1 "Mwilolele mubihile kugita finu fyenu finofu pautalo lya vanu neke avanjume. Kwakuva pemugita ago, Daada venu yeagehe kuluhano seakuvagavila fupo."

2 "Suwe peukumtanga muhangala, ubihile kwilandula kwa vanu. Mubihile kugita ngita vafyangu pevigita mukaye lya kutang'anila Vayawudi na mung'asi neke vanu vavanjume. Ndakyene ndikuvalongela, avo vapatile suwe fupo lyao. 3 Ila veve peukumtanga muhangala, gite ndeni ata munu vako va pepi abihile kuchela. 4 Heche utangilo vako kwa lupwepo na Daada vako va kuluhano yeilola gyegifyamile, daakugavila fupo."

5 "Pemwisuka, mubihile kugita ngita vafyangu. Vene vikela kufunya kuno vimile mukaye lya kutang'anila Vayawudi na palubali lya ng'asi neke vanu vavawene. Ndakyene, ndikuvalongela, avo vawanuke suwe fupo lyao. 6 Ila veve peukumsuka Nguluvi, wingile mukyumba kyako, dinde mlyangilo, baho umsuke Daada vako seiwoneka. Na Daada vako yeilola gyegafyamile, daakugavila fupo lyako."

7 "Pemwisuka kwa Nguluvi, mubihile kubwatuka bwatuka ngita vanu sevakumchela Nguluvi. Kwakuva vene viwocha kuva Nguluvi daavapulikicha kwa njowo chawo chongofu. 8 Mubihile kuvecha ngita vene. Kwakuva Daada venu agachele gyemwisuka ata ngita mwave kumsuka. 9 Suwe, ndeni nde mwing'ang'wa kumsuka Nguluvi,

Daada vetu yeugehe kuluhano,

litawa lyako linjumwe.

10 Ung'achale vake wache.

Lyeung'ang'a kugita ukoya kuluhano gagitwe na baha muinyi.

11 Utugavile neng'uli kyakula kyetu kya kila kigono.

12 Utuhechele nongwa chetu,

ngita nefwe petukuvahechela vevatugitiye nongwa.

13 Ubihile kutugavila magecho,

ila utulowole na yula muwofu.

Kwakuva Ung'achale nde vako na ludali na ukomi mbaka mbepali. Ndakyene."

14 "Kwakuva pemkuvahechela vanu nogwa chawo, Daada venu va kuluhano daakuvahechela na nyenye kangi. 15 Ila ngita semukuvahechela vayenu nongwa chawo, Daada venu sevakuvahechela nyenye lusungu."

16 "Pemwikwikanila kuliya kyakula mubihile kuvecha ngita vafyangu vevikwigita kuva vagehe na lusugwimo na kukikinyala wuso vagita ndena, neke vawoneke pavanu kuva vayikanile kulya. Ndikuvalongela ndakyene, avo vapatile suwe fupo lyao. 17 Ila veve peukwikanila kuliya, bake kituwe kyako mafuta, kalave wuso vako, 18 neke munu yeyonda abihile kuchela kuva uyikanile kuliya, ila uchelwe hela na Daada vako yeseiwoneka. Na Daada vako yeilola gyegyafyamile, daakuvika unofu."

19 "Mbihile kwivikila lusanja baha pa inyi kwakuva pungulusi na kutu vihanaga na vahichi vikwingila na kuhicha. 20 Mwivikile lusanja chenu kuluhano kwa Nguluvi kwihela pungulusi na kutu vakuhananga, vala vahichi sevikwingila kuhicha. 21 Kwakuva kula peugehe lusanja lwako nde peugehe numbula lyako."

22 "Liho nde taa lya muvili. Ngita liho lyako lilola unofu na muvili vako vonda dawuvecha muwelu. 23 Ila ngita liho lyako nde liwofu na muvili vako vonda uvecha mukisi. Suwe, ngita welu wugehe mugati lyako nde kisi, suwe, ilyo nde kisi totolo!"

24 Kwihela munu yeivesa kuvagumbanikila vatwa vavili. Kwakuva ukumvipila yumwi na kumkela yungi awu uvecha pamwi na yumwi na kumbeda yula yungi. Se muvesa kumgumbanikila Nguluvi na finu fyolofu pamwi.

25 "Nde kwakuva ndikuvalongela, mbihile kuvecha na wogofi pakyanya lya kyakulia awu kyakunyuwa fyemung'ang'a neke mwikale. Wuli, kwakulya nde ngiba hilo kuchumba uwumi na myenda nde ngiba hilo kuchumba muvili? 26 Mulole fidege va kukyanya, sevivyala vala sevibena vala vihela lusanja lyolyonda. Ila Daada venu va kuluhano uvagavila kyakulya. Wuli, fidege nde ngiba hilo kuchumba nyenye? 27 Wuli, nde ani pagati lyenu kwakuva lya wogofi mkomi, iwesa kwihongelecha kukala hilo?

28 "Wuli, wigudika kwakuva lya myenda? Mulole uluva va kudasi pegyikula unofu. Segigita kasi vala segihonela myenda gyao. 29 Ila ndikuvalongela, ata ng'achle Sulemani mwene na finu fyake fyolofu seakafwalile unofu ngita limwi lya uluva ulo. 30 Suwe, ngita Nguluvi akulivika makwati kya mgunda, gegagehe neng'uli na kilawu gitagwa paliyoto. Nyenye vanu yemugehe na ludikilo ludodo, wuli, Nguluvi seiwesa kuvagitila ndeni?"

31 "Suwe, mbihile kuvecha na wogofi, twiliya liki? Twinyuwa liki? Twifala liki?" 32 Vanu sevakumchela Nguluvi nde vigudikila ago. Daada venu va kuluhano ichela kuva mwing'ang'a finu ifyo fyonda. 33 Ila, musake tandi ung'achale va Nguluvi na kwikala ngita ikela na ago gyonda damlutichilwa. 34 Suwe, mubihile kuvecha na wogofi kutigila kilawo, kwakuva kilawo ikuyigumbanikila yiyene. Kila kigono kigehe na utatala vake.