1 "Yesu akahendelele kulonga, chipindi icho, ung'achale va kuluhano dahuwana na vahinja kyumi vevanyamuwe taa chawo, vakahele kumlola mtwa va lihungu. 2 Vahanu mugati vawo vakali vapufu na vahanu vakali na luhala. 3 Ila vala vapufi vakanyamula taa chawo, ila sevakanyamule mafuta ga kuhongelecha pambele. 4 Ila vala vene luhala vakanyamule taa chawo na mafuta gangi mulibochobocho. 5 Kwakuva yeitola akachelewile kwacha, vala vahinja vonde vakavanga kusinjila, vakavasile.

6 "Mulogoti kukali na kyowo, ‘Mlole yula pala yeitola ikwacha muhelele mukamlole!’ 7 Baho vala vahina vonda vakalamwike na kuvika unofu taa chawo. 8 Vala vapufi vakavalongela vala vene luhala, ‘Tusuka mafuta gyenu kidodo kwakuva taa chetu chichimile.’ 9 Ila vala vene luhala vakavalongela, ‘Segitosa kwa nefwe na nyenye! Ngiba muhelele muduka mukagule gyenu!’ 10 Ila vala vahinja vapufi pevaheliye kugula mafuta, yeitola akafikile, vala vahinja vene luhala vakaingila pamwi na mwene mukaye lya yeitola, baho vakadindile mlyangilo. 11 Pambeli vala vahinja vangi vakaachile, vakakemela, ‘Mtwa, Mtwa, tudinduliye!’ 12 Ila mwene akavahigile, ‘Ndikuvalongela ndakyene sendivachela nyenye.’" 13 Kangi Yesu akalonga, "Mwilolele! Kwakuva semuchele kigono vala lisaa."

14 "Chipindi icho daivecha ngita munu yumwi yeikela kugendela kumwambo, akavakemeliye vachwindama vake na kuvagavila finu fyake fyonda. 15 Akamgavile kila munu kuwana na umwike vawo, yumwi sendi talanta chihanu, yungi talanta chivili na yungi talanta imwi, baho akahegile. 16 Baho, yula yeagavilwe sendi talanta chihanu akagitile kasi na akapatile fwaida talanta chihanu. 17 Ndeni ndeni, na yula yeagavilwe talanda chivili akapatile fwaida talanta chivili. 18 Ila yula yeagavilwe talanta imwi akahele, akagimile lilindi pamganga akafiile sendi lya mtwa vake."

19 Pevichumbile figono fyolofu, yula mtwa kawuya, akavangile kulola mavalilo gya kutumila gya mapato gya sendichake. 20 Mnyigendwa yeagavilwe fisako fya sendi chihano, akaachile kuno aletile fisako fingi fya sendi chihanu, akamlongela, Mtwa, ukanigavile fisako fya sendi chihanu, ndeni ndipatile fisako fingi fya sendi chihano fyefihongeleke. 21 Mtwa vake akamlongela, ugitile unofu hilo. Veve ndi mnyigendwa msanzi na mndakyene! Kwakuva ukali msanzi kwa makani madodo gendikakugavile, nondee, dandikuvika muhumilichi va finu fyangu fyonda fyolofu, wache tukeduke pamwi. 22 Mnyigendwa yeagavilwe talanta chivili akaachile, akahumicha talanta chivili faida. Nyamule talanta chivili kuchumba nde faida nikapatile. 23 Mtwa vake akamlongela, ugitle unofu hilo. Veve mnyigendwa msanzi kangi ndi mndakyene! Kwakuva ukali mndakyene kwa makani madodo, nondee dandikuvika uveche muhumilicha mufinu fyangu fyolofu. Vache ukeduke pamwi! 24 "Ila yula yeagavilwe msako wumwi va sendi akachile, akalonga, ‘Mtwa, ndichela veve nde munu mng'ali, veve ubena pono seuvyalile na kulundasa mabenelo seukamiliche. 25 Ndikaogwipe kuyagicha msako va sendi vako, ndikahelele kusila msako va sendi vako mumganga. Nondee, nyamule msako va sendi vako ugu.’ 26 Mtwa vake akamlongela, veve nde mnyigendwa semnofu na mgata! Uchela kuva nene ndibena pono sendivyalile, na kulundasa pono sendimichiche? 27 Ikakung'ang'ile kuvinikila msako vangu va sendi mulusanja neke pendiwuya ndipatile msako vangu va sendi na wungi veuhongeleke! 28 Nondee, mumnyage ichi sendi ukamgavile yula mwene talanta kumi. 29 Kwakuva, yeali na kinu igavilwa na kulutichwa. Ila yeihela kinu ata kila yeanakyo inyagwa. 30 Na mumtage mnyigendwa uyu mnjanganifu ukoya daivemba na kusigina mino.

31 "Chipindi Mwana va Munu peikwacha muukomi vake na vandumindumi vonda vakiva pamwi na vene, baho daikwikala pakyanya lya kigoda kyake kya ukomi, 32 inyi chonda dachilundasa pautalo lyake na mwene dakuvanenga vanu ngita mkwamila akuvanenga kondolo na mene. 33 Akuvavika kondolo lubali lwa ndewo na mene lubali lwake lwa nyingi. 34 Kangi ng'achale akuvalongela vala vevagehe lubali vake va ndewo, mwache nyenye nyemfunyilwe na Daada vangu, muwanuke ung'achale veuvikilwe kuhuma peiumbilwe inyi. 35 Kwakuva ndikali na njala mukanigavile kya kuliya, ndikali na ng'elu nyenye mkanigavile malenga, ndikali mgenji nyenye mukandiwanuke, 36 ndikali ufula, mukanifyalise mwenda, ndikali mukiwopo na nyeye mukachile kunilola. 37 Baho, avo vanu va sanzi davakamuhigile ng'achale, ‘Mtwa, nde paliki tukakuwena ungehe na njala na nefwe tukakugavila kyakula, awu uveche na ng'elu nefwe tuka kugavila malenga? 38 Nde paliki tukakuwene mgenji na nefwe tukakupokela, awu bila mwenda nefwe tukakugaviye mwenda. 39 Nde paliki tukakuwene ukali mtamwa awu ukali mukiwopo tukachile kukulola?’ 40 Ng'achale dakuvahiga, ‘Ndakyene ndikuvalongela, kila kinu kyemumgitile yumwi va ava lukolo vangu vadodo vevakunifwata nene, mukanigitile nene!’

41 "Kangi akavalongile vala vevagehe lubali vake va nyigi, muhege pautalo lyangu nyenye nyemukanilwe na Nguluvi! Muhelele pa lyoto lya mbepali yeawuvikile Setani na vandumindumi vake. 42 Kwakuva ndikali na njala na nyenye semukandigavile kyakuliya, ndikali na ng'elu nyenye semukandigavile malenga. 43 Ndikali mgenji nyenye semukandiwanuke, ndikali mtamwa na ndikali mukiwopo nyenye semwachile kunilola.

44 "Baho vene vakumuhiga, ‘Mtwa, pandili nefwe tukakuwene ukali na njala awu ng'elu awu ukali mgenji awu ukali uhela mwenda awu ukali mtamwa awu munu yeagehe mukiwopo na nefwe setukutangile?’ 45 Namwene akuvahiga, ‘Ndikuvalongela ndakyene, kila pemwikana kumtanga yumwi va ava vadodo, mukakanile kunitanga nene.’ 46 Nondee, ava vihelela mumagudo ga mbepali, ila vala vasanzi vihelea mu uwumi va mbepali."