1 Dupã aestã Pavlu fudzi di Athina sh-vini Corintu. 2 Aclo aflã un Iudeu cu numa Acuila, amintat tu Pontu cai macãt avea vinit di Italia cu muljearea a lui Prishila, cã imperatorlu Claudiu avea ursitã tuts Iudeilji s-fudzea di Roma. Pavlu s-dusi la elji. 3 Cã metsi avea unã zãnati, stãtu sh-lucrã deadun cu nãshi. Tehnea a lor eara s-adra tendi. 4 Cathi Sãmbãtã Pavlu nvitsa tu sinagogã shi s-cilistisea s-cãndãrsea Iudeilji sh-Elinji. 5 Cãndu vinirã Sila sh-Timoteu di Machidunii, Pavlu tut chirolu predica zborlu a Dumnidzãlui dimãndãnda a Iudeilor cã Isusul easti Hristolu. 6 Ma elji lu ncuntrarã sh-lu pizuirã, atumtsea Pavlu scuturã pulbirlu a stranjilor sh-lã dzãsi a lor: "Sãndzili a vostru s-hibã pristi capitli a voastri! Mini nu am cãbati, di tora sh-nclo va mi duc la pãngãnjlji." 7 Pavlu ishi di sinagogã sh-s-dusi la casa a unui om cu numa Titu Iustu, un alãvdãtor a Dumnidzãlui tsi u avea casa aproapi di sinagoga. 8 Crispu, marili a sinagogãljei, pistipsi la Domnul deadun cu tutã casa a lui sh-multsã Corintenji, ascultãnda Pavlul pistipsirã shi s-pãtidzarã. 9 Unã noapti Domnul lji dzãsi al Pavlu tu viziuni: "S-nu ai fricã, ma grea sh-nu tatsi, 10 cã mini escu cu tini sh-vãrã nu va bagã mãnã pri tini s-tsã facã arãu. Mini am multu oaminji tu cãsãbãlu aestu." 11 Pavlu stãtu aclo un an shi shasi meshi, nvitsãnda a lor zborlu al Dumnidzãu. 12 Cãndu Galionlu eara proconsul a Ahaiiljei, Iudeilji si scularã deadun contra al Pavlu sh-lu dusirã nãintea a tribunalui, 13 dzãcãnda: "Aestu om ma cãndãrseashti oaminjlji s-alavdã Dumnidzãlu contra atsiljei tsi nveatsi legea." 14 Macãt Pavlu vrea s-grea, Galionu lã dzãsi a Iudeilor: "Ma s-eara zborlu di vãrã nindriptati icã di vãrã arãutati, va s-vã ascultam cu arãvdari trã ntribarea a voastrã. 15 Metsi easti zborlu trã nvitsãturã, trã numi sh-trã legea a voastrã, mutrits voi, cã mini nu voi s-mi fac giudicãtor ti ahtãri lucri." 16 Sh-lji scoasi nafoarã di tribunal. 17 Atumtsea tuts atselji lu acãtsarã Sostenul, marili a sinagogãljei sh-lu bãturã nãintea a tribunalui. Ma Galionlu nu vrea s-shtia dip trã aesti lucri.

18 Pavlu armasi tu Corintu di multi dzãli, si salutã cu fratslji sh-surãrili sh-nãftãsi cãtrã Siria deadun cu Prishila sh-Acuila. Pavlu tumsi caplu tu Chencrea, cã avea faptã unã spigiurari. 19 Cãndu agiumsirã tu Efes, lji alãsã atselji atsia, iarã elu intrã tu sinagogã trã cuvintari cu Iudeilji. 20 Elji lji fãtsea rigeai s-armãnea ma multu, ma elu nu vru. 21 Cu tut atsea cãndu ma s-dipãrta di elji lã dzãsi: "Macã easti vrearea a Dumnidzãlui va mi tornu nãpoi la voi." Deapoea s-dipãrtã dit Efes nãftãnda cu varcã. 22 Dupã tsi agiumsi tu Cesarea, s-alinã tu Ierusalem, salutã bisearica sh-deapoea dipunã tu Antiochia. 23 Dãnãsi aclo di putsãn chiro, deapoea fudzi shi s-dusi prit locurili a Galatiiljei sh-a Frighiiljei, nvãrtushãnda tuts ucenitsilji. 24 Tu Efes vini un Iudeu cu numa Apollo, amintat tu Alexandria, un om orator tsi cunushtea ghini Scriturili. 25 Elu eara nvitsat tu calea a Domnului shi, n-focat tu suflit, grea sh-nvitsa ghini trã Isusul, cu tut cã cunushtea singur pitedzlu al Ioan. 26 Elu apãrnji si zburãscã discljisã tu sinagogã. Cãndu lu avdzãrã Acuila sh-Prishila, lu loarã dinãparti sh-lji u-sitixirã ma ghini calea a Dumnidzãlui. 27 Metsi elu vrea s-njidzea tu Ahaia, fratslji sh-surãrili lji deadirã curaiu sh-lji scriarã a ucenitsilor tra s-lu ashtipta. Cum agiumsi aclo, elu lji agiutã multu atselji cai avea pistipsitã prit harul. 28 Elu lji ncuntra cu fuchii Iudeilji, aspunãnda discljis prit Scrituri, cã Isusul easti Hristolu.