1 Dupã tsi Pavlu sh-sotslji a lui avea tricut prit Amfipoli sh-prit Apolonia, agiumsirã Sãruna iu eara sinagoga a Iudeilor. 2 Pavlu, dupã adetea a lui, intrã tu sinagogã sh-di trei Sãmbãti arada cuvinta cu nãshi trã Scriturili, 3 dimãndãnda sh-alihipsãnda a lor cã Hristolu prindea s-munduia sh-si nyeadzã dit mortsã, dzãcãnda: "Aestu Isus tsi mini vã dimãndu easti Hristolu." 4 Niscãntsã di elji s-cãndãrsirã shi s-dusirã dupã Pavlu sh-Sila, sh-ashãtsi featsirã un numir mari di elinji tsi avea fricã di Dumnidzãlu sh-niscãnti muljeri avdzãti. 5 Ma altsã Iudei zilipsirã sh-adunarã niscãntsã oaminji anapudzi dit pãzari, scularã unã multsãmi sh-mintirã cãsãbãlu. Ambulisirã casa al Iason sh-cãfta Pavlu sh-Sila tra s-lji scutea nãintea a popului. 6 Dupã tsi nu lji aflarã, trapsirã azvara Iasonul sh-niscãntsã frats nãintea a mãrlor a cãsãbãlui, aurlãnda: "Atselji, tsi au mintitã tutã lumea, vinirã sh-aoa. 7 Iasonul lji ghini-ashtiptã aeshti. Tuts aeshti lucreadzã contra a dimãndãrilor a Cesarului, dzãcãnda cã easti un altã amirã, Isusul." 8 Elji tulburarã populu sh-mãrlji a cãsãbãlui, cai avdzãrã aesti zboari. 9 Mãrlji a cãsãbãlui, dupã tsi si siguripsirã di Iasonul sh-di altsãlji, lji sãlãghirã. 10 Atsea noapti fratslji trãoarã nchisirã Pavlu sh-Sila Veria. Macãt agiumsirã aclo, s-dusirã tu sinagoga a Iudeilor. 11 Aeshti Iudei eara ma tinjisits dicãt atselji di Sãruna sh-lu apruchearã zborlu cu vreari mari. Cathi dzuã sitãxea Scriturili, tra s-videa macã aesti lucri eara di alihea. 12 Trã atsea multsã di nãshi pistipsirã, deadun cu niscãnti muljeri elini avdzãti, sh-mults bãrbatsi. 13 Ma, cãndu Iudeilji di Sãruna avdzãrã cã Pavlu avea dimãndatã zborlu a Dumnidzãlui sh-tu Veria, vinirã sh-aclo tra s-tulbura shi s-mintea multsãmea. 14 Atumtsea fratslji sh-surãrili nchisirã trãoarã Pavlul cãtrã amari, iarã Sila sh-Timoteu armasirã aclo. 15 Atselji tsi sotsãsea Pavlul, lu dusirã pãnã Athina. Deapoea s-turnarã cu dimãndãciunea tsi Sila sh-Timoteul s-njidzea la nãsu cãt ma curundu.

16 Iarã Pavlu ma lji ashtipta Athina, s-nvirinã multu, vidzãnda cãsãbãlu mplinã di idolji. 17 Elu cuvinta tu sinagogã cu Iudeilji sh-cu pãngãnjlji cai avea fricã Dumnidzãlu, sh-cathi dzuã tu pãzari cu atselji cai s-afla aclo. 18 Niscãntsã filosofi Epicurei shi Stoici zbura cu nãsu. Sh-niscãntsã ntriba: "Tsi dzãtsi aestu dãrdãros?" Sh-alantsãlji dzãtsea: "Aestu nji si pari cã easti dimãndãtor a xenjilor dumnidzadz." Cã Pavlu ma dimãnda hãbarea atsea buna al Isus sh-nyearea. 19 Atumtsea luãnda lu dusirã tu Areopag, sh-lu ntribarã: "Putem si shtim tsi easti aestã nvitsãturã noauã di cai tini zburashti? 20 Nã asunã ca idei ciudioasi ti urecljili a noastri, trã atsea vrem sã shtim tsi vor s-dzãc aesti." 21 Tuts Athineilji sh-xenjilji cai bãna aclo, tritsea chirolu avdzãnda shi spunãnda vãrã zbor nou. 22 Atumtsea Pavlu, stãtu nãintea a Areopaglui sh-dzãsi: "Bãrbats Athinei! Mini ved cã voi hits multu pistimenji tu itsido. 23 Imnãnda anvãrliga di cãsãbã sh-mutrinda lucrili a voastri atseali sãmti, mini aflai un altar iu eara scriat: ‘A Dumnidzãlui atsilui nicunuscut.’ Atselu tsi voi lu alãvdats fãrã s-lu cunushtets, mini ma vã lu dimãndu. 24 Dumnidzãlu tsi adãrã lumea sh-itsido tsi esti tu nãsã, easti Domnu a tserlui sh-a loclui sh-nu bãneadzã tu templi adrati di mãnjili a omlui. 25 Elu nu si huzmitipseashti di mãnjili a oaminjlor, canda s-avea ananghi di tsiva, cã elu lã da a tutulor banã, duh sh-itsido. 26 Dumnidzãlu ari faptã di un singur om tuti fãrili a oaminjlor, cai s-bãneadzã tu tut loclu, sh-arãdãpsi chirolu sh-sinurli a loclui iu va bãna elji. 27 Dumnidzãlu vru tsi oaminjlji s-lu caftã shi s-lu aflã, cu tutã cã elu nu easti diparti di cathiunu di noi. 28 Tu nãsu bãnãm, imnãm sh-existãm, di cum au dzãsã sh-niscãntsã di poetslji a voshtri: ‘Cã sh-noi him cilimenjlji a lui.’ 29 Sh-metsi him cilimenjlji a Dumnidzãlui, nu prindi s-minduim cã natura dumnidzeascã easti ca furia sh-ca asimea, icã ca cheatra pilichisitã di masturlji sh-di tehnea a lor. 30 Dumnidzãlu tsi nu bagã oarã chirolu a nishtiriljei, tora lji ursi tuts oaminjlji iutsido s-mitãnjiuseascã. 31 Cã elu ari apofãsitã dzuã tu cai va s-giudicã lumea cu ndriptati prit un om cai ari arãdãpsit. Aestã lã u-ari alihipsitã a tutulor cu nyearea a lui dit mortsã." 32 Cãndu avdzãrã di nyearea a mortsãlor, niscãntsã apãrnjirã s-pizueascã, iarã altsã dzãsirã: "Noi va ti ascultãm dinou trã aestã." 33 Ashãtsi Pavlu s-dipãrtã di mesea a lor. 34 Niscãntsã di elji s-dusirã dupã Pavlu sh-pistipsirã tu Domnul, ntrã atselji eara Dionisul aeropaghitul, unã muljeari tsi s-acljima Damara sh-niscãntsã altsã.