1 Tu Cesarea eara un om cu numa Cornel. Elu eara tsenturion a cohortãljei tsi s-acljima Italica. 2 Corneliu eara datã cãtrã Dumnidzãlu sh-avea fricã di nãsu deadun cu Fumealja a lui. Elu dãdea multu dicunji a popului shi s-ruga dipriunã a Dumnidzãlui. 3 Un mirindi, anvãrliga di oara trei, vidzu limpid tu unã viziuni un anghil al Dumnidzãu cai intrã la nãsu sh-lji dzãsi: "Corneliu!" 4 Elu ncãrfusi ocljilji cu fricã sh-lu ntribã: "Tsi easti, Doamne?" Anghilu lj-apãndisi: "Rugãciunjili sh-dicunjãli a tali au agiumtã nãintea al Dumnidzãu sh-elu ti adusi aminti. 5 Pitreats tora ndoi bãrbatsi tu Ioppa la Simonul tsi s-acljeamã Petrul. 6 Elu sheadi la Simon tãbãcarlu cai lu ari casa ningã amarea." 7 Cãndu s-dipãrtã anghilu tsi grãi cu nãsu, Corneliu acljimã doi di huzmichearlji a lui sh-un suldat dumnidzãsit di atselji tsi lj-shãdea totãna aproapi. 8 Dupã tsi lã aspusi itsido lã pitricu tu Ioppa.

9 Alantã dzuã cãtrã njeadzã-dzuã iarã elji ma imna sh-ma lji s-apruchea a cãsãbãlui, Petrul s-alinã tu taratsã anvãrliga tra s-ruga. 10 Elu avea foami sh-vru s-mãca. Iarã atselji di casã ma lj-ndridzea mãcarea, elu s-arãchi tu extazã. 11 Atumtsea vidzu tserlu discljis sh-unã ca pãndzã mari ligat tu patruli pãrtsi cai ma dipuna cãtrã nãsu pri loc. 12 Tu pãndzã s-afla tuti soili a nimaljilor cu patru cicioari, azvãrnitorilji a loclui sh-puljilji a tserlui. 13 Atumtsea s-avdzã unã boatsi cai lj-dzãsi: "Scoalã-ti Petro! Talji sh-mãcã!" 14 Iarã Petrul dzãsi: "Nu, vãrãoarã Doamne. Mini nu am mãcat vãrãoarã tsiva lãvushitã sh-nicuratã." 15 Boatsea lj-dzãsi nãpoi di a doaua oara: "Nu li acljeamã nicurati atseali tsi Dumnidzãlu li curã." 16 Atsea undzi trei ori, sh-apoea dinãoarã pãndza s-alinã nãpoi tu tser. 17 Iarã Petrul ma s-minduea s-aduchea cã tsi eara viziunea tsi avea vidzutã, agiumsirã oaminjlji pitricuts di Corneliu. Elji ntribãnda s-apruchearã la poartã sh-aflarã casa al Simon. 18 Deapoea acljimarã sh-ntribarã macã stãtea aclo Simonul tsi s-acljima Petru. 19 Iarã Petru ma s-minduea ninga di viziunea, Duhlu lji dzãsi: "Simon, trei oaminji ma ti caftã.* 20 Scoalã-ti sh-dipunã-ti, duti cu nãshi shi s-nu eshti niapofãsitã, cã mini lji pitricui." 21 Petrul dipunã la atselji bãrbats sh-lã dzãsi: "Mini escu atsel tsi cãftats. Cãtse avets vinitã?" 22 Elji lj-dzãsirã: "Corneliu, tsenturionlu, easti om ndreptu sh-ari fricã di Dumnidzãlu. Trã nãsu zburashti ghini tutã fara a Iudeilor. Un anghil sãmtu lj-dzãsi s-ti acljeamã la casa a lui shi s-avdã tsi ai s-lji dzãts a lui." 23 Atumtsea Petrul lji acljimã s-intra shi s-sheadã tu atsea casã. Tu alantã dzuã Petru s-dusi cu nãshi sh-niscãntsã di fratslji pistimenji di Ioppa lu sotsãsirã.

