1 Pavlu agiumsi tu Derbe sh-deapoea sh-tu Listra. Aclo bãna un ucenic cu numa Timote. Muma a lui eara pistimenã uvreauã sh-tatã-su elin. 2 Trã nãsu zbura ghini fratslji tu Listra sh-tu Iconiu. 3 Pavlu vrea tsi Timoteu s-njidzea dupã nãsu, trã atsea lu anvãrliga-tãlje trã itia a Iudeilor cai bãna tu atseali locuri, cã tuts shtia cã tatãl a lui eara elin. 4 Cãndu s-dutsea dit un cãsãbã tu alantu hãbãrsea oaminjlji trã apofãsirili tsi avea loatã apostulji sh-aushlji di Ierusalem tsi s-li fãtsea. 5 Ashãtsi biseritsli si nvãrtushea tu pisti shi crishtea tu numir dzuã dupã dzuã.

6 Pavlu shi atselji tsi cãlãtorea cu nãsu tricurã namisa di locurili a Frighiiljei sh-a Galatiiljei, sh-Duhlu Sãmtu lji tsãnu s-nu predica zborlu tu Asia atsea njica. 7 Cãndu elji vinirã la sinurlu di Misia, vrurã s-intra tu Bitinia, ma Duhlu al Isus nu lji alãsã. 8 Ashãtsi elji tricurã prit Misia shi s-dusirã pãnã tu Troas. 9 Noaptea Pavlu avu un viziuni a unui om di Machidunia cai stãtea nãintea a lui shi lji si ruga: "Haidi la noi tu Machidunii s-nã agiuts." 10 Dupã tsi Pavlu vidzu viziunea, noi nã etimãsim trãoarã tra s-njidzem tu Machidunii, cãndãrsits tsi Dumnidzãlu nã avea acljimat s-predicam a lor evanghelu.

11 Trã atsea noi nãftãnda di Troada nã dusim tu Samotrachia sh-alantã dzuã tu Neapoli. 12 Di aclo noi agiumsim tu Filipii, cai eara protlu cãsãbã sh-colonii romanã tu loclu di Machidunii. Shi noi stãtum aclo niscãnti dzãli. 13 Tu dzua di Sãmbãtã noi ishim nafoarã di poarta a cãsãbãlui mardzina di arãu, sh-vream s-aflam un loc trã rugãciuni. Noi shidzum mpadi shi apãrnjim si zburam a muljerilor cai eara adunati aclo. 14 Unã di atseali tsi ma nã asculta eara unã muljeari cu numa Lidia di Tiatira, unã vinditoarã di purpurã. Ea eara unã alãvdãtoarã a Dumnidzãlui. Domnul lj-discljisi inima a ljei tra s-asculta zborlu al Pavlu. 15 Cãndu ea sh-atselji di casa a ljei s-pãtidzarã, ea nã acljimã la casã. "Macã voi mi lugursits pistimenã a Domnului," dzãsi ea, "intrats shi shidets la casa a mea." Ea ipiminisi s-njidzeam la casa a ljei.

