi,’ dzãsi Dumnidzãlu. ‘Sh-dupã aesti elji va easã sh-va nji huzmitipseascã a njia tu aestu loc.’✝ 8 Deapoea lji deadi al Abraham pisti-ligãtura a anvãrliga-tãljeariljei. Ashãtsi al Abraham lji si amintã Isac sh-lu anvãrliga-tãlje a opta dzuã. Al Isac lji si amintã Iacovul, sh-al Iacovul doisprãdzatsi patriarhi. 9 Patriarhilji avãnda inati Iosiful lu vindurã tu Eghyptu, ma Dumnidzãlu eara cu nãsu. 10 Elu lu ascãpã di tuti munduirili a lui, sh-lji deadi har sh-mintimenilji nãintea al Faraon, amirãlu al Eghyptu, tsi lu acljimã guvernator al Eghyptu sh-pristi tutã casa a lui. 11 Deapoea vini unã foami di pãni tu tut Eghyptu sh-Canaan shi s-featsi unã mari strimturã sh-pãrintsãlji a noshtri nu afla ti mãcari. 12 Cãndu Iacovul avdzã cã tu Eghyptu avea grãn, pitricu aclo prota oarã pãrintsãlji a noshtri. 13 A doaua oarã Iosiful s-featsi cunuscut la fratslji a lui sh-ashã Faraonul s-cunuscu cu Fumealja al Iosif. 14 Atumtsea Iosiful pitricu s-acljima tatãl a lui Iacov sh-tutã soia a lui. Tuts deadun s-fãtsea shaptidzãtsi sh-tsintsi di sufliti. 15 Ashãtsi Iacovul s-dusi nghios tu Eghyptu sh-aclo muri, elu sh-pãrintsãlji a noshtri. 16 Deapoea trupurili a lor s-dusirã nãpoi tu Sichem shi s-bãgarã tu murmintul tsi Abrahamul avea acumpãrat cu tinjii di asimi di hiljilji al Hamor tu Sichem. 17 Cãndu ma s-apruchea chirolu di tãxirea tsi Dumnidzãlu lj-avea faptã al Abraham, populu crishtea shi s-multsa tu Eghyptu. 18 Atumtsea tu Eghyptu s-featsi amirã un om cai nu l-cunushtea Iosiful.✝ 19 Atsel lucra cu ilei contra a popului a nostru sh-lji strindzea pãrintsãlji a noshtri s-alãsa cilimenjlji a lor s-moarã. 20 Tu aestu chiro s-amintã Moisiul cai eara mushat tu ocljilji a Dumnidzãlui. Elu s-hrãni di trei meshi la casa a tatã-sui. 21 Cãndu lu apãrãtsirã lu lo hiljea al Faraon sh-lu criscu ca hiljilu a ljei. 22 Ashãtsi Moisiul s-nvitsã cu tut mintimeniljea a Eghypteanjlor sh-eara vãrtos tu zboari sh-tu fapti. 23 Anda umplu patrudzãtsi di anji, lj-amintã tu inimã vrearea s-njidzea s-videa fratslji a lui, hiljilji al Israel.✝ 24 Cãndu vidzu cã a unui ma lji si fãtsea unã nindriptati, elu lu apãrã sh-lo arãzgãnari vãtãmãnda Eghyptianlu. 25 Moisiul minduea cã fratslji a lui va lu aduchea cã Dumnidzãlu ma dãdea ascãpari prit mãna a lui, ma elji nu lu aduchirã. 26 Alantã dzuã Moisiul vidzu doi oaminji tsi ma s-bãtea, sh-elu cãftã s-lji puituea: ‘Bãrbats, voi hits frats! Cãtse fãtsets nindriptati la un-alantu?’✝ 27 Atsel tsi ma lj-fãtsea nindriptati a aproapilui a lui, l-pimsi Moisiul dzãcãnda: ‘Cai ti bãgã tini ma mari sh-giudicãtor pristi noi?✝ 28 Nacã vrei s-mi vatsãnji sh-mini cum vãtãmashi aieri Eghyptianlu?’ 29 Cãndu avdzã aestu zbor, Moisiul fudzi tu loclu al Madiam shi s-featsi xen aclo, iu lji si-amintarã doi ficiori.✝ 30 Dupã patrudzãtsi di anji, a Moisiului lji si fãnirusi tu shcretuirea a Muntilui Sinai un anghil a Domnului tu fleaca a foclui a unui rug.✝ 31 Cãndu u-vidzu aestã pãreari Moisiul s-ciudisi. S-apruche tra videa ma ghini, sh-avdzã boatsea a Domnului tsi lj-dzãsi:✝ 32 ‘Mini escu Dumnidzãlu a pãrintsãlor a tãlji, Dumnidzãlu al Abraham, al Isac sh-al Iacov.’ Moisiul trimurãnda ntreg nu avea curaiu s-lu mutrea. 33 Atumtsea Domnul lj-dzãsi a lui: ‘Dizleagã sandalili di cicioari, cã loclu iu ma stai easti sãmtu. 34 Mini u am vidzut ghini jalea a popului a meu tu Eghyptu sh-am avdzãt suschirãrili a lor, sh-mi am dipunat s-lji ascap. Tora, haidi cã va ti pitrec tu Eghyptu.’ 35 Aestu eara idyiul Moisiu tsi elji lu avea alipidat, dzãcãnda: ‘Cai ti bãgã tini ma marli sh-giudicãtor?’ Atsel lu pitricu Dumnidzãlu ca domnu sh-arãscumpãrãtor cu mãna a anghilui tsi lji si-aspusi la rug. 36 Elu lji scoasi nafoarã dit loclu al Eghyptu, fãcãnda thavmati sh-seamni tu Eghyptu, tu Amarea-Atsea Roshea sh-tu irnjii di patrudzãtsi di anji.✝ 37 Aestu easti Moisiul tsi lã dzãsi a hiljilor al Israel: ‘Dumnidzãlu va amintã trã voi namisa di fratslji a voshtri un prufit ca mini.’✝ 38 Aestu easti atsel cai tu adunarea a popului tu irnjii eara cu anghilu tsi lj-grea pri Muntili Sinai sh-cu pãrintsãlji a noshtri. Elu lo zboari yii tra s-nã li da a noauã.✝ 39 Ma pãrintsãlji a noshtri nu vrurã s-ascultã aestu. Elji lu arnisirã sh-cu ininjli a lor s-turnarã cãtrã Eghyptu.✝ 40 Elji lji dzãsirã al Aaron: ‘Fã-nã ndoi dumnidzadz tra s-nã cãlãuzeascã, cã nu shtim tsi lj-ari undzit al Moisiu, cai nã scoasi dit loclu al Eghyptu.’✝ 41 Tu atseali dzãli featsirã un yitsel, lj-adusirã curbani a idolui shi s-hãrsirã cu faptili a mãnjilor a lor.✝ 42 Atumtsea Dumnidzãlu s-dipãrtã di elji sh-lji alãsã s-adoreascã stealili a tserlui, ashã cum easti scriatã tu cartea a prufitsilor:

