1 Tora tu bisearica di Antiochi eara prufits shi nvitsãtori: Barnaba, Simeon acljimat Nigheru, Lutsiu di Cirena, Manaenu (tsi eara criscut cu Herod tetrarclu) shi Saulu. 2 Cãndu elji ma alãvda Dumnidzãlu sh-tsãnea pãreasinji, Duhlu Sãmtu lã dzãsi: "Dipãrtsats Barnaba sh-Saulu ti lucrul tsi lji am acljimat." 3 Atumtsea elji tsãnurã pãreasinji shi s-rugarã, bãgãnda mãnjili pri nãshi sh-lji pitricurã.

4 Di doi atselji, pitricuts di la Duhlu Sãmtu, s-dusirã nghios tu Seleutsia sh-di aclo prit amari tu Chipro. 5 Cãndu elji agiumsirã Salamina, predicarã zborlu a Dumnidzãlui tu sinagodzãli a Iudeilor sh-Ioanul eara cu nãshi ca agiutor. 6 Elji imnarã pristi tutã insula pãnã tu Pafos. Aclo elji adunarã un mãyistru Iudeu, prufit arãdios cu numa Bar-Isus, 7 tsi eara cu proconsulu Sergiu Pavlu, un om mintimen. Elu acljimã Barnaba sh-Saulu sh-lã cãftã tra s-avdza zborlu a Dumnidzãlui. 8 Ma mãyistru, Elimas, cã ashã s-tradutsea numa a lui, lji ncuntra atselji cãftãnda s-lu dipãrta proconsul di pisti. 9 Atumtsea Saulu, cai s-acljima sh-Pavlu, umplut cu Duhlu Sãmtu, arcã ocljilji pri nãsu, 10 shi lj-dzãsi: "Tini, hiljilu al draclu, dushman cu itsido ndriptati, umplut cu tuti soili di arãdeari sh-di ilei, nu va s-muts mãna di strãmbari calea atsea ndreapta al Domnu? 11 Ia tora, mãna a Domnului easti contra tini. Va s-cheri videarea sh-nu va s-vedz soarili di putsãn chiro." Trãoarã lu anvãli un negru sh-scutidlu sh-yinea anvãrliga, cãftãnda vãrã tra s-lu tsãnea di mãnã. 12 Cãndu proconsul lu vidzu cã tsi undzi, sh-elu pistipsi, cã eara ciudisit di nvitsãtura trã Domnul.

13 Atumtsea Pavlu sh-atselji cai eara cu nãsu s-nchisirã prit amari di Pafos sh-agiumsirã pãnã tu Perga di Pamfilia, iarã Ioanul s-dipãrtã di elji shi s-turnã tu Ierusalem. 14 Elji alãsãnda Perga agiumsirã tu Antiochia a Pisidiiljei. Sãmbãta elji intrarã tu sinagogã shi shidzurã. 15 Dupã cãntarea a Legiljei sh-a Prufitsilor, mãrlji a sinagogãljei pitricurã a lor un om sh-lã dzãsi: "Frats, macã avets vãrã zbor ti inimusirea a popului, ursits sh-dzãtsets-lji." 16 Atumtsea, Pavlu si-sculã, featsi un semnu cu mãna sh-dzãsi: "Bãrbats Israelits sh-voi, tsi avets fricã di Dumnidzãlu, bãgats oarã! 17 Dumnidzãlu a popului al Israel aleapsi pãrintsãlji a noshtri sh-featsi un popul mari cãndu elji eara xenji tu loclu al Eghyptu. Elu lã scoasi di aclo cu bratslu a lui vãrtos, 18 shi di un chiro di patrudzãtsi di anji, elu li arãvdã tu irnjii. 19 Shi cum asparsi shapti natsiuni tu loclu a lui acljimat Canaan, lã-u deadi a lor atsel loc ca mushtiniri. 20 Tut atsea undzi di patru suti tsindzãtsi di anji. Dupã atsea Dumnidzãlu lã deadi giudicãtori pãnã la chirolu a prufitlui Samuel. 21 Atumtsea populu cãfta s-avea un amirã sh-Dumnidzãlu lã deadi Saulu, hiljilu al Chish, un om di fara al Beniamin, tsi domnui di patrudzãtsi di anji. 22 Dupã tsi lu mutã Saulu, elu featsi Davidul amirãlu a lor. Dumnidzãlu mãrtirisi ti nãsu: ‘Mini aflai Davidul, hiljilu al Iessi, un bãrbat cu inima ca a mea. Elu va s-facã itsido tsi mini voi.’ 23 Dumnidzãlu cum lj-avea tãxitã, prit fara atsilui om lj-adusi al Israel Ascãpãtorlu Isus. 24 Nãinti tsi s-yinea Isusul, Ioanul predicã a tut popului al Israel trã mitãnjiusiri sh-pãtidzari. 25 Cãndu eara tu bitisita a misionlui, Ioanul dzãsi: ‘Cai minduits cã escu mini? Mini nu escu atsel tsi voi ashtiptats. Ma easti atsel tsi yini dupã mini sh-a cui mini nu escu axiu s-lji dizlegã sandalili.’ 26 Frats, dupãyinitorlji al Abraham sh-voi pãngãnji tsi avets fricã Dumnidzãlu, hãbarea di aestã ascãpari nã si easti pitricut a noauã. 27 Bãnãtorlji al Ierusalem sh-mãrlji a lor tsi nu lu cunuscurã Isusul, ma cu munduirea a lui atselji mplinirã zboarili a prufitsilor tsi suntu cãntati cathi Sãmbãtã. 28 Cu tutã cã nu aflarã cãbati tra s-lu munduea cu moarti, elji lj-cãftarã al Pilat tra s-lu vãtãma. 29 Cãndu elji mplinirã tuti tsi eara scriatã trã nãsu, lu dipunarã dit lemnul a crutsiljei sh-lu bãgarã tu murmintu. 30 Ma Dumnidzãlu lu nyie dit mortsã. 31 Di multi dzãli elu s-vidzu di atselji tsi avea imnat cu nãsu di Galilea pãnã tu Ierusalem. Tora elji suntu martirlji a lui nãintea a popului. 32 Noi vã dimãndãm hãbarea atsea buna, tsi eara tãxit a ntãnjilor a noshtri. 33 Dumnidzãlu aestã u ari mplinit trã noi, cilimenjlji a lor, cu nyearea al Isus. Ashãtsi cum easti scriat la a doilu Psalmu:

