1 Kigono kikila Yesu akahumile mukaye yila na ikaliye mng'umbong'umbo lya inyanza. 2 Lipinga likomi lya vanu likamuchungutile, Yesu akakang'ie muwato na ikalile na vanu vonda vakahimile mung'umbung'umbu lya lihiva, 3 mwene Yesu akavalongiye njowo cholofu kwa mufano.

"Mpulikiche! Mgima akahele kuvyala mbeyu. 4 Peakali ivyala mbeyu mumgunda, chingi chikaguwe mung'asi, fidege fyachile na kuliya. 5 Chingi chikaguwe pa mganga veugehe pakyanya lya liganga. Chikamelile kisatu kwakuva mganga ukali sewolofu. 6 Pelihomue lichuwa, chika gamile kwakuva midadikwa gyake gikali segikahikile panyi. 7 Chingi chikaguwe pamibiki gya mihomi, nagyo mihomi gikakulile na kugikekenecha mimelo. 8 Mbeyu chingi chikaguwe pamganga munofu, mimelo gyake chikababile, chingi miya imwi, chingi sitini na chingi selasini."

9 Yesu akamalile kwa kulonga, "Yeagehe na masigichi na apulike!"

10 Vachulila vake vakamuhelelie, vakamuhuchile, "Wuli ulonga na vanu kwa mifanu?" 11 Yesu akavahigile, "Nguluvi avagavile nyenye umwimike va kuchichela lupwepo lya Ung'achale vake, ila ava Nguluvi seakavagitile vachele ago gyonda. 12 Kwakuva, munu yeyonda yeachela ung'achale va kuluhano, Nguluvi dakumgita kuchela hilo, ila munu yeyonda yeseichela kutigila ung'achale va kuluhano, Nguluvi dakukihecha ata kila kidodo kyeakukichela. 13 Ndilonga navo kwa mifanu, kwakuva vilolela gyendikugagita ila vakwigita sevilola, vipulikicha kyendiwulanicha ila vakwigita sevipulika, vala sevichela. 14 Kwavene gatimile gala gyealongie mvichi Isaya:

‘Kupulika mwipulika, ila semwipulika.

Kulola mwilola, ila mubihile kulola.

15 Kwakuva luwala va vanu ava chipwemwike,

vadindile msigichi gyao,

vadindile meho gyao.

Vabihile kulola kwa meho gyao,

ngavapulike kwa msigichi gyao,

ngavachele kwa luhala vao,

na kunisedukila, ilonga Mtwa,

nene nganivananiche.’

16 "Yesu akalongile kangi mfunyilwe nyenye, kwakuva meho gyenu gilola na masigichi gyenu gipulika. 17 Ndakyene ndikuvalongela, vavichi na vanu vasanzi volofu vakadobwike kugalola gala gyemkugalola nyenye, ila sevakagawene na vakadobwike kupulika gala gyemugapulika, ila sevakapulike.

18 "Suwe, nyenye mupilike mufano va yula munu yeakahele kuvyala mbeyu. 19 Munu yeyonda yeipulika njowo lya ung'achale va Nguluvi ngajila kuchela awana na chila mbeyu chechiguwe mng'asi. Yula mwofu ikwacha na kunyamula kila kyekivalilwe mnumbula lyake. 20 Ila mbeyu yeigwiliye mganga pakyanya lya liganga ndi mufano va munu yeipulika njowo lya Nguluvi na kulianuka kwa lukelo. 21 Ila seligehe na midadikwa mugati lyake, likwikala kwa ludodo, chipindi kya magudo awu lumyayo pefihumila kwakuva lya njowo ilyo, ikumgita aleke kumdikila Nguluvi. 22 Ila mbeyu yeiguwe pamibiki gya mihomi, ndi mufano va munu yeipulika njowo, ila nyengema cha inyi iyi na ludoboka lwa kuvecha na finu fyolofu hulikekenecha njowo, nave seibaba manunu. 23 Ila mbeyu yeivyalilwe pamganga mnofu nde mufano va munu yeipulika njowo na kuchela, nalyo hubaba manunu, yumwi mia, yungi sitini na yungi selasini."

24 Yesu akavalongie vanu mufano wungi, "Ung'achale va kuluhano uwana na munu yeavyalile mbeyu chinofu pamgunda vake. 25 Ila vanu pevagonile, muchwindama vake akachile, akavyalile mitendya pagati lya mipunga, akahele. 26 Suwe, mimelo peimelile na kuvanga kuhomola, mitendya nagyo gakavanga kuwoneka. 27 Vachulila va yula mwene mgunda vakamuhelelile, vakamlongiye, ‘Mkomi, seukavyalile mbeyu nofu mumgunda vako. Nondee mitendya gihumila kwiya?’ 28 Mwene akavahigile, ‘Mchwindwama nde yeagitile ago.’ Suwe, vachulila vake vakamuhuchila, ‘Wuli, wisaka twelele tukagakule?’ 29 Nave akavahigile, ‘Hamu, mbihile kugakula mitendya, kwakuva pemuvecha mukula mitendya muvecha kukula na mipunga. 30 Muleke ikule pamwi mbaka chipindi kya mabenelo. Chipindi icho ndikuvalongela vabenaji. Mulundase tandi mitendya na mugawope filundofilundo na kunyanywa. Ila mipunga muilundase mkaivike mulusanja vangu.’"

