1 Saulu avea aprovat vãtãmarea al Stefan.

Tu aestã dzuã s-featsi unã priaĝuniri mari contra a bisearicãljei tu Ierusalem, sh-tuts s-dipãrtarã prit locurili a Iudeiljei sh-a Samariiljei. Mash apostulji nu fudzirã. 2 Niscãntsã oaminji dumnidzãsits lu ngruparã Stefanul sh-plãmsirã cu boatsi ti nãsu. 3 Iarã Saulu ma aspãrdzea bisearica, intrãnda casã di casã trãdzea azvara bãrbats shi muljeri sh-lji bãga tu hapsi.✝

4 Ghini-ma atselji cai eara arãspãndits njidzea iutsido anvãrliga dimãndãnda zborlu a Dumnidzãlui. 5 Filipul dipunã tu cãsãbãlu al Samarii sh-predicã a lor Hristolu. 6 Cãndu multsãmea tutã lu avdzã Filipul shi vidzu seamnili tsi elu fãtsea, elji lj-bãgarã oarã ma multã a zboarilor tsi elu dzãtsea. 7 Duhuri nicurati cu boatsi analtã ishea di la oaminji, sh-multsã paralizats shi shcljiochi s-vindicarã. 8 Ashãtsi tu atsel cãsãbã fu unã harauã mari.

9 Tu atsel cãsãbã bãna un om cu numa Simon cai fãtsea mãyii sh-lji ciudisea oaminjlji di Samaria, sh-dzãtsea cã eara om mari. 10 Tuts, di la marli pãnã la njiclu bãga mintea la zboarili a lui dzãcãnda: "Aestu om easti Putearea al Dumnidzãu acljimat Mari." 11 Elji bãga mintea a zboarilor a lui, cã di multu chiro lji avea ciudisitã cu mãyiili a lui. 12 Ma, cãndu lj-pistipsirã al Filip tsi ma dimãnda Evanghelu a amirãriljei al Dumnidzãu sh-numa al Isus Hristos, s-pãtidzarã bãrbats sh-muljeri. 13 Atumtsea pistipsi sh-idyiul Simon. Dupã tsi s-pãtidzã, stãtu cu Filipu shi s-ciudisea vidzãnda seamnili sh-faptili atseali mãri tsi fãtsea elu. 14 Cãndu apostulji tu Ierusalem avdzãrã cã Samaria avea aprucheatã zborlu a Dumnidzãlui, pitricurã aclo Petrul sh-Ioanul. 15 Elji s-dipunarã shi s-rugarã tra s-apruchea Duhlu Sãmtu, 16 cã la vãrã di atselji di Samaria nu avea vinit Duhlu Sãmtu. Elji mash eara pãtidzat tu numa a Domnului Isus. 17 Atumtsea Petrul sh-Ioanul bãgarã mãnjili pristi nãshi sh-elji loarã Duhlu Sãmtu. 18 Cãndu Simonul vidzu cã Duhlu s-deadi prit bãgarea a mãnjilor a apostuljilor, lã deadi a-lor pãradz 19 dzãcãnda: "Dats-nji sh-a njia aestã puteari, tsi pristi atsel tsi va s-bagã mãnjili, elu s-ljea Duhlu Sãmtu." 20 Ma Petrul lj-dzãsi: "S-cherã tini deadun cu pãradzãlji a tãlji, cã tini minduish cã pots s-amintsã cu pãradz doara a Dumnidzãlui! 21 Tini nu ai parti shi soarti tu atsel lucru, cã inima-a ta nu easti ndreaptã nãintea a Dumnidzãlui. 22 Mitãnjiusea-ti di atsea anapudii a ta shi roagã-ti a Domnului, vahi ti ljearti ti atsea tsi ai tu inimã. 23 Cã ved cã tini eshti mplin cu amãreatsã sh-ligat di amãrtii." 24 Atumtsea Simonul lj-apãndisi: "Rugats-vã a Domnului ti mini, tra s-nu nji undzeascã tsiva di atseali tsi nj-dzãtsesh." 25 Dupã tsi Petrul sh-Ioanul avea mãrtirsit sh-avea predicat zborlu a Domnului, elji s-turnarã tu Ierusalem, predicãnda hãbarea atsea buna la multi hoari a Samariiljei.

26 Un anghil a Domnului lj-dzãsi al Filip: "Scoalã-ti shi du-ti cãtrã sud tu calea tsi dipuni di Ierusalem cãtrã Gaza." Atsea easti unã cali shcretã. 27 Filipul si sculã sh-fudzi. Aclo elu vidzu un eunuc Etiopian, un om ufitsial al Candachei, amirãroanjea Cushitã. Elu tsãnea ayishtearea a ljei sh-avea vinit trã alãvdari la Ierusalem. 28 Tora ma s-turna shidzãnda tu cãrutsa a lui sh-cãntãnda cartea al prufitu Isaia. 29 Atumtsea Duhlu lj-dzãsi al Filip: "Du-ti la cãrutsã shi stãi aproapi di nãsã!" 30 Filipul s-dusi trãoarã la cãrutsã sh-avdzã atsel cãntãnda prufitul Isaia sh-lu ntribã: "U aducheshti atsea tsi ma cãntsi?" 31 Elu lj-dzãsi: "Cum pot s-aduchescu mini ma nu mi agiutã vãrã?" Dupã aestã acljimã Filipul tra s-alina shi-s shidea la cãrutsã ningã nãsu. 32 Loclu a Scrituriljei tsi elu ma cãnta eara aestã:

"Elu s-dusi ca oaia trã tãljeari,

ca un njel tsi pãpsi nãintea a tundeariljei,

sh-elu nu u discljisi gura.

33 Tu tãpinusirea a lui lj-alipidarã ndriptatea.

Cai poati s-greascã trã dupãyinitorlji a lui?

Cã bana a lui s-tãlje tu mesi pri loc."✝

34 Eunuclu ntribã Filipul: "Dzã-nji, trã cai ma greashti prufitul aoa? Trã nãsu icã trã vãrã altu?" 35 Atumtsea Filipul discljisi gura ahurhinda di aestã Scriturã sh-elu aspusi hãbarea atsea buna trã Isusul. 36 Cãndu ma imna, agiumsirã tu un loc iu avea apã sh-eunuclu dzãsi: "Ia, aoa ari apã. Tsi mi ncheadicã mini tra s-mi pãtedz?" 37 [Filipul lj-dzãsi: "Ma s-pistipseashti cu tutã inimã, pots s-u fats." Sh-elu apãndisi: "Mini pistipsescu cã Isus Hristolu easti Hiljilu a Dumnidzãlui."]* 38 Elu ursi s-chindrueascã cãrutsa. Filipul sh-eunucul s-dusirã la apã sh-Filipul l-pãtidzã. 39 Cãndu ishirã di apã, Duhlu a Domnului u arãchi trãoarã Filipul sh-eunuclu nu l-vidzu ma. Deapoea fudzi tu calea a lui mplinã di harauã. 40 Filipul s-aflã tu Azot, sh-imnãnda pri cali predica hãbarea atsea buna la tuti cãsãbadzli pãnã cãndu agiumsi tu Cesarea.