1 Tu atsel chiro amirãlu Herod apãrnji s-priaĝuneascã niscãntsã di pistimenjlji a biseritslor. 2 Elu lu vãtãmã cu spatã Iacovul, fratili al Ioan. 3 Cãndu vidzu cã aestã lj-arsi a Iudeilor, ursi s-acãtsa sh-Petrul. Eara dzãlili a Adzãmilor. 4 Dupã tsi lu acãtsã, Ierodul lu bãgã tu hapsi sh-lu prideadi la patru grupi cu patru suldats tsi s-lu vigljea. Elu vrea tsi dupã Pashti s-lu scutea nãintea a popului trã giudicari. 5 Cãndu Petrul eara tu hapsi, bisearica lji si ruga a Dumnidzãlui cu tutã inimã trã nãsu. 6 Noaptea, nãinti tsi Herodul s-lu scutea Petrul nãintea a popului, elu era ligat cu doi singiri sh-ma durnjea tu mesea di doi suldats, iarã vigljitorlji nãintea a poartãljei vigljea hapsea. 7 Niashtiptat, s-fãnirusi un anghil a Domnului sh-chilia s-lunjinã di unã lunjinã. Anghilu lu-acãtsã Petrul di coastã sh-lji dzãsi: "Scoalã-ti trãoarã!" Atumtsea singirili lj-cãdzurã di mãnji. 8 Deapoea anghilu lj-dzãsi: "Bagã curaua sh-leagã sandalili." Petrul ashã featsi. Dupã aestã lj-dzãsi: "Nveashti mantilul sh-urmeadzã-mi!" 9 Petrul ishi shi s-dusi dupã nãsu, nishtinda cã atsea tsi ma lj-undzea cu anghilu eara dealihea. Elu minduea ca ma videa unã viziuni. 10 Cãndu tricurã protlu vigljitor sh-a doilu, agiumsirã la poarta di her, tsi ti dutsea tu cãsãbã. Ea s-discljisi singur. Elji ishirã sh-pitrumsirã unã cali, ma niashtiptatã anghilu s-dipãrtã di la nãsu. 11 Atumtsea Petrul aduchi sh-dzãsi: "Tora shtiu dealihea cã Domnul pitricu anghilu a lui sh-mi ascapã di mãnjili al Herod sh-di tuti tsi Iudeilji nãdãea s-nji undzea." 12 Cum u-aduchi aestã, s-dusi la casa ali Marii, muma al Ioan, tsi s-acljima sh-Marcu. Aclo eara adunat multsã trã rugari. 13 Petrul asunã la poarta di-nafoarã. Unã huzmichearã cu numa Roda vini la poartã s-videa. 14 Cãndu avdzã boatsea al Petru, ea s-hãrsi ahãntu multu, cãt andi s-discljidea poarta s-dusi trãoarã nãuntru sh-hãbãrsi cã Petrul eara nãintea a poartãljei. 15 Elji lj-dzãsira: "Tini nu eshti ghini." Ma ea ipiminisi cã eara dealihea. Atumtsea elji dzãsirã: "Easti anghilu a lui." 16 Petrul asuna dipriunã la poartã. Cãndu discljisirã poarta, elji lu vidzurã shi s-ciudisirã. 17 Elu lã-u featsi cu mãna s-tãtsea sh-lã spusi cã cum Domnul lu scoasi di hapsi. Atumtsea dzãsi: "Spunets-u aestã al Iacov sh-a alãntor frats." Deapoea ishi sh-fudzi tu un loc altu. 18 Cãndu alghi dzua, s-featsi unã tulburari mari namisa di suldatslji, trã atsea cã, tsi lji avea undzit al Petru. 19 Herodul lu cãftã iutsido, ma nu lu aflã. Atumtsea ntribã vigljitorlji sh-ordinã s-lji vãtãma. Deapoea dipunã di Iudea tu Cesarea sh-dãnãsi aclo.

20 Herod eara multu nãrãit cu locuitorlji al Tiro sh-al Sidon. Atumtsea elji cãdzurã tu uidii shi s-dusirã la nãsu. Deapoea elji lj-umplurã mintea al Blastlu, servitorlu pistimen a amirãlui, sh-cãftarã s-puituea, cã loclu a lor u loa hranea dit amirãriljea a lui. 21 Tu dzua atsea arãdãpsitã, Herodul avea nviscut stranjili amirãrescu, s-apunã tu thronlu sh-lã zbura. 22 Populu adunat apãrnji s-aurla: "Atsea easti boatsi di dumnidzã sh-nu di om!" 23 Sh-dinãoarã un anghil a Dumnidzãlui lu agudi Herodul, cã elu nu lj-deadi mãriri a Dumnidzãlui. Elu lu mãcarã yernjili sh-muri. 24 Ma zborlu a Dumnidzãlui s-arãspãndea ma multu shi s-multsea.

25 Cãndu Barnaba sh-Saulu avea bitisitã misionlu a lor shi s-turnarã tu Ierusalem, loarã cu nãshi Ioanul, acljimat Marcu.