16 Unã oarã cãndu ma njidzeam la loclu a rugãciuniljei, adunãm unã featã sclavã cai avea un duh arãu tsi prividea yinitura. Ea adutsea multu amintatic a nicuchirilor cu prividearili a ljei. 17 Ea njidzea dupã Pavlu sh-dupã noi, aurlãnda: "Aeshti bãrbats suntu huzmichearlji a Dumnidzãlui, Atsel Analtu, tsi vã spuni a voauã calea di ascãpari." 18 Sh-ea u featsi aestã di multi dzãli. Ma Pavlu lji si turnã nãrãit sh-lji dzãsi a duhlui: "Tu numa al Isus Hristos ti ursescu tsi s-eshi nafoarã dit ea!" Tu atsea oarã duhlu u alãsã. 19 Cãndu nicuchirlji achicãsirã cã nãdia a lor trã amintatic chiru, elji acãtsarã Pavlu sh-Sila shi lji trapsirã cãtrã pãzari tra s-isha nãintea a autoritãtsilor. 20 Cãndu lji dusirã nãintea a autoritãtsilor, lã dzãsirã: "Aeshti bãrbats ma tulburã cãsãbãlu a nostru. Elji suntu uvrei. 21 Elji nveatsã adetsi trã noi, cai noi Romanji nu li urmãm sh-nu li fãtsem." 22 Multsãmea si sculã contra al Pavlu sh-al Sila, sh-autoritãtsili ursirã tra s-lã arupã stranjili a lor shi s-lji bãtea cu ciumãdzi. 23 Dupã tsi lji bãturã multu arãu, lji bãgarã tu hapsi, sh-ursirã vigljitorlu s-lji vigljea ghini. 24 Cãndu elu lo ahtãri ordini, lji bãgã tu chilii hãndoasã sh-lã ligã cicioarili tu giuglu di lemn. 25 Tu njeadzã-noapti Pavlu sh-Sila ma s-ruga sh-ma cãnta imnuri a Dumnidzãlui sh-alantsã hãpsãnit ma avdza. 26 Niashtiptat s-featsi un mari cutrembur sh-thimeljiurili a hapsiljei s-trunduirã. Trãoarã tuti ushili s-discljisirã sh-a cuitsido lji si dizligarã prãnghili. 27 Anda vigljitorlu si-sculã sh-vidzu ushili discljisi, elu lo spata sh-vrea si s-vãtãma minduinda cã hãpsãnitslji avea ascãpat. 28 Atumtsea Pavlu lj-aurlã cu boatsi analtã: "Nu fã arãutati pri tini! Noi him tuts aoa!" 29 Vigljitorlu cãftã lunjinã, intrã trãoarã sh-cãdzu trimurãnda nãintea al Pavlu sh-al Sila. 30 Elu lji scoasi nafoarã sh-lji ntribã: "Domnji, tsi prindi s-facã tra s-ascapã?" 31 Elji apãndisirã: "Pistipsea tu Domnul Isus sh-va s-ascachi, tini sh-tutã soia a ta." 32 Atumtsea elji lji predicarã a lui zborlu a Domnului sh-a tuts atsilor cai eara la casa a lui. 33 Tu atsea oarã a noaptiljei vigljitorlu lji lo sh-aspilã pledzili a lor. Atumtsea, elu sh-tutã soia a lui trãoarã s-pãtidzã. 34 Vigljitorlu lji adusi la casa a lui sh-lã deadi trã mãcari. Elu s-umplu cu harauã cã pistipsi tu Dumnidzã, elu sh-tutã soia a lui. 35 Cãndu alghi dzua, autoritãtsili pitricurã militarlji a lor s-lji dzãtsea a vigljitorlui: "Sãlãghea atselji bãrbats." 36 Vigljitorlu lj-dzãsi al Pavlu: "Autoritãtsili au ursit tsi tini sh-Sila s-vã sãlãghits. Ishits sh-fudzits tu pace!" 37 Ma Pavlu lj-dzãsi a militarilor: "Atselji nã bãturã tu padi ni fãrã s-him giudicats, cu tutã cã noi him cãsãbunji romanji, sh-nã bãgarã tu hapsi. Sh-tora vor s-nã dipãrteadzã pri ascumtu? Nu! S-yinã elji shi s-nã sotsãseascã nafoarã." 38 Sh-militarlji lã pitricurã hãbari a autoritãtsilor. Cãndu elji avdzãrã tsi Pavlu sh-Sila eara cãsãbunji romanji, lji acãtsã unã fricã mari. 39 Atumtsea elji vinirã sh-cãftarã ljirtari. Dupã tsi lji scoasirã nafoarã, cãftarã s-fugã di cãsãbã. 40 Cãndu Pavlu sh-Sila ishirã dit hapsi, elji s-dusirã la casa a Lidãljei. Aclo adunarã fratsi sh-surãri, lã inimusirã atselji sh-fudzirã.