Vaefesu 1

Paulo akuvasukila vanu va Efeso

15 Kwakuva iyo nene kuhuma pendipulike udikilo venu mu Mtwa Yesu na lukelo lwenu kwa vanu vonda va Nguluvi, 16 sendilekile kuvasukila kwa Nguluvi, ndikuvawuwika kila pendikumsuka Nguluvi. 17 Ndikumsuka Nguluvi va Mtwa vetu Yesu Kilisito, Daada mkomi avagavile muhe va uginyange na lya ugubutulo neke muvese kumchela hilo. 18 Ndikumsuka Nguluvi agubutule numbula chenu chivese kulola welu vake, muveche kuchela yila ludikilo veavakemelie na ukomi va fupo veavavikile vanu vake, 19 muveche kuchela umwimike vake veugehe mkomi hilo kwakuva lya nefwe vetukuidikila. Umwimike uwu ugita kasi mugati lyetu ngita ludali lula lukomi hilo, 20 akumchulubucha Kilisito, akamkaliche lubali lwake lwa liwoko lya ndewo. 21 Ukoya kukwanya Kilisito itavala kila mtavala na kila filongochi, utavala pakyanya lya kila kinu kyekigehe na umwimike, mwene ndi mkomi kuchumba ludali lolonda lwevakuginya vanu vonda. Mwene utavala filongochi va nondee vevagehe muinyi na vala muinyi yeikwacha. 22 Nguluvi akavikile kila kinu filongochwe na Kilisito akamgavile kila kinu na kumgita atavale finu fyonda kwakuva lya lipinga lya vanu vevamwidikiye Kilisito. 23 Lipinga lya vanu vevamuidikiye Kilisito ndi mvili gwake, kangi ndi lukwilo lwake mwene nde ikwilichwa kila kinu.