Faptili 11

Zborlu al Petru trã Predicarea la Pãngãnjlji

1 Apostulji sh-fratslji cai eara iutsido tu Iudea avdzãrã cã sh-pãngãnjlji avea aprucheatã zborlu al Dumnidzãu. 2 Cãndu Petrul s-dusi tu Ierusalem pistimenjlji anvãrliga-tãljeats lu ambulisirã cu zboari, 3 sh-lji dzãsirã: "Tini intrashi tu casa a nianvãrliga-tãljeatslor sh-mãcash cu nãshi!" 4 Atumtsea Petrul apãrnji s-lã spunã cu aradã a lor tsi avea undzit dzãcãnda: 5 "Earam tu cãsãbãlu di Ioppa sh-ma mi rugam, deapoea vidzui tu extazã unã viziuni, unã tsiva ca pãndzã mari acãtsat dit patruli pãrtsi cai dipunã dit tser sh-vini la mini. 6 Cãndu u-vidzui di aproapi, bãgai oarã nimalji cu patru-cicioari a loclui, agrimi, azvãrnitori sh-puljilji a tserlui. 7 Atumtsea avdzãi unã boatsi cai nji dzãsi: ‘Scoalã-ti, Petro. Talji-li sh-mãcã!’ 8 Mini lj-dzãsh: ‘Vãrãoarã, Doamne! Cã nu ari intratã vãrãoarã tu gura a mea tsiva lãvushitã icã nicuratã.’ 9 Deapoea boatsea dit tser nji dzãsi di a doaua oarã: ‘Nu acljeamã nicurat atsea tsi Dumnidzãu u acljeami curat!’ 10 Aestu lucru s-featsi di trei ori, deapoea tuti s-anãltsarã nãpoi tu tser. 11 Tu oara atsea, trei bãrbats pitricuts la mini di Cesarea, vinirã la casa iu earam noi. 12 Duhlu nj-dzãsi s-njidzeam cu elji fãrã minduiri. Cu mini vinirã sh-aeshti shasi frats sh-intrãm tu casa atsilui bãrbat. 13 Elu nã aspusi cã avea vidzut un anghil cai lji si fãnirusi la casa a lui sh-lj-avea dzãsã: ‘Pitreats oaminji tu Ioppa tra s-lji greascã al Simon tsi lji dzãc sh-Petru. 14 Elu va ts-zburãscã zboari cu cai va s-ascachi tini sh-casa a ta.’ 15 Cãndu mini apãrnjii si zburãscu, Duhlu Sãmtu dipunã pri nãshi, ashã cum avea dipunat ma nãinti pri noi. 16 Atumtsea nj-adush aminti zborlu a Domnului cai dzãsi: ‘Ioanul pãtidzã cu apã, iarã voi va vã pãtidzats cu Duhlu Sãmtu.’ 17 Macã Dumnidzãlu lã deadi atsilor idyia doarã tsi nã deadi sh-a noauã cai pistipsim la Domnul Isus Hristos, cai earam mini tra s-ncuntram Dumnidzãlu?" 18 Cãndu li avdzãrã aesti zboari, elji s-acumtinarã sh-alãvdarã Dumnidzãlu dzãcãnda: "Dumnidzãlu lã-u deadi sh-a pãngãnjilor mitãnjiusirea cai dutsi tu bana."

Bisearica tu Antiochia

19 Atselji cai eara arãspãndits di itia a priaĝuniriljei cai apãrnji dupã moartea al Stefan s-dusirã pãnã tu Fenichia, tu Chipro sh-Antiochia, ma nu dimãndarã zborlu a vãrui dicãt mash a Iudeilor.✝11:19 Fap 8:1-4. 20 Namisa di nãshi eara sh-niscãntsã bãrbats di Chipro sh-di Tsirenea, cai cala cãtrã Antiochia dimãndarã evanghelu trã Domnul Isus sh-trã pãngãnjlji cai zbura gãrtseashti. 21 Mãna a Domnului eara cu nãshi sh-un numir mari pistipsirã shi s-turnarã la Domnul. 22 Shtirea ti aestã agiumsi tu urecljili a bisearicãljei tu Ierusalem, sh-elji pitricurã Barnaba s-njidzea tu Antiochia. 23 Cãndu elu agiumsi aclo sh-vidzu harul a Dumnidzãlui, s-hãrsi sh-lã deadi curaiu a tutulor s-armãnea pistimenji tu Domnul cu tutã inimã. 24 Barnaba eara un om bun, umplut di Duhlu Sãmtu sh-di pisti. Ashãtsi un numir mari di oaminji lji si adãvgarã a Domnului. 25 Deapoea Barnaba s-dusi tu Tarsu s-cãfta Saulu. 26 Cãndu lu aflã, lu adusi tu Antiochia. Elji stãturã atsia un an ntreg la bisearicã shi nvitsarã multsã oaminji. Tu Antiochia ucenitsilji s-acljimarã Crishtinji di prota oarã. 27 Tu atseali dzãli, tu Antiochia vinirã nghios niscãntsã prufits di Ierusalem. 28 Unlu di nãshi cai s-acljima Agab, si sculã sh-prispusi prit Duhlu cã va yinea unã foami mari tu tutã lumea. Aestã undzi tu chirolu cãndu imperator eara Claudiu. 29 Atumtsea ucenitsilji apofãsirã cã caitsido di elji, dupã putearea tsi avea, s-dãdea tsiva trã agiutari fratslji cai bãna tu Iudea. 30 Sh-ashãtsi featsirã, pitricãnda a aushlor agiutãrili cu mãna al Barnaba sh-al Saul.