1 Yesu peakali ahumila pa Kaye lya Nguluvi yumwi va vachulila vake akamlongie, "Muwulanichi, lole miganga haga na kaye hichi gigehe manofu mno!" 2 Yesu akahigile akalonga, "Be, wilola kaya hichi ngomi? Kwahela hata liganga limwi yelisigila pakyanya lya lingi, kila kinu kitunyulwa."

3 Yesu peakali ekalile pakyanya lya kidunda va Miseituni kuno elolela pa Kaye pa Nguluvi, Peteli na Yakobo na Yohani na Andelea vakamuhucha peagehe weka, 4 "Tulongele njowo hichi gihumila panili? Kimanyilo liki kiwonesa kuva njowo hichi chigehe pepi kutimila?"

5 Yesu akavalongela, "Mwilolele, mubihile kuchangwa na munu yeyonda. 6 Kwakuva volofu vekwacha kwa litawa lyangu, kila yumwi yelonga kuva, ‘Nene nde Kilisito!’ Navo vekuvachanga vanu volofu. 7 Pempulike kyowo gya fita pepi na lupwepo lwa fita kwa pautali, mbihile kwogofya, njowo hichi gitakilwa kuhumile, ila mwiso wula wave kufikila. 8 Vanu va inyi limwi vakwitova na vanu va inyi lingi, ung'achale wimwi utovana na ung'achale wungi, kila pono kuvecha na chiyigayiga na lumyai. Njowo haga ndi ngita ng'eng'enda lya kubaba mwana."

9 Ila nyenye mwilole. Vanu vikuvasindika pidamo na kuvatovanga pa Kaya lya kutang'anila Vayawudi. Mwisindikwa pautalo lya filongosi na vang'achale kwakuva lya nene, neke mvese kuvalongele Njowo Nofu cha Yesu. 10 Ila yitakilwa Njowo Nofu idalikwe tandi kwa vanu va inyi yonda kabula lya kigono kya mwiso kwacha. 11 Navo pevabatile na kuvasindika pidamo, mbihile kwogopa mwilonga liki. Saa yila payifikila, mlonge kyokyonda kyemgavilwa kwakuva senyenye yemwiilonga, ila Muhe lya Nguluvi. 12 Lukolo akumkanila lukolo vake adochwe, daada akumkanila mwana vake, vana navo vakuvalema vasasi vawo na kuvadocha. 13 Vanu vonda vekuvavipila nyenye kwakuva lya nene. Ila yeanifumilila mbaka kumwiso ndiye yeiwokolewa.

14 Pamuwonela kinu kyeakukivipila Nguluvi kiimile sepono lyake, mkwimbaji na achele mana lyake, baho vale vevagehe Yudea vanyilie pafidunda. 15 Yeagehe kukyanya lya kituvili lya kaye abihile kwika kwiingila mukaye mwake kunyamula kinu. 16 Yeagehe kumgunda abihile kuwuya kukaye kutegula mwenda vake. 17 Mwilava nye vadala vevali na lisololo na yevakukong'elecha vana figono ifyo! 18 Msuke kwa Nguluvi neke njowo hulu lubihile kuhumila chipindi va ng'ala. 19 Kwakuva chipindi hugo kuvecha na utatala ambayo seihumile kuhuma pamwandi Nguluvi pawumbile inyi mbaka neng'uli, vala seihumila kangi.

20 Ngita Mtwa ngaabihile kupwamsa figono ifyo kwahela munu ngawokolilwe. Ila kwa vala vanu yeavahaguwe, Mtwa apwamse figono ifyo. 21 "Suwe munu akivalongela, ‘Lole, Kilisito yeahaguliwe na Nguluvi agehe baha,’ awu ‘Agehe pala,’ mubihile kudikila. 22 Kwakuva vihumila vakina Makilisitu yesevahaguliwe na Nguluvi va na vavichi va udesi, vikugita fimanyilo na umunyitu kwa ajili lya kuvachanga ngita ivesekana hata vala yeavahaguwe Nguluvi. 23 Ila nyenye mujilole. Nene ndivalongie makani gyonda kabula segahumie.

24 "Suwe, figono ifyo, peuchumbile utatala hilyo, lichuwa livikwa kisi na mwechi seulangacha. 25 Nondwa chigua kuhuma kulifunde, na ludali cha kulifunde chihogoseka." 26 Bawo vekumlola Mwana va Munu ikwacha mulifunde kwa ludali chingi na ukomi. 27 Naye hekuvalagicha vandumindumi va kuluhano vavalundise vanu vevahaguliwe na Nguluvi kuhuma palubali chonda chitai cha inyi, kuhuma kumwiso va inyi mbaka kumwiso va luhano.

28 "Mulolele libiki lya mtini na mwifundise uwanganicho hugu. Pemuwonile mimagwa lyake gyevanga kuva lideke na kuhomola mikwati, mwichela kuva chipindi va mabenelo upepi. 29 Fifyo ifyo na nyenye pemuwonile finu ifyo pefihumila muchele kuva Mwana va Munu agehe pepi mno. 30 Ndikuvalongela ndakyene, kilelo hichi sekichumba mbaka finu ifyo fyonda pefihumila. 31 Luhano na inyi fichumba, ila malichwi gya nene segachumba ng'odo.

32 "Ila kigono na saa kwahela yeyonda yeachele, vala vandumindumi va kuluhano kwa Nguluvi, vala Mwana, ila Dadi weka hela yeachele. 33 Mwilole na mwiwope, kwakuva semchele chipindi hugo ufikila pandili. 34 Ivecha ngita munu yeahega kukaye kuhelela kumagendo akivalekela vanyegendwa vake kuhilolela kaye, kila yumwi na kasi lyake na akamlongie na mdimaji va mlyangilo ave mewo. 35 Mwiwope kwakuva semchela mwene kaye ewuya pandili, kuva palumie awu mwilogati awu mbungamie awu pamilau. 36 Mwiwope neke achile gafula abihile kuvalola muvasile. 37 Lila lendivalongela nyenye, ndikuvalongela vanu vonda, mwiwope!"