1 Un om cu numa Anania, deadun cu muljearea a lui Safira, avea vindut un agru. 2 Elu tsãnu trã nãsu unã parti a amintaticlui cu shtirea a muljeariljei a lui. Deapoea alanta u-deadi sh-u bãgã la cicioarili a apostuljilor. 3 Atumtsea Petrul lji dzãsi: "Anania, cãtse Satanlu s-umplu inima s-arãdz Duhlui Sãmtu shi s-lu tsãnj unã parti di amintaticlu a agrului? 4 Ma s-avea armasã ni-vindut, nu va eara a ta? Sh-dupã tsi lu-vindush, nu eara tu mãna a ta? Cãtse lu bãgash tu inimã aestu lucru? Tini nu arãseshi oaminjlji, ma Dumnidzãlu!" 5 Cãndu avdzã aesti zboari, Anania cãdzu mpadi sh-deadi suflitlu. Unã fricã mari vini pri tuts atselji tsi li avdzãrã aesti. 6 Si scularã ndoi tiniri, lu nviscurã, lu scoasirã nafoarã sh-lu ngruparã. 7 Aproapi trei oarã ma nãpoi vini muljearea a lui, tsi nu shtia tsi eara faptã. 8 Petrul lj-dzãsi a ljei: "Dzã-nji, lu vindut loclu ti ahãt?" Sh-ea dzãsi: "Ie, ti ahãt." 9 Atumtsea Petrul lj-dzãsi: "Cãtse vã featsit pi unã minti tra s-cãrtits Duhlu a Domnului? Ia, cicioarili atsilor tsi lu ngruparã bãrbatlu a tãu suntu la ushã sh-elji va ti scoatã nafoarã sh-tini." 10 Dinãoarã ea cãdzu la cicioarili a lui sh-deadi suflitlu. Tinirlji intrãnda nãuntru, u aflarã moartã. U scoasirã nafoarã sh-u ngruparã ningã bãrbatlu a ljei. 11 Tutã bisearica sh-tuts atselji tsi li avdzãrã aesti li acãtsã unã fricã mari.

12 Multi seamni sh-thavmati s-fãtsea tu popul prit mãnjili a Apostuljilor. Tuts pistimenjlji s-fãtsea pi unã minti shi s-aduna la porticlu al Solomon. 13 Vãrã di alantsã nu cutidza s-aduna cu elji, iarã populu lji alãvda. 14 Ashãtsi numirlu a bãrbatslor sh-a muljerilor tsi pistipsea la Domnul, crishtea totãna sh-ma multu. 15 Lãndzitslji lji scutea nafoarã pi cali sh-lji bãga pri paturi sh-pi tãrdzi tsi cãndu s-tritsea Petrul aumbra a lui s-aumbreadzã vãrã di elji. 16 Unã multsãmi mari di cãsãbadzli di anvãrliga al Ierusalem s-aduna. Elji adutsea lãndzits sh-atselji tsi eara munduits di duhuri nicurati, sh-tuts s-vindica.

