1 Baho Muhe va Nguluvi akamlongocha Yesu mbaka kukwelu neke agechwe na Setani. 2 Akadindile kuliya figono alobaini pamunyi na pamiye, pambele njala ikamvavile. 3 Setani akamhelelie Yesu akamlongie, "Ngita veve nde mwana va Nguluvi, galongele maganga aga gaveche mibumunda." 4 Yesu akamuhigile, "Isimbilwe mumasimbo ga Nguluvi,

Munu seakwikala kwa kuliya libumunda hela, ila kwa kila luchowo lyeilonga Nguluvi."

5 Baho, Setani akamlongocha Yesu mbaka ku Yelusalemu, mwani va Nguluvi, akamvikile pakineng'eneng'e lya kaye lya Nguluvi, 6 akamlongie, "Ngita, veve ndi mwana va Nguluvi, witage panyi, kwakuva isimbilwe mumasimbo gya Nguluvi,

Nguluvi akuvalagilicha ndumindumi vake kwajili lya veve,

navo vakukunyamula mumawoko gyao,

ubihile kwikwambadula paliganga."

7 Yesu akamlongiye, "Isimbilwe mumasimbo gya Nguluvi,

Ubihile kumgecha Mtwa, Nguluvi vako."

8 Baho, Setani akamlongocha pakidunda kitali, akamuonesile ung'achale weugehe kuinyi yonda na unofu vake, 9 akamlongie, "Fyonda ifi dandikugavila ngita dakunifugamila na kunifunyila." 10 Baho, Yesu akamlongie, "Hege baha Setani! Isimbilwe mumasimbo ga Nguluvi,

Umfunye Mtwa Nguluvi vako na kumfunya Nguluvi weka hela."

11 Suwe, Setani akamleka na ndumindumi va Nguluvi vakahachile kumtanga.

12 Suwe, Yesu peapulike kuva Yohani vamvikile mukiwopo akahelelie ku Galilaya. 13 Akahegile Nazaleti, akahelela kwikala mumwani lya Kapelinaum veugehe pawipi na inyanza lya Galilaya, mumbaka va inyi lya Zabuloni na Nafutali, akalile ukoya. 14 Neke litimiye lila luchowo lyelilongilwe na Isaya mvichi va Nguluvi kuva,

15 "Inyi lya Zabuloni na Inyi lya Nafutali,

chigehe mung'asi lya kuhelela ku lihiva kumwambo lya mgoka Yolidani,

Galilaya inyi lya vanu se Vayahudi!

16 Vanu vevikalile mukisi

vauwene welu mkomi.

Navo vala vevikalie muinyi lya kisi na vene wogofi va kufuwa,

welu uvang'alichile!"

17 Kuhuma baho Yesu akavangile kudalika kuno akilonga, "Muhongeche sambi chenu, kwakuva ung'achale va kuluhano ugehe pepi!"

18 Yesu peakali igenda mung'umbung'umbu lya lihiva Galilaya, akavawene vakolo vavili valowa somba, Simoni yeikemelwa Peteli na Andelea yeakali lukolo vake, vakali vilowa somba kwa nyafu mulihiva. 19 Yesu akavalongie, "Mwache, nene ndikuvagita muniletele vanu ngita valowa somba pevileta somba pakaye." 20 Bahobaho vakachilekile nyafu chao na vakamfuatile Yesu.

21 Peahele pautalo padodo, akavawene vakolo vangi vavili, Yakobo na Yohani, vana va Sebadayo. Avo vakali mugati lya wato pamwi na daada vawo Sebedayo. Vakali visambula nyafu chawo. Na Yesu akavakemela, 22 bahobaho vakamleka daada vawo mu wato, vakahele kwa Yesu.

23 Yesu akali ihelela kila pono lya mwani va Galilaya, akiwulanicha mukaye lya kutang'anila Vayahudi, kuno idalika Njowo Nofu cha ung'achale va Nguluvi, akavananicha vatamwa na kila ayina lya matamwa gyegakali kwa vanu. 24 Njowo chake chikalutala pono ponda ku inyi lya Silia. Vatamwa vonda vene matamwa gya kila iyina na vala vevagudile. Vevitamika mihoka na vene kilibisi na vanu vevali vatenda vakasindikwe kwa Yesu na akavananiche vonda. 25 Mapinga golofu gya vanu kuhuma ku Galilaya na Dekapoli na Yelusalemu na Yudea na kumwambo lya mgoka Yolidani, gakamufatile.