1 Suwe, Vafalisayo na Vasadukayo vakamuheleliye Yesu na kumgecha, vakamsukile avagitile kimanyilo kuhuma kuluhano kwa Nguluvi. 2 Ila Yesu akavahigile, "Peifika palumiye nyenye mwilonga, ‘Kilau kwihela ndonya kwakuva lifunde nde livalafu!’ 3 Na pamilau mwilomga, ‘Neng'uli kuvecha na ndonya, kwakuva kulifunde kutitu kangi lifunde limemile!’ Suwe, nyenye mwichela chipindi kwa kulolela kumafunde ila semuchela kumanya fimanyilo gya makani gye gihuma chipindi ichi. 4 Kilelo kya vanu vawofu na sekidikilwa na Nguluvi kikela kimanyilo, ila sekigavilwa kimanyilo kyekyonda ila kimanyilo kilakila kya Yona." Suwe, akavaleka akahegile.

5 Vachulila vake pevahagamie lubali lungi lwa lihiva, vakawuwike kuva vasemwile kunyamula mibumunda. 6 Yesu akavalongela, "Mwitase na mwilolele na amila lya Vafalsayo na Vasadukayo!" 7 Ila vachulila vake vakali vilingana, "Ilonga endana kwakuva setunyamuwe mibumunda." 8 Yesu akachela kyevakali vilongana, akavalongie, "Nyenye vanu semwihela udikilo! Wuli, mwilongana kuva mwihela mibumunda? 9 Wuli, semwichela? Wuli, semwikuhuka gila mibumunda gihanu gyevalie vanu elufu chihanu? Wuli, mukamemiche findilu filinga fya masigalilo? 10 Awu gila mibumunda saba gyevagavilwe vala vanu elufu chitai, wuli, mukalundise findilu filinga fya masigalilo. 11 Wuli, semukali muchela kuva sendikali ndilonga kutigila mibumunda? Mwilolele na amila lya Vafalisayo na Vasadukayo!" 12 Baho, vachulila vakachela kuva akavalongile selisimika lya mibumunda ila mawulanichi gya Vafalisayo na vasadukayo.

13 Yesu peakali pono lya Kaisalea Filipi, akavauchile vachulila vake, "Vanu vilonga kuva Mwana va Munu nde ani?" 14 Vakamuhigile, "Vangi vilonga kuva nde Yohani mbatisa, vangi Elia, vangi Yelemia awu yumwi va vavichi." 15 Yesu akavahucha, "Nyenye wuli, mwilonga nene nde ani?" 16 Simoni Peteli akahigile, "Veve nde Kilisito, Mwana va Nguluvi yegehe wumi." 17 Yesu akalonga, "Ngiba veve Simoni mwana va Yona, kwakuva kwihela munu yeyonda yeakugubukuwe njowo ilyi, ila Daada vangu va kuluhano yeakugubutuliye makani ago. 18 Nene ndikulongela veve nde Peteli na pakyanya lya liganga ili ndikulichenga lipinga lya vanunve vamuidikiye Kilisito, ata ludali lwa kufuwa sechivesa kuchigina. 19 Ndikugavila fungulo cha Ung'achale va kuluhano kwa Nguluvi, kila kyeudinda muinyi, ndeni ndeni kidindwa kuluhano kwa Nguluvi, kyokyonda kyeudindula muinyi ndeni kidundiliwa kuluwano kwa Nguluvi." 20 Kangi akavakanile vachulila vake vabihile kumlongela munu yeyonda kuva mwene nde Kilisito.

21 Kuhuma chipindi ikyo Yesu akavangile kuvalongela vachulila vake kuva nding'ang'wa ahelele ku Yelusalemu, ukoya dandipata magudo gyolofu gyegigitwa na vagogolo, vatekechi vakomi na vawulanichi va malagicho. Ata kudochwa na kigono kya udatu dandichulubuka. 22 Baho Peteli akamunyamula na kumsindika pono pihela vanu, akavangile kumulakalila, "Ibihile kuvecha ndeni Mtwa! Lukani ulu lubihile kuhumila kwa veve!"

23 Yesu akaseduka, akamlongela Peteli, "Hege pautalo lyangu Setani! Veve nde kikanilo kwa nene, kwakuva mahocho gyako se ga Nguluvi ila nde ga munu!"

24 Kangi, Yesu akavalongiye vachulila vake, "Munu yeyonda yeikela kundifwata, ing'ang'wa ikane yumwene, anyamule kipindilihicho lyake ache kwa nene. 25 Kwakuva munu yeikela kulowola wumi vake, dakuuyacha, 26 Ila munu yeiyagicha wumi vake kwakuva lya nene akugapata. Wuli, munu daipata liki ngita daipata umosi vonda va inyi na kuno iyagicha maisa gyake? Awu, munu ihecha kinu liki kivecha badili lya uwumi vake? 27 Kwakuva Mwana va Munu daikwacha paukomi va Daada vake pamwi na vandumindumi vake kuluhano kwa Nguluvi, baho akuvahomba kila munu kuwana na magito gyake. 28 Ndakyene ndikuvalongola, kovali vangi baha sevifuwa kabula lya kumulola Mwana va Munu yeikwacha mung'achale vake."