24 Unã dzuã ma nãpoi agiumsirã tu Cesarea. Corneliu ma ashtipta sh-avea acljimatã aproapilji sh-oaspilji a lui scunchi. 25 Cãndu intrã Petrul, Corneliu lj-ishi nãinti sh-lji cãdzu la cicioari tra s-lu adora. 26 Ma Petrul lu sculã shi lj-dzãsi: "Scoalã-ti! Sh-mini om escu." 27 Cãndu ma grea cu Corneliu, Petrul intrã nãuntru sh-aflã multsã oaminji adunats. 28 Atumtsea lã dzãsi: "Voi shtits cã trã un Iudeu easti contra a legiljei si sotsãseascã icã s-intrã tu casa a unui xen. Ma Dumnidzãlu mi-ari nvitsat tra s-nu lj-dzãc a vãrui om nicurat icã lãvushit. 29 Trã atsea vinj fãrã ncuntrari cãndu pitricut oaminji s-nji greascã. Tora ma vã ntreb, cãtse mi acljimatã?" 30 Corneliu apãndisi: "Patru dzãli ma nãinti, tamam tu aestã oara, tu oara trei cãndu ma mi rugam tu casa a mea, ni-ashtiptat s-fãnirusi nãintea a mea un om nviscut cu stranji lunjinoasi. 31 Elu nj-dzãsi: ‘Cornel! Dumnidzãlu u ari ascultatã rugãciunea a ta, tutashã sh-dicunjili a tali s-adusirã a minti nãintea a Dumnidzãlui. 32 Trã atsea, pitreats oaminji tu Ioppa sh-caftã Simonul tsi s-acljeamã Petru. Elu easti tu casa al Simon tãbãcarlu ningã amari.’ 33 Atumtsea mini trãoarã pitricui oaminji la tini sh-tini fãtsesh ghini tsi vinish. Tora noi him tuts nãintea a Dumnidzãlui tra s-avdzãm tuti atseali tsi Dumnidzãlu ts-ari ursit."

34 Atumtsea Petru apãrnji s-greascã: "Dealihea ma aduchescu cã Dumnidzãlu nu tsãni om cu hãtãri.✝ 35 Caitsido di tuti fãrili tsi ari fricã Dumnidzãlu sh-fatsi atsea tsi easti ndreptu, easti ghini-ashtiptat di Dumnidzãlu. 36 Voi lu cunushtets zborlu tsi Dumnidzãlu lj-ari dat a popului al Israel, predicãnda evanghelu a paciljei prit Isus Hristos. Elu easti Domnul a tutulor. 37 Voi shtits cã tsi undzi tu tutã Iudea, apãrnjinda di Galilea, dupã pitedzlu tsi dimãndã Ioanul. 38 Voi shtits cum Dumnidzãlu ari aumtã Isusul di Nazaret cu Duhlu Sãmtu sh-cu puteari, cai tricu tut loclu fãcãnda ghini sh-vindicãnda tuts atselji cai eara putut di draclu, cã Dumnidzãlu eara cu nãsu. 39 Noi him martiri trã tuti lucrili tsi featsi elu tu Iudea sh-tu Ierusalem. Elji lu vãtãmarã spindzurãnda pri lemnul a crutsiljei, 40 ma tu dzua a treia Dumnidzãlu lu nyie dit mortsã sh-lu featsi tsi s-hibã vidzut, 41 nu tu tut populu, ma la noi, cai earam alepts di Dumnidzãlu ca martir tsi mãcãm sh-bium cu nãsu dupã tsi s-nyie dit mortsã. 42 Isusul nã ursi s-predicãm a popului shi s-mãrtirsim cã Dumnidzãlu ari bãgat atsel ca giudicãtor a yiilor sh-a mortsãlor. 43 Tuts prufitsilji mãrtirsescu trã nãsu sh-dzãcã cã caitsido tsi pistipseashti la nãsu ljea ljirtarea a amãrtiilor prit numa a lui." 44 Iarã Petrul ma grea ninga, Duhlu Sãmtu dipunã pristi tuts atselji tsi lu asculta. 45 Pistimenjlji anvãrliga-tãljeats cai avea vinit cu Petrul s-ciudisirã cã doara a Duhlui Sãmtu s-virsã sh-pristi pãngãnjlji, 46 sh-lji avdza grãinda tu alti limbi sh-multumãrirã Dumnidzãlu. Atumtsea Petrul dzãsi: 47 "Poati vãrã s-dãnãseascã apa, tsi nu s-pãteadzã aeshti cai loarã Duhlu Sãmtu ashã di cum sh-noi?" 48 Deapoea lã ursi s-pãteadzã tu numa al Isus Hristos. Atumtsea elji lj-cãftarã a Petrului tsi s-armãnea ninga niscãnti dzãli.