1 Yesu peagawene mapinga gya vanu, akakang'ie pakidunda, peakalile panyi. Vachulila vake vakamuheleliye, 2 mwene akavangile kuvawulanicha.

3 "Vafunyilwe vala vevikwichela kuva seviwesa kwikala ngajila Nguluvi,

kwakuva Ung'achale va Kuluhano ndi vawo."

4 "Vafunyilwe vevagehe na luswigimo,

kwakuva Nguluvi davanamachwa."

5 "Vafunyilwe vala vafokomasi,

kwakuva davihala inyi."

6 "Vafunyilwe vala vevali na njala na ng'elu lya kugita gyeikela Nguluvi,

kwakuva Nguluvi dakuvagwitisa."

7 "Vafunyilwe vala vevakuvawonela vangi lusungu,

na Nguluvi davawonelwa lusungu."

8 "Vafunyilwe vala vevakumjuma Nguluvi kwa numbula chawo chonda,

kwakuva davamwene Nguluvi."

9 "Vafunyilwe vala vevivika lutengamaso,

kwakuva davakemelwa vana va Nguluvi."

10 "Vafunyilwe vala vevigudwa kwa kugita gala gye ing'ang'a Nguluvi,"

kwakuva Ung'achale va Kuluhano nde vawo.

11 "Mfunyilwe nyenye, vanu pedavakuvaliga na kuvagudisa na kuvalongelela njowo cha udesi kwajili ya nene." 12 Muheke na kunemelela kwakuva fupo lyenu ngomi ivikilwe kuluhano kwa Nguluvi. Kwakuva ndeni peikali kwa vanu vevakali vakuvaguda vavichi va Nguluvi vevakali valonguwe pautalo lyenu.

13 Yesu akalongile, "Nyenye ndi munyo lya inyi. Ila munyo ikiyaga unofu vake wigita wuli neke ikole kangi? Se ivecha nofu kangi, ila itagwa kwivala na kukinywa na vanu.

14 "Nyenye ndi welu va inyi. Mwani weuchengilwe pakidunda se uvecha kwifiya. 15 Kwihela munu yeikwasa taa na kugubika kwa kiviya, ila ivika pakyanya pakinu neke kivang'aliche vonda vevagehe mukaye. 16 Ndeni ndeni, welu venu uvalangachile vanu, neke vagawene magito gyenu manofu, vamunjume Daada venu yeagehe kuluhano.

17 "Mubihile kuhocha kuva ndachile kutiligicha malagilicho gya Nguluvi gyeamgavile Musa na mawulanicho gya vavichi va Nguluvi, ila ndachile kulonga undakyene va njowo icho. 18 Ila ndakyene ndikuvalongela, mbaka luhano na inyi dafichumba, ila kwihela ata pono ndodo lya lulagilicho lya Musa, daihechwa, mbaka fyonda fyefisimbilwe fihumile. 19 Ndeni, munu yeyonda daseidikila ata lulagilicho limwi ndodo kuchumba chonda na kuvawulanicha vangi vabihile kwidikila uyo daivecha mdodo hilo muung'achale va kuluhano kwa Nguluvi. Ila yula daikuchidikila na kuvawulanicha vangi, uyo daivecha mkomi muung'achale va kuluhano kwa Nguluvi. 20 Ndikuvalongela, mwing'ang'wa muidikile malagilicho ga Nguluvi geamgavile Musa kwa unofu kuchumba vala Vawulanichi va malagilicho na Vafalisayo. Ngita dasemgita ndeni, dasemwingila ng'odo muung'achale va kuluhano kwa Nguluvi.

21 "Mukapulike vanu vadaha pevalongilwe kuva, Ubihile kudocha munu! Na munu yeyonda daidocha munu, daihigwa." 22 Ila nene ndikuvalongela, yeyonda yeakumvipila lukolo vake, ing'ang'wa kuhigwa. Yeakumbeda lukolo vake daisindikwa mulidamwa kuhigwa. Na yeyonda daikumliga lukolo vake kuva, mpufi ing'ang'wa kwingila mulyoto seuchima mbepali. 23 Suwe, peuhecha usembe vako pakitangavala kya maganga na peuwiwuka kuva mkolo vako agehe na ndewo na veve, 24 uleke usembe vako pautalo lya kitangavala kya maganga, uhelele tandi kunjengakaya na lukolo vako, pambele uwuye ukaheche usembe vako.