‘Tini eshti Hiljilu a meu,

azã mini mi facã Tatãl a tãu.’✝

34 Dumnidzãlu lu sculã dit mortsã tsi elu s-nu videa aspãrdzearea. Ashã cum Dumnidzãlu ari dzãs:

‘Mini vã dau a voauã tãxirili atseali sãmti

sh-ghinicuvãntati tsi lj-am fapt al David.’✝

35 Sh-trã aestã tu un altu loc easti dzãsã:

‘Tini nu va s-alashi Sãmtulu a tãu

tra s-aspargã.’✝

36 Tora cãndu Davidul lj-avea huzmitipsit a nãetiljei al Dumnidzãu tu chirolu a lui, elu muri. Elu s-ngrupã cu pãrintsãlji a lui sh-truplu a lui s-asparsi. 37 Ma atsel tsi Dumnidzãlu lu sculã dit mortsã, nu lu vidzu aspãrdzearea. 38 Trã atsea, fratsi a melji, mini voi si shtits cã prit Isusul easti hãbãrsit ljirtarea a amãrtiilor, cã voi nu puteat s-vã ndriptats dupã legea al Moisiu. 39 Trã atsea caitsido tsi pistipseashti, s-ndripteadzã. 40 Afirits-vã tra s-nu vã undzeascã atsea tsi prufitsilji dzãsirã:

41 ‘Mutrits voi pizuits,

ciudisits-vã sh-chirets!

Cã mini ma fac tu dzãlili a voastri un lucru

tsi voi nu va lu pistipsits,

sh-macã vãrã va vã dzãtsea.’"✝

42 Cãndu Pavlu sh-Barnaba ma ishea nafoarã, oaminjlji ma lj-si ruga tra s-lã zbura trã atseali zboari alantã Sãmbãtã. 43 Cãndu adunatslji tu sinagogã ma s-dipãrta, multsã di Iudeilji sh-atselji turnats tu Iudaismu urmarã Pavlu sh-Barnaba, cai lã zbura a lor sh-lã dãdea curaiu s-armãnea tu harul a Dumnidzãlui. 44 Tu alantã Sãmbãtã aproapi tut cãsãbãlu s-adunã deadun s-avdza zborlu al Domnu. 45 Ma cãndu Iudeilji vidzurã multsãmea, elji si umplurã di zilii shi-apãrnjirã s-ncuntreadzã atseali tsi dzãtsea Pavlu sh-lu ambulisirã. 46 Ma Pavlu sh-Barnaba lã apãndisirã a lor cu curaiu: "Noi vream ma nãinti s-vã dimãndam a voauã zborlu al Dumnidzãu. Metsi voi lu arnisits zborlu sh-nu vã lugursits ca axii trã bana eternã, atumtsea noi ma nã turnãm cãtrã pãngãnjlji. 47 Trã atsea Domnul nã ursi:

‘Mini vã am faptã voi lunjina a pãngãnjilor,

tsi voi s-dutsets ascãparea

pãnã tu mardzina a loclui.’"✝

48 Cãndu pãngãnjlji u avdzãrã aestã, elji s-hãrsirã sh-alãvdarã zborlu al Domnu, sh-tuts atselji cai eara arãdãpsits trã bana eternã, pistipsirã. 49 Ashãtsi zborlu a Domnului s-arãspãndea tu tut loclu. 50 Ma Iudeilji lã pushpura a muljerilor dumnidzãsiti a mãrlor sh-a bãrbatslor tinjisits a cãsãbãlui. Elji apãrnjirã unã priaĝuniri contra al Pavlu sh-al Barnaba sh-lji arcarã nafoarã dit loclu a lor. 51 Atumtsea elji scuturarã pulbirlu dit cicioari pristi elji shi s-dusirã tu Iconiu. 52 Ucenitsilji s-umplurã cu harauã sh-cu Duhlu Sãmtu.