1 Yesu akuvalagilicha vachulila vake kumi na vavili, akavagavile umwimike vakudaga mihoka na kuvananicha vatamwa na uvawa vonda. 2 Matawa gya vanjagila kyumi na vavili ndi aga. Va kwanja ndi Simoni yeakemeliwe Peteli na Andelea lukolo vake, Yakobo mwana va Sebedayo na Yohani lukolo veke, 3 Filipo na Batolomeo na Tomasi na Matayo yeakali mdumula usulu na Yakobo mwana va Alifayo na Tadei, 4 Simoni munu yeitovelela inyi lyake na Yuda Isikaliote yeamkanile Yesu.

5 Yesu akavalagilicha vanjagila kyumi na vavili kuno akivalongela kuva, "Mubihile kuhelela kwa vanu se Vayawudi, vala mubihile kwingila mumwani va ku Vasamalia. 6 Ila muhelele kwa vanu Vaisilaeli vevayagile ngita kondoloo. 7 Pemuhelela kudalika, mukalonge kuva, ‘Ung'achale va kuluhano kwa Nguluvi ugehe pepi.’ 8 Muvananiche vatamwa, muvachulubule vanu vevafuwe, muvang'aliche vanu vene lukalavilo, muheche lihoka. Muvagavilwe hela na nyenye muheche hela. 9 Mubihile kunyamula mulufunga venu sahabu awu madini ga feza awu sendi cha saba. 10 Mubihile kunyamula muhako va lugendo vala koti lingi, vala makobasi vala lusagala. Kwakuva, mgita kasi ing'ang'wa kuhombwa.

11 "Pemkwingila mwani vovonda awu kijiji kyokyonda, mumsake munu yeikela kuwanuka mwikale koya mbaka pemwihega pono baha. 12 Pemwingila mukaye yeyonda muvahungile vene kaye ndena, lutengamaso luveche kwa nyenye. 13 Ngita mwenekaye ing'ang'wa kuhungilwa ndeni, ila ngita kugehe na vanu vanofu mugati muvasukile Nguluvi avafunye, ila ngita kuhela Nguluvi daseakuvafunya vanu avo. 14 Ngita munu yeyonda ikana kuvawanuka awu kuvapulikicha, suwe, pemuhuma pakaye ilyo awu mwani ugo, mwipumune lifuna mumagulu gyenu. 15 Ndakyene ndikuvalongela kigono kya luhigo, mwani ugo dawipata luhigo makomi kuchumba mwani gya Sodoma na Gomola.

16 "Mulolele, ndikuvalagilicha ngita kondolo pagati lya likeve. Ndena muveche na luhala ngita lyoka na vafokomasi ngita ng'unda. 17 Mwilolele na vanu, kwakuva davakuvasindika muludamo na kuvatova ndomondo mukaye lya kutang'anila Vayawudi. 18 Nyenye damwisindikwa pautalo lya vakomi na vang'achale kwa kunidikila nene, neke muvalongele undakyene njowo cha nene kwa vanu avo, pamwi na vanu se Vayawudi. 19 Suwe, pevakuvasindika nyenye muludamo, mubihile kuvecha na nyengema damwilonga liki awu mwikwitasa wuli, kwakuva bahobaho damgavilwa kya kulonga. 20 Kwakuva se nyenye damwilonga, ila ndi Muhe va Daada venu daivecha ilonga kuchumbila nyenye.

21 "Lukolo daakumkana lukolo vake adochwe na daada daakumkana mwana vake na vana davakuvatova vasasi vawo na kuvagita vadochwe. 22 Vanu vonda davakuvavipila nyenye kwa kunidikila nene. Ila daihuvulila mbaka kumwiso, nde dailowolwa.

23 "Vanu pevakuvagudisa mumwani wumwi, munyilile mumwani wungi. Ndakyene, ndikuvalongela, semwimala mwani gya Isilaeli ngajila Mwana va Munu kwacha.

24 "Muwulanichwa seakumchumba muwulanichi vake, vala muwulanichwa seakumchumba mtwa vake. 25 Muwulanichwa ing'ang'wa kuvecha ngita muhulanichi vake na mnyigendwa ing'ang'wa kuvecha ngita mtwa vake. Ngita nene mkomi venu vanikemeliye Belisebuli, wuli nyenye dasemwikemelwa matawa mawofu hilo?

26 "Suwe, mbihile kuvawogofya vanu avo. Kila kyekigubikilwe dakigubulilwa na kila kyekifyamilwe dakiwoneka. 27 Suwe, kyendikuvalongela nyenye pono pahela vanu, muvalongele vanu. Njowo chempulikile mulipepwa, muchilandule pa vanu. 28 Mubihile kuvawogofya vala vevidocha muvili, ila seviwesa kuidocha muhe. Mwing'ang'wa kumuwogofya Nguluvi yeiwesa kuhananga muvili pamwi na muhe mulyoto lya mumafunde. 29 Vakamdunduli vavili huguchwa kwa sendi imwi. Ila ata yumwi seiguwa panyi ngajila daada vawo kuchela. 30 Ata Nguluvi ichela chigehe chiliga fwili cha fituwe fyenu. 31 Ndeni, mubihile kuwogofya, nyenye ndi ngiba hilo pautalo lya Nguluvi kuchumba avo vadunduli volofu.

32 "Munu yeyonda yeakunidikila pautalo lya vanu kuva mwene nde vangu na nene dandikumudikila pautalo lya Daada vangu yeagehe kuluhano. 33 Ila yeyonda yeakunikana pautalo lya vanu na nene dandikumkana pautalo lya Daada vangu yeagehe kuluhano.

34 "Mbihile kuhocha kuva ndachile kuvaletela ludikilo pa inyi. Sendachile kuvaletela ludikilo ila ndachile kuchovelecha ndewo. 35 Kwakuva ndachile kuvaletela ndeo pagati lya mwana na daada vake na muhinja na maye vake na mukwive na mganafu vake. 36 Mchundwama va munu ndi vanu va kaye lyake.

37 "Yeakumkela daada awu maye vake kuchumba peakunikela nene, seawesa kuvecha mchulila vangu, yeakumkela mwana awu muhinja kugina nene, seawesa kuvecha mchulila vangu. 38 Munu yeseinyamula kipindilihicho kyake na kwacha kwa nene, seawesa kuvecha mchulila vangu. 39 Mwene yeakela kuwunanicha uwumi vake akuwuyagicha, ila yeawuyagicha uwumi vake kwakuva lya nene mwene dakugalowola.

40 "Yeyonda yeakuvawanuka nyenye mukaye lyake, akuniwanuka nene mukaye lyake na yeakuniwanuka nene, akumhanuka yula yeanilagiliche. 41 Yeyonda yeakumwanuka mvichi va Nguluvi kwakuva nde mvichi, iwanuka fupo lya uvichi. Yeyonda yeakumwanuka munu yeigita manofu pautalo lya Nguluvi kwakuva nde munu yeigita manofu pautalo lya Nguluvi, daiwanuka fupo lya munu yeigita manofu pautalo lya Nguluvi. 42 Ndakyene ndikuvalongela, yeyonda yeakumgavila yumwi va vadodo ava kikombe kya malenga gachichimu kwakuva nde mchulila vangu, ndakyene ipata fupo lyake."