Marcos 11

Intrarea al Isus tu Ierusalem

1 Tora cãndu s-apruchearã di Ierusalem, cãtrã Betafaghe sh-Betania, ningã Muntili a Masnjilor, Isusul pitricu doi di ucenitsilji a lui, 2 dzãcãnda: "Imnats tu hoara di nãintea a-voastrã, sh-macãt s-intrats aclo, va s-aflats un gumãric ligat, tsi vãrã nu lji-ari ncãlicat. Dizligats-lu sh-adutsets-lu la mini. 3 Sh-macã vãrã vã-dzãtsi: ‘Cãtse ma fãtsets ashã?’, apãndisits-lji: ‘L-hãrzãeashti Domnul. Elu va lu-toarnã trãoarã aoa.’" 4 Elji s-dusirã shi aflarã gumãriclu ligat aproapi di unã ushã, pri cali sh-u-dizligarã. 5 Niscãntsã di atselji tsi eara aclo lã dzãsirã a lor: "Tsi fãtsets? Cãtse dizligats gumãriclu?" 6 Aeshtsã l-apãndisirã ashã cum lã avea dzãsã Isusul sh-elji lji alãsarã s-fugã. 7 Atumtsea lji-adusirã al Isus gumãriclu, bãgarã pri supru mantelul a lor sh-elu shidzu pristi nãsu 8 Multsã oaminji ashtirna stranjili a lor pri cali sh-alantsãlji tãljea dedzi di ponji sh-li arca pri cali. 9 Sh-cum atselji tsi njidzea nãinti, sh-atselji tsi yinea dupã Isusul, aurla sh-dzãtsea:

"Hosana!*11:9 Hosana-vrea s-dzãc, Alãvdari a Dumnidzãlui.

Ghinicuvintat easti atsel tsi yini tu numa a Domnului!

10 Ghinicuvintat easti amirãriljea al David, tatãl a nostru tsi yini tu numa a Domnului.

Hosana tu locurili multi analti!"

11 Ashã intrã Isusul tu Ierusalem sh-tu templu. Sh-dupã tsi vidzu ghini itsido, bãgã oarã cã eara amãnat, ishi deadun cu doisprãdzatslji cãtrã Betania.