1 Prota carti u feciu, Theofile, trã tuti atseali tsi Isusul apãrnji s-facã shi s-nveatsã, 2 pãnã tu dzua cãndu s-anãltsã tu tser, dupã tsi avea datã ordin prit Duhlu Sãmtu a apostuljilor tsi elu avea aleaptã. 3 Isusul, dupã tsi eara munduitã, s-aspusi a lor nyeat cu multi provi, sh-vidzut di partea a lor di patrudzãtsi di dzãli sh-grãinda trã amirãriljea al Dumnidzãu. 4 Cãndu eara uspetsi deadun cu nãshi, lji ordinã: "Nu vã dipãrtats di Ierusalem, ma s-ashtiptats tãxirea a Tatãlui, tsi avets avdzãt di la mini. 5 Ioanul pãtidzã cu apã, ma voi va vã pãtidzats cu Duhlu Sãmtu nu dupã multi dzãli." 6 Ashãtsi atselji tsi eara adunats ningã nãsu lu ntribarã: "Doamne, va u adari tini tora amirãriljea al Israel?" 7 Elu apãndisi: "Nu easti lucrul a vostru sã shtits chirolu sh-oara, tsi ari arãdãpsit Tatãl cu autoritatea a lui. 8 Ma voi va s-loats puteari cãndu Duhlu Sãmtu va s-yinã pri voi, sh-va vã fãtsets martiri a melji tu Ierusalem sh-tu tutã Iudea, tu Samaria sh-pãnã tu mardzina a loclui." 9 Dupã tsi li dzãsi aesti, cãndu elji ma lu mutrea, lu-anãltsarã tu tser sh-un nior lu lo dit ocljilji a lor. 10 Sh-cum tsãnea ocljilji cãtrã tser, cãndu elu ma s-anãltsa, ia doi bãrbats cu stranji albi stãturã nãintea a lor, 11 sh-lã dzãsirã: "Bãrbats di Galilea, cãtse stats sh-mutrits cãtrã tser? Aestu Isus, tsi s-anãltsã tu tser dit mesea a voastrã, va si s-toarnã ashã cum fudzi, cum lu vidzut cã s-alinã tu tser."

12 Atumtsea elji s-turnarã tu Ierusalem di pri muntili tsi s-acljeamã a Masnjilor, tsi easti aproapi di Ierusalem cãt easti imnarea a Sãmbãtãljei. 13 Cum s-turnarã tu cãsãbã, s-alinarã tu udãlu di analtu, iu stãtea Petrul, Ioanul, Iacovul, Andrea, Filipul, Toma, Bartolomeu, Mateu, Iacovul al Alfeu, Simon Zelotlu sh-Iuda al Iacovu. 14 Tuts aeshti eara cu unã singur minduiri tu rugãciuni deadun cu muljerili, cu Maria, muma al Isus sh-cu fratslji a lui.

15 Tu atseali dzãli Petrul si sculã namisa di ucenitsilji, (iu numirlu a oaminjlor adunats eara anvãrliga di unã sutã sh-yinghits), sh-dzãsi: 16 "Frats sh-surãri, prindi tra si mplineascã aestã Scriturã, la cai Duhlu Sãmtu u pridzãsi cu gura al David trã Iuda, cai s-featsi cãlãuzlu atsilor tsi lu acãtsarã Isusul. 17 Elu eara numirat deadun cu noi sh-avea parti tu aestã huzmitipsiri. 18 (Elu acumpãrã un agru cu arãsplata a nindriptatiljei. Aclo cãdzu cu caplu nghios, lj-cripã pãnticlu sh-tuti atseali a lui di nãuntru lji si virsarã. 19 Aestã s-featsi cunuscutã la tuts bãnãtorlji di Ierusalem, sh-agrul tu limba a lor s-acljimã Acheldama, tsi va s-dzãcã Agrul a sãndzilui). 20 Ia, tsi easti scriatã tu cartea a Psalnjilor:

‘Casa a lui si s-facã shcretã

sh-vãrã s-nu bãneadzã tu nãsã!’

Shi:

‘Altul s-u ljea huzmitipsirea a lui.’

21 Prindi, tsi unu di bãrbatslji cai eara deadun cu noi tut chirolu tsi Domnul Isus ari intrat sh-ari ishit namisa di noi, 22 apãrnjinda di la pitedzlu al Ioan sh-pãnã tu atsea dzuã cãndu u loar di la noi sh-lu anãltsarã tu tser, si s-facã martir cu noi trã nyearea a lui."

23 Atumtsea s-numirã doi: Iosiful, acljimat Barsaba (tsi eara cunuscut Iustu), sh-Matia. 24 Deapoea s-rugarã sh-dzãsirã: "Tini, Doamne, tsi cunoshti ininjli a tutulor, aspuni cai di aeshti doi ai aleaptã, 25 trã loari soartea aishtei huzmitipsiri apostolicã, di la cai Iuda s-dipãrtã si s-ducã tu loclu a lui." 26 Atumtsea arcarã soarti sh-soartea cãdzu pri Matia. Elu s-lugursi cu unsprãdzatsi Apostulji.