1 Pekichumbile Kigono kya Kutulula, na peifikile kinyolasagala kigono kya kwanja kya juma, Malia va Magidale na yula Malia yungi vakahelela kulola lila likabuli. 2 Bahobaho likahumila lihogoseko likomi lya inyi, Ndumindumi va kuluhano kwa Nguluvi akahele kulikabuli na akalibilingisa lila liganga akakalile. 3 Akaonekine ngita welu na myenda gyake ikali mivalafu pee. 4 Vadima va lila likabuli vakatetema kwa wogofi mkomi, ata vakali ngita vafuwe.

5 Ila yula ndumindumi va kuluwano kwa nguluvi vakavalongile vala vadala, "Nyenye mbihile kwogofya! Ndichela mkumsaka Yesu yeavambilwe pakipindilihicho. 6 Kwihela baha kwakuva achulubwike ngita peavalongile. Mwache mpalole pono peakali avasile. 7 Suwe, muhelele kisatu mkavalongele vachulila vake kuva achulubwike, nondee akuvalongola kula ku Galilaya, ukoya damukumlola. Muwuwike aga gyendikuvalongela."

8 Ndeni vadala vala vakahegile kisatu palikabuli, kuno vememile na wogofi na lukeduko mkomi, vakanyilile kuhelela kuvalongela vachulila vake.

9 Bahobaho, Yesu akatang'ana navo, akalonga, "Kamwene." Vadala avo vakamuhegeliye vakamfugamile pautalo lyake, vakakolela magulu gyake. 10 Baho Yesu akavalongela, "Mbihile kwogofya! Muhelele mukavalongele lukolo vangu vahelele Kugalilaya, ukoya vakundilola."

11 Vala vadala pevakali vihelela, vamonga vadima vevakali vidima lila likabuli vakahelela mumwani kuvalongela Vatekechi vakomi njowo chonda chechikahumile. 12 Suwe, Vatekechi vakomi vatang'anile pamwi na filongochi va Vayawudi na vagitile mupango vakavagavila vala vapuga sendi cholofu, 13 vakilonga, "Nyenye mwing'ang'wa kulonga ndeni, ‘Vachulila vake vakachile pamiye, vakamuhicha nefwe tukali tuvasile.’ 14 Na ngita mtavala va Kilumi agite kuchela njowo ichi, nefwe twiywanga nave na kuvadima nyenye semwipata nongwa." 15 Vala vadima vakanyamula chila sendi, vakagitile ngita pevalongilwe. Njowo icho chikalutiye kwa Vayawudi mbaka neng'uli.

16 Vala vachulila kyumi na yumwi vakahelela ku Galilaya ku kila kidunda kyeavalagiliche Yesu. 17 Pevamwene vakamfunya, ila vangi vakali sevidikila kuve ndakyene ndi Yesu. 18 Yesu akavahegeliye pepi, akavalongie, "Ndigavilwe umwimike vonda kuluhano na painyi. 19 Ndeni, muhelele mukavagite vanu va inyi yonda vaveche vachulila vangu, mukivabatisa kwa litawa lya Daada na lya Mwana na Muhe va Nguluvi. 20 Muvawulaniche kukolele makani gyonda gyendivaswitiliche nyenye. Ndakyene nene ndigehe pamwi na nyenye kigono kyonda mbaka kumwiso va inyi."