31 Yesu akavalongie vanu mufano wungi, "Ung'achale va kuluhano uwana na mbeyu yeikemelwa haladali yeahechile munu yumwi, akavyalile mumgunda vake. 32 Mbeyu yene ndi ndodo kuchumba mbeyu chonda, ila peimela daivecha umelo mkomi kuchumba mimelo gyonda na kangi daivecha mkomi ngita libiki na fidege vakwacha na kuchenga mumakwati gyake."

33 Yesu akavalongiye mufano wungi, "Ung'achale va kuluhano uwanine na amila yeanyamuwe maye yumwi, ahanganyise na utine va ngano lidebe chivili na nusu, ata utine wonda ukatupile."

34 Yesu akavalongiye mapinga ga vanu ago gyonda kwa mifanu, seavalongiye kyekyonda ngajila kulonga kwa mifanu. 35 Agitile ndeni neke njowo chealongile vavichi chitimile.

"Ndiywanga na nyenye kwa mifanu,

dandikuvalongela makani segavachele kuhuma peihumbilwe inyi."

36 Baho, Yesu akavalekile vala vanu, akaingile mukaye. Vachulila vake vakamuhelelie vakamlongie, "Utulongele ula mufano va mitendya ga mumgunda." 37 Yesu aka valongiye, "Mvyalaji va chila mbeyu chinofu nde mwana va munu. 38 Ula mgunda nde inyi. Chila mbeyu chinofu ndi vanu vala ambavo ung'achale nde vawo, ila gila mitendya ndi vala vanu va yula muwofu. 39 Mchwindama yeavyalile chila mitendeya ndi Setani. Mabenelo nde mwiso va chipindi na vabenaji nde vandumindumi va kuluhano kwa Nguluvi. 40 Suwe, ngita pemulola pemulundasa mitendya na kunyanywa lyoto, ndeni daivecha mwiso va inyi. 41 Mwana va Munu akuvalagilicha vandumindumi vake na vene davalundasa kuhuma muung'achale vake na vala vonda vevakuvagita vanu vangi vagite sambi na vonda vevagita sambi, 42 na kuvataga mulitanuli lya lyoto na ukoya davivemba na kusiginya mino kwa uwafi mkomi. 43 Ila vala vevagitile gala gegakumkelesa Nguluvi, davang'ala ngita lichuwa muung'achale va Daada vao. Mwene masigicha na apulike!

44 "Ung'achale va kuluhano uwanine na lusanja veufiamile kumgunda. Munu yumwi akauwene, akafihile kangi. Akakeduka hilo akahele kugucha finu fyonda fye agehe nafyo, akagulile mgunda wula.

45 "Kangi, ung'achale va kuluhano uwana na mguchaji yumwi yeisaka lulu yimwi nofu. 46 Peapatile lulu yimwi yeigehe na senti ngomi, akahelela kugucha fyonda fyeanafyo na kugula lulu yila.

47 "Kangi, Ung'achale va kuluhano kwa Nguluvi uwana na valowa somba vevakumbile wafu vawo muinyanza ukagomiche somba va kila ayina. 48 Peumemile, valowa vakakwegile kumuhanga, vikalile na kulundasa somba vanofu na kuvavika mundilu na vawofu vakatagile. 49 Ndeni, ivecha chipindi cha mwiso cha inyi ndumindumi va kuluhano kwa Nguluvi davikwacha na kuvanenga vanu vanofu na vanu vawofu, 50 na kuvataga avo vawofu mulitanuli lya liwoto. Ukoya vivemba na kusigina mino."

51 Yesu akahuchile, "Wuli, mchichele njowo ichi chonda? Vakahigile, ena tuchichele." 52 Nave akavalongiye, "Suwe, kila muwulanichi va lulagilicho lya Musa yeagavilwe na Nguluvi yeivecha mchulila va ung'achale va kuluhano uwana na mwene kaya yeihecha palusanja vake finu miya na kuukuu."

53 Yesu peamalile kulonga mifanu igyo akahegile pono baha, 54 akaelela kukijiji kyake. Ukoya akali akuvawulanicha vanu mukaye lya kutang'anila Vayawudi ata vakadudwive, vakalonga, "Munu uyu apatile kwiya uginyange na umwimike uwu va kugita umanyitu." 55 Wuli, uyu se yula mwana va muhongola mibiki? Maye vake se yula yeikemelwa Malia na lukolo vake se Yakobo na Yosefu na Simoni na Yuda? 56 Na vahacha vake vonda sevakwikala baha pamwi na nefwe? Munu uyu apatile kwiya njowo ichi chonda? 57 Vakamkanile.

Ila Yesu akavalongiye, "Ng'achale iginywa kila pono, ila seiginywa muinyi lyake na mukaye lyake." 58 Ndeni, seagitile umanyitu gyolofu kwakuva sevakumwidikila.