Faptili 23

1 Pavlu mutri cãtrã Sinedriul sh-dzãsi: "Frats a melji, mini pãnã azã am bãnat cu conshtintsã curatã nãintea a Dumnidzãlui." 2 Atumtsea arhipreftul Anania ordinã atselji cai stãtea ningã Pavlu s-lu agudea pi gurã. 3 Atumtsea Pavlu lj-dzãsi a lui: "Dumnidzãlu va ti agudeascã tini, ipucrit!*23:3 "ipucrit" va s-dzãc "mur alãghit" Tini eshti apunat aclo s-mi giudits dupã legea, ma cãlcãnda legea, tini dai ordin s-mi agudeascã." 4 Atselji cai stãtea ningã Pavlul lj-dzãsirã: "Cum cutidzeshti tini s-ngiuri arhipreftul a Dumnidzãlui?" 5 Pavlu apãndisi: "Frats, nu shtiam cã elu eara arhipreftu, cã easti scriat: ‘S-nu greshti arãu trã mãrlji a popului a tãu.’"✝23:5 Ex 22:28. 6 Atumtsea Pavlu, shtinda cã niscãntsã eara Sadutsei sh-altsãlji eara Farisei, grãi tu Sinedriu cu boatsi analtã: "Frats, mini escu Fariseu sh-hiljiu di Fariseu. Mini ma mi giudicã cã nãdãescu tu nyearea a mortsãlor." 7 Macãt elu dzãsi aestã, apãrnji unã ngrãnji ntrã Fariseilji sh-Sadutseilji sh-adunarea s-dispãrtsã. 8 (Sadutseilji dzãc cã nu ari nyeari, nits anghilji, nits duhuri, ma Fariseilji pistipsescu tu tuti aesti.) 9 Aclo s-avdzãrã mãri aurlari, sh-niscãntsã nvitsãtori a legiljei dit Fariseilji si scularã sh-ncuntrarã cu aspru: "Noi nu aflãm vãrã arãu la aestu om," dzãsirã elji. "Vahi lj-ari zburãtã un duh icã un anghil?" 10 Cãndu ncãcearea ma s-fãtsea ma mari, tribunlu avu fricã cã elji va s-lu dinjica Pavlul. Trã atsea ursi suldatslji s-njidzea s-loa Pavlul di mãnjili a lor, shi s-lu adutsea tu castelu. 11 Unã noapti ma nãpoi Domnul lj-stãtu aproapi al Pavlu sh-lji-dzãsi: "Ljea curaiu! Cum ai mãrtirsit trã mini tu Ierusalem, ashãtsi prindi s-mãrtirseshti sh-Roma."

Complotlu contra al Pavlu

12 Dimineatsa Iudeilji ndreapsirã un complot shi si spigiurarã cã nu va mãca sh-nu va bea pãnã cãndu s-lu vãtãma Pavlul. 13 Atselji tsi s-featsirã deadun tu aestu complot eara ma multu di patrudzãtsi di bãrbats. 14 Elji s-dusirã la arhipreftsãlji sh-la aushlji sh-lã dzãsirã: "Noi him spigiurats deadun tra s-nu mãcãm tsiva pãnã cãndu s-avem vãtãmat Pavlul. 15 Trã atsea, voi shi Sinedriul prindi s-lji cãftats a tribunlui tsi s-lu aduc nãintea a voastrã fãcãnda taha voi vrets s-shtits ma multu trã nãsu. Noi him etinji s-lu vãtãmãm ma nãinti tsi s-agiungã aoatsi." 16 Ma cãndu hiljilu a sorãljei al Pavlu avdzã trã aestu complot, fudzi la castelu shi lj-spusi al Pavlu. 17 Atumtsea Pavlu acljimã unu di tsenturionjlji shi lj-dzãsi: "Pitreats-lu aestu ficior la tribunlu, cã ari tsiva trã dzãtseari." 18 Ashãtsi elu lo tinirlu, lu dusi la tribunlu sh-lji dzãsi: "Pavlu hãpsãnitlu, mi pitricu sh-nji cãftã s-aduc aestu ficior la voi cã ari tsiva trã dzãtseari." 19 Tribunlu lo ficiorlu di mãnã s-dusi dinãparti sh-lu ntribã: "Tsi vrei s-nji dzãts?" 20 Elu apãndisi: "Niscãntsã Iudei suntu faptã pi unã minti s-tsã caftã s-lu aduts mãni Pavlul nãintea a Sinedriului, fãcãnda taha vor s-shtii ma multu trã nãsu. 21 Nu lji asclutã atselji, cã ma multu di patrudzãtsi di bãrbats suntu etinji s-easã nãintea a lui. Elji suntu spigiurats deadun s-nu mãcã shi s-nu bea pãnã cãndu s-vatãmã Pavlul. Tora elji suntu etinji, sh-ma ashteaptã tsi tini si mplineshti cãftarea a lor." 22 Atumtsea tribunlu lu nchisi ficiorlu sh-lji dzãsi: "Nu lj-spuni a vãrui tsi nj-ai dzãsã."

Adutsearea al Pavlu tu Cesarea

23 Atumtsea elu acljimã doi tsenturionjlji sh-lã dzãsi: "Etimãsits-vã s-vã nchisits anvãrliga di oara noauã a noaptiljei cãtrã Cesarea cu doauã suti di suldats, shaptidzãtsi di cãvãlari shi doauã sutã di sãdzetari. 24 Etimãsits un calu trã Pavlu tsi s-lu adutsets sãnãtos la guvernatorlu Felix." 25 Elu scrie unã carti, la cai dzãtsea ashãtsi:

26 Claudiu Lisia,

a Exelentului, Guvernatorlu Felix,

Salutari!

27 Atsel om eara acãtsat di Iudeilji shi elji vrea s-lu vãtãma, ma dupã tsi nvitsai cã eara cãsãbunjiu Roman, intrai cu suldatslji a melji sh-lu ascãpai di mãnjili a lor. 28 Mini vream sã shtiam cai eara cãbatea trã cai elji lu acuza, sh-trã atsea lu dush nãintea a Sinedriului a lor. 29 Aclo nvitsai cã lu acuza trã niscãnti lucri di legea a lor, ma dealihea nu avea faptã vãrã cãbati trã muriri icã trã hãpsãniri. 30 Cãndu nji spusirã di un complot contra aishtui om, lu pitricui trãoarã la voi. Tutashã, ursii acuzatorlji a lui tra si zburãscã cu tini trã nãsu.

31 Ashã suldatslji lu loarã Pavlul, sh-dupã ordinlu lu dusirã noaptea pãnã tu Antipatridã. 32 Alantã dzua elji alãsarã cãvãlarlji s-njidzea cu nãsu, iarã suldatslji s-turnarã tu castel. 33 Cãvãlarlji agiumsirã tu Cesarea, lji deadirã cartea a guvernatorlui sh-prideadirã Pavlul. 34 Guvernatorlu cãntã cartea, ntribã Pavlul di cai loc eara, sh-cãndu nvitsã cã eara di Chilichia, 35 lj-dzãsi: "Va ti ascultã cãndu s-yinã atselji cai ti au acuzat." Deapoea elu ursi s-lu tsãnea Pavlul vigljat tu pretoriulu al Herod.