‘Casa al Israel, nj-avets adusã a njia tãljeari

sh-curbãnji aesti patrudzãtsi di anji tu irnjii?✝

43 Voi avets purtat tenda al Moloc

shi steaua a dumnidzãlui a vostru Refan,

figuri tsi li adrat ti ncljinari.

Tr-atsea va vã pitrec surghiuni di napãrti a Babilonlui.’

44 Pãrintsãlji a voshtri tu irnjii avea Tenda a mãririljei, ashã cum avea ursit atsel tsi lj-avea dzãsã al Moisiu, s-u fãtsea dupã figura tsi avea vidzut.✝ 45 Pãrintsãlji a noshtri, dupã tsi u loarã tenda, u purtarã deadun cu Ioshua tu loclu tsi avea acãtsatã pãngãnjlji, tsi Dumnidzãlu li avinã nãintea a pãrintsãlor a noshtri. Aclo armasi pãnã tu dzãlili al David.✝ 46 Elu aflã har nãintea a Dumnidzãlui sh-cãftã s-afla unã casã trã Dumnidzãlu al Iacov. 47 Solomonu lj-adrã a lui unã casã.✝

48 Ma Atsel Ma Analtu nu bãneadzã tu cãsi adrati di mãnjili a oaminjlor, ashã cum dzãtsi prufitlu:

49 ‘Tserlu easti thronlu a meu

sh-loclu easti scamnul a cicioarilor a meali.

Tsi casã va nj-adrats voi, dzãsi Domnul,

icã cai va s-hibã loclu iu va mi discurmã?✝

50 Nu li featsi mãna a mea tuti aesti lucri?’

51 Popul rebil cu ininji sh-ureclji tsi nu avdu Dumnidzãlu, sh-voi ashãtsi ca pãrintsãlji a voshtri totãna ncuntrats Duhlu Sãmtu!✝ 52 Cai di prufitsilji nu avinarã pãrintsãlji a voshtri? Elji vãtãmarã atselji tsi prihãbãrsirã vinita a Ndreptului, iarã voi tora hits faptsã prudots sh-vãtãmãtorlji a lui. 53 Voi hits atselji cai loat legea dimãndatã di la anghilji, ma nu u-tsãnut."

54 Cãndu oaminjlji al Sinedriul avdzãrã aesti zboari, elji s-nãrãirã shi cãrtsãnirã dintsãlji contra al Stefan. 55 Ma Stefanul mplinã di Duhlu Sãmtu sculã ocljilji cãtrã tser sh-vidzu mãrirea a Dumnidzãlui sh-Isusul stãnda tu nandreapta a Dumnidzãlui. 56 Atumtsea elu dzãsi: "Ia, mini ma ved tserlu discljis sh-Hiljilu a Omlui stãnda tu nandreapta a Dumnidzãlui." 57 Ma elji ncljisirã urecljili sh-cu aurlari vãrtoasi sh-pi unã minti tutsã si sãlãghirã pristi nãsu. 58 Deapoea lu trapsirã azvara nafoarã dit cãsãbã sh-lu agudirã cu chetri. Martirlji bãgarã stranjili a lor la cicioarili a unui tinir acljimat Saul. 59 Iarã lu agudea cu chetri, Stefanul s-ruga: "Doamne Isus, aproachi-l suflitlu a meu!" 60 Deapoea cãdzu pri dzinuclji sh-grãi cu boatsi analtã: "Doamne, nu lã-u ngarcã a lor aestã amãrtii!" Sh-cum dzãsi aesti durnji.