Faptili 28

Pavlu Agiumsi Malta

1 Dupã tsi ascãpãm, nvitsãm cã insula s-acljima Malta. 2 Bãnãtorlji aspusirã unã bunã-vreari mari cãtrã noi. Elji apreasirã un foc sh-nã adunarã tuts noi anvãrliga di foc, cã avea apãrnjitã ploaia sh-eara arcoari. 3 Pavlu avea adunatã un brats di leamni sh-ma li bãga tu foc. Atumtsea lji si anvãrti tu mãnã unã nãpãrticã tsi ishi di cãldura. 4 Cãndu u-vidzurã nãpãrtica tsi si spindzura tu mãna a lui, locuitorlji dzãsirã cu un-alantu: "Aestu bãrbat prindi s-hibã vãtãmãtor cã, cu tutã cã ascãpã di amarea, ndriptatea tsereascã nu lu alãsã s-bãneadzã." 5 Pavlu u scuturã di mãnã nãpãrtica tu foc sh-nu pãtsã tsiva. 6 Elji ma ashtipta tsi si umfla mãna, icã s-cãdea trãoarã mortu. Dupã tsi ashtiptarã multu, sh-a lui nu ma lji undzea tsiva alãxirã minduirea sh-dzãsirã cã elu eara dumnidzã. 7 Aproapi di atsel loc eara agrili a ma marlui a insuliljei cu numa Publiu. Elu nã ashtiptã sh-nã tsãnu ca oaspits di trei dzãli. 8 Tatã-su al Publiu eara lãndzit tu pat cu hevri sh-cu dizanterii. Pavlu lji s-apruche a lui, s-rugã, timsi mãnjili pristi nãsu sh-lu vindicã. 9 Dupã tsi undzi aestã, sh-alantsã lãndzits tu insulã yinea la nãsu shi s-vindica. 10 Elji nã tinjisirã multu sh-cãndu ma nã nchiseam nã deadirã multi lucri trã cai aveam ananghi.

Agiundzearea al Pavlu Roma

11 Dupã trei meshi nã nchisim cu un pampor di Alexandria tsi avea tricut iarna tu insulã sh-avea ca emblemã Dioscurilji. 12 Agiumsim Siracuza sh-dãnãsim aclo trei dzãli. 13 Deapoea nãftim ningã meal sh-agiumsim tu Regio. Alantã dzuã apãrnji si suflã vimtul dit sud sh-dzua a doaua agiumsim tu Puteoli. 14 Aclo aflãm niscãntsã frats cai nã si rugarã s-armãneam cu nãshi shapti dzãli. Ashãtsi noi agiumsim Roma. 15 Fratslji tsi eara aclo, cãndu avdzãrã trã noi, vinirã di la Forlu al Apiu sh-di la Trei Tavernili trã adunari cu noi. Cãndu Pavlu lji vidzu, hãristisi Dumnidzãlu shi s-inimusi. 16 Cãndu agiumsim Roma, al Pavlu lji deadirã volje s-bãna singur sh-lji bãgarã un suldat s-lu vigljea.

Pavlu Preadicã tu Roma

17 Dupã trei dzãli Pavlu acljimã mãrlji a Iudeilor sh-cãndu s-adunarã lã dzãsi: "Frats, cu tutã cã nu am faptã tsiva contra a popului a meu icã contra a adetsilor a pãrintsãlor a noshtri, mi acãtsarã tu Ierusalem sh-mi prideadirã tu mãnjili a Romanjilor. 18 Dupã tsi mi loarã tu ntribari, Romanjlji vrurã s-mi sãlãghea cã nu aflarã vãrã cãbati tra s-axizescu moartea. 19 Ma Iudeilji ncuntrarã sh-mini fui anãngãsit s-caftu s-mi giudic di Cezarlu, ma nu cã am tsiva trã acuzari fara a mea. 20 Trã atsea am cãftat s-vã ved shi si zburãscu cu voi, cã escu ligat cu aesti prãnghi trã nãdia al Israel." 21 Elji lji dzãsirã: "Noi nu avem loat nitsiunã carti di Iudea trã tini sh-vãrã di fratslji Iudei tsi au vinit aoa, nu nã ari spusã tsiva arãu trã tini. 22 Cu tutã atsea noi vrem s-avdzãm di la tini tsi mindueshti, cã shtim cã trã aestã sectã iutsido s-greashti contra." 23 Elji arãdãpsirã unã dzuã tra s-aduna Pavlul, sh-multsã oaminji s-dusirã aclo iu bãna elu. Di dimineatsa sh-pãnã seara elu lã nvitsa sh-lã predica trã amirãriljea a Dumnidzãlui shi-cãfta s-lji cãndãrsea dupã Legea al Moisiu sh-a Prufitsilor trã Isusul. 24 Niscãntsã s-cãndãrsirã trã atseali tsi dzãsi, iarã alantsãlji nu pistipsirã. 25 Ashãtsi elji nu cãdzurã pi unã minti cu un-alantu sh-cãndu ma fudzea, Pavlu lã dzãsi: "Ghini vã grãi Duhlu Sãmtu a pãrintsãlor a voshtri prit prufitlu Isaia:

26 ‘Duti la populu aestu sh-dzã:

"Cu ureclji va avdzãts ma nu va aduchits tsiva,

sh-cu oclji va mutrits ma nu va videts tsiva.

27 Inima a aishtui popul easti faptã nisãmtsãtã,

urecljili a lor greli sh-nu avdu, au ncljisã ocljilji a lor,

tra s-nu veadã cu oclji shi s-nu avdã cu ureclji,

s-nu aducheascã cu inima shi s-toarnã s-lji vindicã mini."’✝28:27 Isa 6:9-10.

28 Trã atsea nvitsats cã ascãparea a Dumnidzãlui lji si pitricu a pãngãnjilor sh-elji va ascultã!"

29 [Dupã tsi li dzãsi aesti, Iudeilji fudzirã sh-avurã mari ngrãnji namisa di nãshi.]*28:29 Aestu versu nu s-aflã tu tuti manuscrisili atseali veaclji. 30 Pavlu armasi doi anji ntredzi tu casa tsi avea loat cu nichi sh-ashtipta tuts atselji tsi yinea la nãsu. 31 Elu lã predica amirãriljea al Dumnidzãu sh-lã nvitsa alihea trã Domnul Isus Hristos cu multu curaiu sh-fãrã s-cheadicã.