1 Yesu akahegile ku Kaye lya Nguluvi na peakali ihelela, vachulila vake vakamuheleliye, vakamuwonisile Kaye cha Nguluvi. 2 Yesu akavalongiye, "Ndakyene, mwiwesa kugalola aga gyonda! Ndakyene ndikuvalongela, kwihela ata liganga limwi dalisigala baha pakyanya lya lingi, kila kinu dakitunyulwa."

3 Yesu peakali akalile pakidunda kya Misaituni, vachulila vake vakamuheleliye neke vavecha weka hela na kumuhucha, "Tulongele njowo ichi dachihumila pandili? Ndi kimanyilo liki dakiwonesa kwacha kwa veve na mwiso va inyi?"

4 Yesu akavahigile, "Mwilolele munu abihile kuvachanga. 5 Kwakuva volofu davihumila vakilonga kila yumwi kuva, ‘Mwene ndi Kilisito Mkombosi!’ Na davakuvachanga vanu volofu. 6 Damwipulika makani ga fita na lupwepo lwa fita, ila mubihile kuva na nyengema, kwakuva ago ging'ang'wa gahumile, ila mwiso vene wave kufika. 7 Vanu va inyi yimwi vakwitova na vanu va inyi yingi, vanu va ung'achale umwi utovana na vanu va ung'achale wungi. Pono pamonga muinyi dakuvecha na njala na liyighayigha kila pono. 8 Gonda ago ndi ngita lihingili lya kwanja lya kubaba mwana.

9 "Akaendeliye kulonga kangi vakuvahecha neke mgudwe na kudochwa. Inyi chonda chikuvavipila kwakuva lya kunidikila nene. 10 Kangi, vanu volofu davaleka kumdikila Nguluvi, davayivifya na kangi dasevakelana. 11 Baho, davahumila vavichi volofu va udesi davakuvachanga vanu volofu. 12 Kangi lukelo lwa vanu volofu daupwemuka kwakuva lya sambi chihongelike. 13 Ila munu daikwima ukangafu mbaka mwiso kwa kumdikila Kilisito, dailowolwa. 14 Ila peyave kufika mwiso, ichi Njowo Nofu lya ung'achale va Nguluvi dachidalikwa muinyi chonda, ili vanu vonda vaichele."

15 "Suwe, pemwilola lukani lwa kuvipisa lyelileta uhanang'o lihimile mu Kaye lya Nguluvi, ngita pealongile mvichi va Nguluvi Danieli." Suwe, munu yeikwimba ing'ang'wa achele! 16 Suwe, vevagehe ku Yudeya na vanyilile pafidunda. 17 Munu yeagehe kukyanya lya kituvili kya kaye lyake abihile kwika kunyamula kinu mukaye lyake. 18 Yeagehe kumgunda abihile kuwuya kukaye lyake kunyamula mwenda vake. 19 Damwilava nyenye va maye vene lusololo na vevikong'elecha figono ifyo! 20 Musuke neke kunyila kwenu kubihile kuvecha kigono kya ng'ala awu Kigono kya Kutulula! 21 Kwakuva chipindi icho dakuvecha na utatala ukomi weseukahumiye kuhuma peiwumbilwe inyi mbaka neng'uli, vala sedaihumila kangi. 22 Ila Nguluvi achipwemuse suwe figono ifyo kwakuva lya vanu vake yeavahaguwe, ngita Nguluvi ngaseagitile ndeni ngakuhela ata munu yumwi ngailowolwa.

23 "Suwe, kwa figono ifyo munu iwesa kuvalongela, ‘Kilisito agehe baha!’ Awu ‘Agehe kula!’ Mubihile kumwidikila. 24 Kwakuva davahumila va Kilisito vaudesi na vavichi va udesi. Davagita kimanyilo kikomi na umanyitu wongofu gakuvachanga ata kwa vala vevahaguliwe na Nguluvi. 25 Mwilolele! Nene ndivalongele suwe pegave kuhumila makani ago. 26 Suwe, pevakuvalongela, ‘Mulole, agehe kuwelu’, mubihile kuhelela ukoya, awu, ‘Mulole, ayifyamile mukaye,’ mubihile kwidikila, 27 kwakuva, ngita lung'ali lwa mdilimo peung'alicha kuhuma palihumila lichuwa mbaka pelidibalila lichuwa, nde peikwacha Mwana va Munu. 28 Pala peugehe lifimba, vandapu davakwikung'asa baho.

