1 Yesu akang'iye wato na kuhagama lihiva kuwuya peakali akwikala. 2 Baho, vanu vakamsindikile munu yumwi munya lugaso, agonichwe mukitefu. Yesu peawonile kudikila kwa vene, akamlongiye munu yula munya lugaso, "Mwana vangu wuyikangache! Ulekilwe sambi chako." 3 Vamonga va vawulanichi va malagilicho vakavangile kuhocha, "Uyu munu akumliga Nguluvi!"

4 Ila Yesu akagachele mahocho gyawo, akavahuchile, "Wuli, muhocha mawofu munumbula chenu? 5 Nde liki kyekigehe kipefu kulonga, ‘Ulekilwe sambi chako awu kulonga,’ ‘Wime ugende?’ 6 Ndeni ndisaka mchele kuva Mwana va Munu agehe na umwimike baha pa inyi va kuvawonela lusungu sambi." Baho akamlongie uyo munu munya lugaso, "Wime, nyamule kitefu kyako na helele kukaye lyako!"

7 Yula munu munya lugaso akaimile, akahela kukaye lyake. 8 Vanu vonda vevakali mulipinga pevawene ago, vakadudwive na kuwogofya, vakamnjumile Nguluvi yeavagavile vanu umwimike ngita ugo.

9 Yesu akahegile pala na peakali igenda, akamwene munu yumwi yeikemelwa Matayo mdumula usulu, ikalile paofisi. Suwe, Yesu akamlongiye, "Wache."

Matayo akaimile, akahelela kwa Yesu.

10 Yesu akahele kuliya kyakulya mukaye lya Matayo. Vakaingiye vadumula usulu volofu na vene sambi na kwikala pamwi na Yesu na vachulila vake. 11 Vafalisayo pevawene ago, vakavahuchile vachulila vake, "Wuli muwulanichi venu iliya pamwi na vadumula usulu vene sambi?"

12 Yesu akavapulikile, akalonga, "Vanu sevitamika sevakumkela mlami, ila vevakumkela mlami ndi vala vevitamika. 13 Ila muhelele mukayiwulaniche njowo ichi. ‘Ndisaka lusungu vala seusembe va kunyanya.’ Kwakuva sendachile kuvakemela vanu vanofu, ila vene sambi."

14 Baho, vachulila va Yohani mbatisa vakamuheleliye Yesu na kumuhucha, "Nefwe na Mafalisayo tuyikanila kuliya mala cholofu, kwa liki, vachulila vako seviyikanila kuliya?"

15 Yesu avahigile, "Wuli, vagenji va mtwa va lihungu vavecha kukivilicha chipindi vagehe pamwi na mtwa va lihungu? Hamu! Ila chipindi chikwacha cha kuhechwa mtwa va lihungu pagati lyawo, baho nde vakwikanila kuliya.

16 "Vanu sevihonela kipapi kya mwenda mya mumwenda veusakiye. Kwakuva, kipapi ikyo kimya kidemula mwenda veusakiye na pala pepademwike pahongeleka.Kipapi kidemula mwenda 17 Kuhela vanu vevivika difwayi miya muliloboto lya ngwembe lihofu. Ngita davagita ndeni, liloboto lya ngwembe dalidemwika na difwayi isukuka, fyonda fidemwika likwanangika. Ila vanu uvika difwayi miya muliloboto lya ngwembe limiya na fyonda fivili, dafivecha unofu."

18 Yesu peakali ilonga ago, mpuga yumwi Myahudi akafikile, amgundamile na kulonga, "Mwihinga vangu afue nondee. Ila chonde tuhelele ukamvikile liwoko lyako nave ivecha wumi." 19 Yesu akahegile pamwi na vachulila vake, vakamfwatile.

20 Bahobaho, mdala yumwi yeakali na liholovela kwa chipindi cha miyaka kumi na givili, akachile kumbele lya Yesu, akambyalise mwenda vake. 21 Akagitile ndeni kwakuva akahochile munumbula lyake, "Pendimbyalisa hela mwenda vake, dandinana." 22 Yesu akaseduka, peamwene akamlongiye, "Muhinja, unamache udikilo vako ukunaniche." Bahobaho mdala akananile.

23 Yesu peafikile mukaye lya yula kilongochi va vapuga, akafikile na akawene vatova ngalapi na lipinga lya vanu likivilicha, 24 akalongile, "Muhege baha! Muhinja uyu seakafuwe, avasile ng'ani." Vene vakamuhekile. 25 Suwe, lipinga lya vanu pelihechilwe, Yesu akaingile mugati na kumkolela liwoko yula muhinja na akanamuka. 26 Njowo chila chikalutala muinyi yila yonda.

27 Yesu akahegile baha na peakali igenda vanu vavili vagaya meho vakamfuatile kuno viyova, "Utuwonele lusungu Mwana va Dawudi!" 28 Yesu peingile mukaya, vanu vavili vagaya meho, vakamuhelelie na mwene akavahuchile, "Wuli, mwikwidikila kuva ndivesa kuvagitila njowo ilyo?" Vene vakamhigile, "Ndakyene, Mtwa." 29 Baho, Yesu akagabyasile meho gyao, akalongile, "Iveche ngita pemukwidikila." 30 Meho gyao gakadinduliwa. Yesu akavakanile, "Mbihile kumlongela munu yeyonda njowo ichi." 31 Ila vene vakahegile, vakahele kulandula njowo cha Yesu muinyi ila yonda.

32 Vanu avo vavili pevakali vahega, vanu vamonga vakamsindikile Yesu munu yumwi yeseiwesa kuywanga kwakuva akali na lihoka. 33 Bahobaho peahechile lihoka, munu yula seawesile kuywanga akavangile kuywanga. Lipinga lila lya vanu likadudwive na kulonga, "Njowo ngita ichi ndakyene sechikawonike Muisilaeli." 34 Ila Vafalisayo vakalongile "Uyu ihecha mihoka kwa umwimike va lihoka likomi."

35 Yesu akagendile mwani gyonda na fijiji fyonda, akawulanicha mukaye chawo cha Nguluvi, idalika Njowo nofu cha ung'achale va Nguluvi na kuvananicha vatamwa na kila ayina lya fitamwa mugati mwa vanu. 36 Peawawene vanu vagehe mapinga mapinga, akavahonile lusungu kwakuva vafwahile hilo na vakali na wogofi ngita kondolo vevihela mkwamilaji. 37 Baho, akavalongiy e vachulila vake, "Mabenelo ndi gyolofu, ila vagita kasi nde vakefu. 38 Suwe, mumsuke yeagehe na mabenelo alagiliche vachulila vabene mabenelo gake."