1 Yesu na vachulila vake pevagehe pepi na Yelusalemu, vakafikile Betifage mufidunda fya miseyituni. Baho, Yesu akavalagiliche vachulila vake vavili, 2 akavalongiye, "Muhelele ku kijiji kyekigehe pautalo lyenu na ukoya mukumlola punda agehe na mwana vake vavopwilwe. Muvavopole muvalete kwa nene. 3 Ngita munu akivahucha kyokyonda wuli mukuvavopola, mumlongele, ‘Mtwa akuvasaka’ na munu uyo daakuvalekela kisatu."

4 Lukani ulu likagitilwe neke gala gyegalongilwe na mvichi gaveche,

5 "Muvalongele vanu va mwani va Sayuni,

Lole, Ng'achale vako ikwacha!

Ndi mfukomasi na akang'ie punda,

gwada va punda na mwana va punda."

6 Ndeni, vala vachulila vakahegile vakagita ngita Yesu peavalagilicha. 7 Vakasindikiye yula punda na mwana vake, wakatandasa myenda pakyanya lya mwanapunda na Yesu ikalile pakyanya lyake. 8 Lipinga likomi lya vanu vakatandasa myenda gyao mung'asi, vanu vangi vakadumula fikwati vatandase mung'asi. 9 Lipinga lya vanu vevamlongue na vala vevamfwatile vakabwatile vakilonga, "Unjumwe mwana va Dawudi! Afunyilwe yeikwacha kwa litawa lya Mtwa, anjumwe Nguluvi va kuluhano!"

10 Yesu peakali ikwingila ku Yelusalemu, vanu vonda va mwani wula vakali na nyengema. Vanu vakali vakwihucha, "Uyu ani?" 11 Vanu mulipinga lila vakahigile, "Uyu nde Yesu, mvichi va Nguluvi kuhuma Kunasaleti mwani va Galilaya."

12 Suwe, Yesu akaingila pono lya Kaye lya Nguluvi, akavadagile kwivala vanu vevakali vigucha na kugula finu mugati lya kaye lya Nguluvi, akachigalambusa findangavala fyavevakali vibadilisa sendi na figoda fya vala vevali vigucha ng'unda. 13 Akavalongela, "Isimbilwe mumasimbo gya Nguluvi, ‘Kaye lyangu ikemelwa kaye lya kufunyila.’ Ila nyenye muigitile kuva kaye lya vahichi."

14 Vanu vagaya meho na vatenda vakamuheleliye ukoya ku Kaye lya Nguluvi na Yesu akavananiche. 15 Baho, vatekechi vakomi na vawulanichi va malagilicho pevagawene umanyitu geagitile Yesu, kangi vana pevakali vibwetuka mupono lya Kaye lya Nguluvi, vakilonga, "Anjumwe Mwana va Dawudi," vakavipile hilo. 16 Ndeni, vakamlongiye, "Wuli, seupulika kyevalonga?"

Yesu akavahigile, "Ndakyene, ndipulika! Wuli, semukwimbile mumasimbo gya Nguluvi aga?

Kwa milomo gya vana vadodo na fyali,

Nguluvi avagitile vamnjume mwene."

17 Suwe, Yesu akavalekile, akahega kwivala lya mwani na kuhelela Betania, ukoya akavasile.

18 Kinyolasagala Yesu peakali iwuya kuhuma kumwani, akawonile njala. 19 Akaliwene libiki limwi lya mtini palubali lya ng'asi, ila akaliwene lihela kinu ila mikwati ng'ani. Suwe, akaulongela, "Ubihile kubaba kangi manunu mbepali!" Bahobaho lila libiki lya mtini likagamile.

20 Vachulila pevawene vakadudwive vakalonga, "Kwa liki libiki ilyi lya mtini ugamile kisatu?"

21 Yesu akavahigile, "Ndakyene ndikuvalongela, ngita muvecha na ludikilo ngajila kuvecha na nyengema, mwivesa kugita sehela ago, ila ata kukilongela kidunda iki, ‘Kikulike ugadibale muinyanza,’ dakihumila. 22 Pemuvecha na ludikilo, kyokyonda damusuka damuwanuka."

23 Yesu akaingile mukaye lya Nguluvi, akali iwulanicha vatekechi vakomi na vavaha va vanu Yesu akahuchilwe, "Ugita njowo ichi kwa kulongelwa na ani? Ani akugavile umwimike ugo?"

