1 Suwe, Vafalisayo na vawulanichi va malagilicho gya Nguluvi gyeamgavile Musa vakafikile kuhuma ku Yelusalemu, vakamuheleliye Yesu, vakamuwucha, 2 "Kwa liki, vachulila vako sevidikila mawulanicho chetuwanuke kwa valongochi vetu vadaha? Sevikalawa mawoko ngita peing'ang'wa pevisaka kuliya!" 3 Yesu akavahigile, "Kwa liki, nyenye mwidenya lagicho lya Nguluvi mwidikila mawulanichi gyenu vavene? 4 Kwakuva Nguluvi akalongile, ‘Mvaginye daada vako na maye vako na munu yeyonda yeakumliga daada vake awu maye vake, daidochwa.’ 5 Ila nyenye mwiwulanichwa kuva munu, ngita munu agehe na kinu ngaivesa kumtanga daada vake awu maye vake, ila akilonga Kinu iki kya Nguluvi, 6 suwe, mwilonga munu seing'ang'wa kumuginya daada vake kwa kumtanga kumgavila kinu ikyo! Ndeni mukulibeda luchowo lya Nguluvi kwa kufuwata mawulanichi gyenu vavene. 7 Nyenye vafyangu! Mvichi Isaya akalagule undakyene njowo chenu kuva,

8 ‘Nguluvi ilonga, vanu ava vakuniginya kwa kuywanga hela,

Ila munumbula chao vagehe kutali na nene.

9 Kufunya kwavo seikuvatanga kinu,

kwakuva viwulanicha malagilicho gyegihuma kwa vanu vakihocha kuva ndi mawulanicho gegihuma kwa Nguluvi.’"

10 Yesu akalikemeliye lila lipinga lya vanu, akavalongiye, "Mpulikiche na muchele! 11 Kyekimugita munu abihile kwidikilwa kuvecha pautalo lya Nguluvi sekimwingila mumlomo, ila njowo chiwofu chechikumuhuma mumlomo. Ago nde gakumgita munu abihile kwidikilwa kuvecha pautalo lya Nguluvi."

12 Suwe, vachulila vakamuheleliye na vakamulongiye, "Wuli, wichela kuva Vafalisayo vakavipile pevapulike njowo cheukalongile?" 13 Ila mwene akavahigile, "Kinu kyokyonda sekivyalilwe na Daada vangu yeagehe kuluhano dawikulwa. 14 Muvaleke! Vene ndi vagaya meho na vilongochwa na vagaya meho. Ngita mgaya meho akumlongocha muyage mgaya meho, vonda vavili davigwilia mulilindi." 15 Peteli akalongile, "Tugalanulile mufano ugu." 16 Yesu akalonga ata nyenye semwichela? 17 Wuli, semwichela kuva kila kyekikwingila mulomo huelela mukisololo na pambele kukihecha muchowo? 18 Ila makani gyegihuma mumlomo gihuma munumbula, ago nde gyegikumgita munu abihile kwidikilwa kuvecha pautalo lya Nguluvi. 19 Kwakuva munumbula kuhuma mawocho mawofu gyegikumlongocha munu kudocha na kugita ugoni na nakugita usalati kugita uhichi na kugita udesi na kuliga. 20 Ago nde gakumugita munu abihile kwidikilwa kuvecha pautalo lya Nguluvi. Ila kulya kyakula ngajila kukalawa mawoko segakumgita munu abihile kwidikilwa kuvecha pautalo lya Nguluvi.

21 Yesu akahegile pono baha akahele muinyi chechigehe pepi na mwani cha Tilo na Sidoni 22 Suwe, maye yumwi yeakali Mkanaani yeakwikala pepi na mwani igyo akamueleliye Yesu, amkalongile, "Mtwa, Mwana va Dawudi, ndiwonele lusungu! Muhinja vangu itamika lihoka." 23 Ila Yesu seamuhigile kinu. Vachulila vake vakamuhelelie Yesu, vakamlongie, "Mulongele ahelele kwakuva akutufwata kuno itova kyowo." 24 Yesu akavahigile, "Ndikalagichwe kuvalowola vanu va inyi lya Isilaeli vevagehe ngita ng'ondolo vevayagile." 25 Maye yula achile na akafugamila pautalo lya Yesu, akalonga, "Mtwa, nditange." 26 Yesu akamhigile, "Seunofu kunyamula kyakula kya vana na kuvakumbila mibuwa." 27 Yula maye akahigile, "Ndakyene Mtwa, Ila ata mibuwa gilia masagalilo gyegigua mumesa lya mtwa vao." 28 Baho, Yesu akamhigile, "Maye kudikila kwako nde kukomi, suwe, ugitilwe ngita kye ukela." Yula muhinja vake akananile bahobaho.

29 Yesu akahegile baha akahele muling'umbong'umbo lya lihiva Galilaya, akang'ile pakidunda, ikaliye panyi. 30 Vanu volofu vakamuhelelie na kuvasindika vatenda na vanu ve vagaya meho na vanu taalonga na vangi volofu vevali vatamwa, vakavavikile pautalo lya magulu gake, nave Yesu akavananiche. 31 Lipinga lila lya vanu lika dudwive hilo pevalolile kuva vanu sevakali viywanga vakiywanga, vevakali vatenda vagenda na vevagaya meho vilola, vanu vakamufunya Nguluvi va Isilaeli.

32 Suwe, Yesu akavakemelie vachulila vake, akalonga, "Ndikuvawonela lusungu vanu ava kwa kuva vagehe na nene figono fidatu vihela kya kulia. Sendikela kuvaleka vahelele ngajila kulya, viwesa vachime mung'asi."

33 Vachulila vakamuhucha, "Baha tugehe kudasi twipata kwiya kyakula kya kuvagavila vanu ava volofu?"

34 Yesu akavahucha, "Mugehe na gibumunda gilinga?"

Vakamhigile, "Saba na fisomba fikefu hela."

35 Suwe, Yesu akavalongie lipinga lya vanu vakale panyi. 36 Akaginyamula gila mibumunda saba na fisomba fikefu, akamuhongecha Nguluvi na akafidumula akavagavila vachulila vake, navo vakavagavila vanu mulipinga. 37 Vonda vakaliye, vakagwita. Kangi vachulila vake vakalundise masigalilo vakamemiche findilu saba. 38 Avo vevakalie vakali elufu chitai ngajila kuvalila vadala na vana. 39 Suwe, Yesu akavalaga vanu akakang'ie wato, akahelala pono lya Magadani.