1 Iyi ndi Njowo Nofu lya Yesu Kilisito, Mwana va Nguluvi. 2 Ivangile ngita peisimbilwe pa kiganulo cha mvichi va Nguluvi yeikemelwa Isaya,

"Nguluvi alongile ndikumlagicha mnanzi vangu akulongole yumwene,

akugalanichile ng'asi lyako.

3 Lichwi lya munu ikemela kuwelu,

‘Mumgalanichile ng'asi lya Mtwa,

mgolole pono peichumbila!’"

4 Yohani mbatisaji ahumile kuwelu, akavadalikila vanu na kuvabatisa akilonga kuva muleke sambi chenu na Nguluvi avahechelele sambi. 5 Vanu kuhuma inyi yonda lya Yudea na vanu vonda kuhuma pamwani va Yelusalemu vamweleliye Yohani, vakahongecha sambi chawo na kuvabatisa pa mgoka Yolidani.

6 Yohani akali afwalile mwenda weugelanichilwe kwa magala ga mwang'oko yeikemelwa ngamiya na lufunga va ngwembe mu kigudi. Kyakulia kyake kikali midedema na luki. 7 Akavadalikiye vanu, "Kuhuma nene ekwacha munu yeali na umwimike mkomi mno. Nene sendidikilwa kugundama na kuwopola ndegei cha mikobasi gyake. 8 Nene ndikuvabatisa kwa malenga, ila mwene akuvabatisa kwa Muhe lwa Nguluvi."

9 Figono fila, Yesu achile kuhuma Nasaleti, mwani va ku Galilaya, akabatiswa na Yohani mu mgoka Yolidani. 10 Yesu peakali ihuma mumalenga, awene luhano idindwike na Muhe lwa Nguluvi ukwika ku kyanya lyake ngita ng'unda. 11 Na lichwi yapulise kuhuma kuluhano, "Veve Mwana vangu yendikukelie, ndikeliwe nave."

12 Bahobaho alongwichwe na Muhe lya Nguluvi kuhelela kuwelu, 13 akalile ukoya figono Alobaini peigechwa na Setani. Ukoya kukali na vang'oko va kudasi, navo ndumindumi va kuluhano va Nguluvi vakali vakimuhudumila.

14 Yohani peabatilwe na kudindilwa mu kiwopo, Yesu akahele inyi lya Galilaya, avangile kudalika Njowo Nofu lya Nguluvi, 15 akilonga, "Vakati ufikile, na ung'achale va Nguluvi upepi. Muhongeche na kwidikila Njowo Nofu lya Nguluvi!"

16 Yesu peakali ichumba mumbali lya lihiva lya Galilaya, avawene valowa somba vavili Simoni pamwinga na Andelea lukolo vake vilowa somba kwa wafu.Munu ilowa somba kwa wafu 17 Yesu akavalongie, "Mwache kwa nene na nene ndikuvagita nyenye kuvaleta vanu kwa nene ngita valowa pevileta somba." 18 Bahobaho vakaleka nyafu chawo, vakamfuatile.

19 Peahele pautalo ludodo, akamwene Yakobo na Yohani, vana va Sebedayo. Navo vakali muwato, visambula nyafu chawo. 20 Bahobaho, Yesu akavakemelie, navo vakamleka daada vawo Sebedayo mu wato pamwi na vachulila, vakahele kwa Yesu.

21 Yesu na vachulila vake vakahele mbaka kumwani Kapelinaum. Pekifikile kigono kya kutulula, Yesu ayingie kaye lya kutang'anila Vayawudi, akavanga kudalika. 22 Vanu vala vevampulike vakadudwive mno, na madaliko gyake, kwakuva akali akidalika ngita munu mwene umwimike vala se ngita vawulanichi vawo va Malagicho.

23 Baho munu munya lihoka akaingile mukaye lya kutang'anila Vayawudi, 24 yula lihoka akabwatile, "Wikela kutugitila liki, veve Yesu va Nasaleti? Wuli, vachile kutuhananga? Ndichele veve ani, veve ndi Mng'alili va Nguluvi!"

25 Yesu akamkanile yula lihoka, akilonga, "Yigale, muwege uyu munu."

26 Yula lihoka amuhogosile kwa ludali kuno ibwatuka, akamuhega. 27 Vanu vonda vadudwive, vekwiwucha, "Ichi njowo liki? Wuli, ndi mawulanichi mamiya? Munu uyu ali na umwimike va kuvaswitilicha mihoka, navo vekumpulika" 28 Makani ga Yesu chikapulise kisatu kila pono ponda ku Galilaya.

29 Bahobaho pevahumile mu kaye lya kutang'anila Vayawudi, Yesu pamwinga na Yakobo na Yohani vakahele mbaka kaye lya Simoni na Andelea. 30 Maye yumwi, mganafu va Simoni, akali pa ulili evawuwa ng'ali, vamlongie njowo cha Yesu. 31 Ndena Yesu akahelela kwa yula mtamwa, amkoliye akamwinamula na kumwinamula. Ila kuvauwa kwahumile, akamnachiche naye ivangile kuvatelekela.

32 Palumie peifikile na lichuwa pelidibie, vanu vakavasindika vatamwa vonda kwa Yesu na vala yevali na lihoka. 33 Vanu vonda va mwani ula vilundise pautalo lya kaye. 34 Yesu akavaponya vanu volofu vevali na utamwa gya yaina gyolofu. Akavahecha mihoka gyolofu, ila akavakanile havo mihoka vabihile kulonga kwakuva vamchele mwene ndi ani.

35 Nyolasagala, Yesu akalamka, akahele pamfiyo, kumsuka Nguluvi. 36 Simoni na vayage vakahele kumsaka. 37 Peva vamwene, vakamlongie, "Vanu vonda vekukusaka."

38 Yesu akavalongie, "Tubite pa mwani pangi pa pepi neke ndivese kudalika ukoya, kwakuva ndachile kwa hago."

39 Ndena akachungutila inyi lya Galilaya yonda, kuno akidalika pa Kaye lya kutanganila Vayawudi na kuhecha lihoka.

40 Munu yumwi akali na ukalavilo akahelela kwa Yesu, akafugamile na kumlongela, "Peukela, wiwesa kuning'alila!"

41 Yesu akamwonile lusungu, agonjue liwoko lyake, akambyalisa na kumlongela, "Ndikela kung'alila!" 42 Bahobaho ukalavilo ukamuhuma munu yula, kang'ala. 43 Baho Yesu akamlongie abite kisatu na akamlongie, 44 "Lole bihile kumlongela munu yeyonda njowo hulu, ila uhelele kuwoneka kwa mtekechi na ukahumiche usembe kwa Nguluvi ngita pealagiliche Musa, kwa kung'alila kwa veve, iveche uswida kwa vanu vangi."

45 Ila yula munu akahelela avangile kulonga njowo chila chonda, mbaka Yesu akalemwile kwingila ku mwani na kuwoneka kwa vanu, akali akukala pono kuhela vanu. Ndena vanu vakali vahelela kuhuma kila pono.