24 Yesu akavahigile, "Na nene ndikuvawucha kinu kimwi, pemuhiga na nene dandikuvahiga kuva ndigita njowo ichi kwa umwimike va ani. 25 Wuli, umwimike va Yohani va kubatisa ukahumile kwa ani? Wuli, ukahumile kuluhano awu kwa vanu?" Ila vakwihucha vavene kwa vavene, "Tukilonga, ‘Ukahumile kuluhano,’ daatuhucha, ‘Wuli semukamudikiye?’ 26 Na tukilonga, ‘Ukahumile kwa vanu,’ Tukogofya lipinga lya vanu kwakuva vonda vakwidikila kuva Yohani akali mvichi va Nguluvi." 27 Suwe, vakamuhigile, "Nefwe setwichela!" Na Yesu akavalongile, "Na nene sendikuvalongela ndigita njowo ichi kwa umwimike va ani."

28 "Nyenye mwihocha wuli makani aga, munu yumwi akali na vana vavili vakigosi. Akamlongela yula mlongola, ‘Mwana vangu, neng'uli uhelele ukagite kasi kumgunda va misabibu.’ 29 Yula mwana akamlongela Daada vake, ‘Nene ndilema!’ Ila pambele akagalambula mahocho, akahele kugita kasi. 30 Yula Daada akamlongela mwana vake yungi ndeni ndeni, mwene kamuhigile, ‘Ena Daada ndibita!’ Ila seakahelele kumgunda. 31 Wuli, ndi ani mugati lya ava vakigosi vavili yeagitile geang'ang'ile Daada vake?"

Vakamuhigile, "Yula mlongola."

Suwe, Yesu akavalongela, "Ndakyene ndikuvalongela, vadumula usulu na vaselati davakuvalongola kwingila Muung'achale va Nguluvi. 32 Kwakuva Yohani Mbatisa akachile kwa nyenye kuvawonesa ng'asi nofu lya kwikala, nyenye semukamudikile, ila vadumula usulu na vaselati vakamudikile. Ata pemuwonele ago gyonda nyenye semukalekile sambi na kumudikila."

33 Yesu akavalongile, "Mpulikiche mufanu wungi. Munu yumwi mwene kaye akagimile mgunda va misabibu, akauchingilicha lukanji, akakovile likombo lya kukamila difwayi, akachengile ukoya lilingo litali. Kangi akalikodisa kwa vagima, akahegile kuhelela inyi lya kutali. 34 Pekifikile chipindi cha kubena, akavalagiliche vanyigendwa vake kwa vala vagima, neke vakanyamule mabenelo gake. 35 Vala vagima vakavabatile vala vanyigendwa, yumwi vakamtovile na yungi vakamdochile na yungi vakamtovile na maganga. 36 Yula munu akavalagiliche kangi vanyigendwa vangi, volofu kuchumba va pamwandi. Vala vagima vakavagitile ndeni ndeni ngita va pamwandi. 37 Pambele akamulagiliche mwana vake kuno ihocha, ‘Davakumginya mwana vangu.’ 38 Ila vala vagima pevamuwene mwana vake vakaywangile vavene. ‘Uyu nde muhala na tumdoche neke tunyamule uhala vake!’ 39 Suwe, vakambatile vakamuhecha kwivala lya mgunda lya msabibu, vakamudochile.

40 "Nondee, Yesu akahuchile uyo munya mgunda va misabibu daikwacha, davagita liki vala vagima?"

41 Vene vakamuhigile, "Ndakyene davakuvahananga vala vanu vawofu na mgunda dakuvagavila vagima vangi na pambele vala vagima davakumgavila pono lya mabenelo chipindi cha kubena."

42 Baho, Yesu akavalongile, "Wuli, semwimbile lukani ulu Mumasimbo?

Liganga lyevalikanile vachengaji

nondee livechile liganga likomi lya kitamiko.

Mtwa nde yeagitile lukani ulu,

lyene ndi lya umanyitu hilo kwa nefwe."

43 Yesu akaendelela kulonga, "Nondee ndikuvalongela, ung'achale va kuluhano kwa Nguluvi dauhechwa kwa nyenye na kugavilwa vanu sevakumchela Nguluvi na vevagita geing'ang'a Nguluvi." 44 Yeiguwa paliganga ilyo daidenyeka fipande fipande na yula dalikumgwiliya dalimsinginya.

45 Vatekechi vakomi na Vafalisayo pevapulike mifanu gyake vakachele akali akuvalongela vene. 46 Nondee, vakasakile ng'asi lya kumbata, ila vakavawogwipe vanu kwakuva vene vakamuchele kuva ndi mvichi va Nguluvi.