29 "Bahobaho, peusilila utatala mufigono ifyo, Nguluvi daigulambucha lichuwa kuvecha kisi, mwechi navo seung'alicha, na nondwa nacho dachiguwa kuhuma kuluhano na ndeni ndeni Nguluvi daihongesesa ludali cha kuluhano. 30 Baho, daihumila kimanyilo kya Mwana va Munu kuluhano na vanu vonda va inyi davadadava. Kila munu dakumulola Mwana va Munu peikwacha kuhuma mumafunde lya kuluhano akivecha na ludali na ukomi wolofu. 31 Na mwene dakuvalagilicha vandumindumi vake kuno vakitova lingalapi, navo daavalundasa vanu veavahagule kuhuma lubali chonda chitai cha inyi, kuhuma mwiso va luhano mbaka mwiso wungi.

32 "Mwiwulaniche kuhuma mulibiki lya mkuyu. Makwati gyake pegivanga kuhomala vilembulo na makwati, mwichela kuva ndonya igehe pepi kwacha. 33 Ndeni ndeni, pemwilola njowo ichi chonda chigitwa, muchele kuva agehe pepi kwacha. 34 Ndikuvalongela ndakyene, kilelo iki se kichumba kabula lya makani aga gahumile. 35 Luhano na inyi chichumba, ila njowo changu dasechichumba.

36 "Ila, kwihela ata munu yumwi yeichela kigono awu lisaa daikwacha pandili, vala ndumindumi va kuluhano, vala Mwana, ila Daada weka hela, nde yeichela. 37 Ngita peikali chipindi cha Nuhu, nde peivecha chipindi cha kwacha kwa Mwana va Munu. 38 Kwakuva chipindi icho, kabula lya malenga myolofu kugubika inyi, vanu vakali vilia na kunyuwa, vakitola na kutawuka, mbaka Nuhu peaingile muwato mkomi veukemelwe lisafina. 39 Sevachele lyolyonda, mbaka malenga pegagubike inyi na kuvadocha vanu volofu. Nde peivecha chipindi cha kwacha kwa Mwana va Munu. 40 Chipindi icho vanu vavili davavecha kumgunda, yumwi dainyamulwa na yungi dailekwa. 41 Vamaye vavili davivecha vilidibula mbwage, yumwi dainyamulwa na yumwi dailekwa. 42 Suwe, mwilolele, kwakuva semuchela kigono kya kuwuya kwa Mtwa Nguluvi vetu. 43 Ila muwuwike lukani ulu, ngita mwene kaye ngaichela kigono kya muhichi kwacha, sengaigona, vala sengailekile kaye lyake idenywe. 44 Nondee na nyenye muveche suwe, kwakuva Mwana va Munu daikwacha chipindi semukichele."

45 Yesu akaendelela kulonga, "Nde ani yeagehe mnyigendwa mndakyene, yeagehe na lukali, Mtwa vake daakumvika kulolela vanyingendwa vake na kuvagavila kyakula chipindi chene? 46 Afunyilwe mnyigendwa yula mtwa vake daikwacha, daakumlola daigita ngita pealagilichwe. 47 Ndakyene ndikuvalongela, daakumvika mnyigendwa uyo, aveche muhumilicha va finu fyake fyonda. 48 Ila ngita mnyigendwa semnofu peakwilongela munumbula, ‘Mtwa vangu acheliwe kuwuya,’ 49 kangi akavangile kuvatova vanyigendwa vayage, akavangile kuliya na kunyuwa pamwi na vanywaji, 50 Mtwa vake daakwacha kigono seakicheliye na lisaa selichelile. 51 Damtova hilo mnyigendwa uyo na kumvika pono pamwi na vafyangu. Ukoya dakuvecha kivembo na kusigina mino.