25 "Mnjengekaye kisatu na mlata vako pemgehe mung'asi kuhelela kuludamwa. Neke mlata vako abihile kukusindika kwa mhiga nongwa na mhiga nongwa akusindika kwa mpuga na dauvikwa mukiwopo. 26 Ndakyene ndikulongela, daseuhuma mula mbaka uhombe sendi lya mwiso."

27 "Mukapulike kuva vanu vakalongilwe, mubihile kugita ugoni!" 28 Ila nene ndikuvalongela, daikumlola mdala kwa kumdobokela, agonile nave suwe munumbula lyake. 29 Suwe, liho lyako lya liwoko lya ndewo likugitile ugite sambi, likule ulitage kutali. Ngiba veve uyagiche kinu kimwi mumvili vako kuliko muvili vako vonda kutagwa mulyoto seuchima mbepali. 30 Ngita liwoko lyako lya ndewo likugitile ugite sambi, udumule ukatage kutali. Ngiba uyagiche kinu kimwi mumvili vako, kuliko mvili vako vonda utagwe mulyoto seuchimika mbepali.

31 "Ikalongilwe kuva, munu yeyonda yeakumleka mdala vake, ing'ang'wa amugavile baluwa lya kwileka." 32 Ila nene ndikuvalongela, munu yeyonda seing'ang'wa kumleka mdala vake kwa nongwa lyolyonda lila, ila kwa nongwa lya ugoni hela. Na munu dakumleka mdala vake kwa nongwa lyolyonda lila akumgita mdala aveche mgoni. Na munu yeyonda daimtola mdala uyo namwene igita ugoni.

33 "Kangi mupulike kuva vanu vadaha vakalongilwe, ngita uvikile ujangile kwa Nguluvi, wing'ang'wa kugita gala gyeujangile." 34 Ila nene ndikuvalongela, mubihile kwilapa, iveche kuluhano kwa Nguluvi, kwakuva ndikigoda kya ung'chale va kuluhano kwa Nguluvi, 35 vala mubihile kwiyilapila inyi, kwakuva ndi pono pakuvikila magulu ga Nguluvi na mubihile kwilapa kwa Yelusalemu, kwakuva ndi mwani va Mng'achale mkomi. 36 Kangi ubihile kwilapa kwa kituwe kyako, kwakuva seuvesa kuugita ufwili vako uveche uvalafu awu utitu. 37 Ukilonga, ena iveche ena ukilonga, hamu Iveche hamu. Kyokyonda dakigina kihuma kwa yula muwofu.

38 "Mupulike kuva ilongilwe, munu akikulemecha liho na veve mlemache liho lyake na munu akikulemacha lino lyako na veve mlemache lino lyake." 39 Ila nene ndikuvalongela, ubihile kuwisa kisasi kwa munu yeakugitile nongwa. Munu peakutova licheche lya liwoko lya ndewo, msedukile na lya upili. 40 Munu yeakusindika kuludamo kusaka kukunyamulila ligwanda lyako, mleke anyamule na koti lyako. 41 Munu peakuswitilicha kunyamula mchigo vake kilomita imwi veve nyamule kilomita chivili. 42 Yeakusuka mgavile, ubihile kumkacha munu yeikwacha kukuachima kinu.

43 "Mupulike kuva ikalongilwe, mkele mganja vako na kumvipila mchundamwa vako." 44 Ila nene ndikuvalongela, muvakele vachundamwa venu na kuvasukila kwa Nguluvi vala vevakuvagudisa nyenye, 45 neke muveche vana va Daada venu yeagehe kuluhano. Kwakuva mwene akuvang'alichila lichua lyake vanu vawofu na vanofu na kuvatonyela ndonya vanu vevigita makani gegikumkelesa na vala sevigita makani segikumkelesa. 46 Damwipata fupo liki kwa kuvakela vala vevakuvakela nyenye hela? Kwihela! Kwakuva ata vadumula usulu vigita ndeni! 47 Ngita mukuvagitila manofu vemukuvachela hela, wuli, damukuvagina liki? Ata vanu sevakumchela Nguluvi vigita ndeni. 48 Suwe, mubihile kupwemukilwa na kyokyonda ngita Daada venu va kuluhano seapwemukilwe na kyokyonda.