17 Atumtsea, si sculã arhipreftul sh-tuts atselji tsi eara cu nãsu, sectul a Sadutseilor tsi s-umplurã cu inati, 18 sh-acãtsarã apostulji sh-lji bãgarã tu hapsea publicã. 19 Noaptea, un anghil a Domnului discljisi ushili a hapsiljei, lji scoasi nafoarã sh-lã dzãsi: 20 "Imnats, stãtets tu templu sh-predicats a popului tuti zboarili a banãljei aishtei." 21 Cãndu avdzãrã aesti, elji intrarã tu templu tahina sh-nvitsa oaminjlji. Cãndu vini arhipreftul sh-atselji tsi eara cu nãsu, acljimarã deadun Sinedriul sh-tuts aushlji a hiljilor al Israel. Deapoea pitricurã vigljitorlji la hapsi tra s-adutsea apostulji. 22 Ma cãndu vigljitorlji agiumsirã la hapsi, nu lji aflarã apostulji aclo. Cãndu s-turnarã deadirã hãbari, 23 dzãcãnda: "Noi u-aflãm hapsea ncljisã sh-siguripsitã, tutashã vigljitorlji nafoarã stãnda nãintea a ushilor. Cãndu li discljisim, nu aflãm vãrã nãuntru." 24 Cãndu comandantul a vigljitorilor a templui sh-arhipreftsãlji li avdzãrã aesti zboari, s-cihtisirã sh-minduirã cã tsi eara aestã. 25 Deapoea vini un tsi lã hãbãrsi a lor sh-lã dzãsi: "Ia, bãrbatslji tsi voi lji bãgat tu hapsi, suntu tu templu nvitsãnda populu." 26 Atumtsea, comandantul cu vigljitorlji a templui s-dusi sh-lji adusirã fãrã di zori, cã avea fricã di populu s-nu lji agudea cu chetri. 27 Ashãtsi lji adusirã shi lji bãgarã nãintea al Sinedriu. Arhipreftul lji ntribã: 28 "Nu vã ursim cu aspru s-nu nvitsats tu atsea numã? Ia, voi avets umplut Ierusalemlu cu nvitsãtura a voastrã sh-cãftats s-cadã pri noi sãndzili a omlui atsilui." 29 Petrul sh-apostulji lj-apãndisirã: "Prindi s-ascultãm Dumnidzãlu ma multu dicãt oaminjlji. 30 Dumnidzãlu a pãrintsãlor a noshtri nyie Isusul, tsi voi lu vãtãmatã spindzurãnda tu lemnu. 31 Dumnidzãlu u anãltsã tu nandreapta a lui sh-lu featsi Prints sh-Ascãpãtor tra s-lji da al Israel mitãnjiusirea sh-ljirtarea a amãrtiilor. 32 Noi him martiri trã aesti zboari deadun cu Duhlu Sãmtu, tsi Dumnidzãlu lã-l-deadi atsilor tsi ascultã elu." 33 Cãndu avdzãrã aesti, elji s-nãrãirã multu sh-minduirã s-lji vãtãma. 34 Ma un Fariseu cu numa Gamaliel, nvitsãtor di Lege sh-tinjisit di tut populu, si sculã tu Sinedriu sh-ursi s-lji scoatã nafoarã apostulji di putsãn chiro. 35 Deapoea lã dzãsi atsilor tu Sinedriu: "Bãrbats Israelits! Minduits-vã ghini trã atsea tsi va s-fãtsets cu aeshti oaminji. 36 Nãinti di aesti dzãli si sculã Teuda, dzãcãnda cã eara vãrã. Anvãrliga di nãsu s-adunarã multsã bãrbatsi, aproapi patru suti. Elu s-vãtãmã sh-tuts atselji tsi lu urma s-arãspãndirã sh-nu armasi tsiva. 37 Dupã atsea, tu dzãlili di reghistrari a popului, si sculã Iuda Galileanu tsi astrapsi dupã nãsu mults oaminji. Elu s-vãtãmã sh-tuts atselji tsi lu avea urmat s-dipãrtarã. 38 Trã atsea mini vã dzãc: Stats diparti di aeshti oaminji sh-alãsats-lã s-fugã, cã macã planul aestu icã aestu faptu easti di la oaminji, va si s-dãrãmã. 39 Ma, macã easti di la Dumnidzãlu, nu putets s-lu dãrãmats, cã va vã aflats tu alumtã contra a Dumnidzãlui!" Elji lu ascultarã zborlu a lui. 40 Deapoea lji acljimarã apostulji, lji bãturã sh-lji ursirã s-nu greascã tu numa al Isus shi lji sãlãghirã. 41 Ashãtsi apostulji fudzirã di Sinedriul tutã harauã, cã s-lugursirã axiusits tsi trapsirã arushinarea trã numa al Isus. 42 Cathi dzuã tu templu sh-pri cãsi, nu pãpsea s-nvitsa shi s-predica hãbarea atsea buna cã Isusul easti Hristolu.