1 Chipindi chila vachulila vakamuheleliye Yesu, vakamuhucha, "Nde ani mkomi kuchumba vangi muung'achale va kuluhano kwa Nguluvi?" 2 Yesu akamkemela mwana yumwi akamwimicha pagati lyao, 3 akalonga, "Ndakyene ndikuvalongela, ngita semseduka na kuvecha ngita vana, dasemwikwingila ng'odo muung'achale va kuluhano. 4 Yeyonda yeakwikwisa ngita mwana uyu, mwene nde mkomi muung'achale va kuluhano. 5 Yeyonda yeakumwanuka mwana ngita uyu kwakuva lya nene, akuniwanuka nene."

6 "Yeyonda yeakumuyovelecha yumwi mugati lya vadodo ava vevakunidikila nene abihile kunidikila nene, munu uyo ing'ang'wa awopwe lwala pasingo na kudibachwa mumalenga matali. 7 Damwilava vanu va inyi iyi kwakuva kugehe na makani gyegakumuyovelecha munu yungi agite sambi! Njowo ichi ching'ang'wa chihumile, ila alava munu yula yeiyovelecha!"

8 "Ngita liwoko awu ligulu lyako likugite ugite nongwa, udumule na kutaga kutali na veve. Ngiba kwaveve kwingila muuwumi ngajila liwoko awu ligulu, kuchumba kutagwa palyoto lya mbepali ukiva na miwoko givili na magulu gako gavili. 9 Liho lyako likugite ugite nongwa, likule na kulitaga patali na veve. Ngiba kwa veve kwingila uwumi ukiva na liho limwi kuchumba kuvecha na meho gyonda gavili, na kutagwa palyoto weseuchima figono fyonda.

10 "Mwilolele! Mubihile kumubeda yumwi va vododo ava. Kwakuva ndikuvalongela ndumindumi vawo ukoya kuluhano figono fyonda vagehe pautalo lya Daada vangu yeagehe kuluhano. 11 Kwakuva Mwana va Munu achile kuvalowola vala vevayagile.

12 "Mwilola wuli? Munu yeagehe na kondolo mia na yumwi ayagile, igita liki, wuli seakuvaleka vala tisini na tisa pakidunda na kuhelela kumusaka yula eayagile? 13 Ndikuvalongela undakyene, peakumwona dakumukedukila uyo yumwi kuchumba peakuvakedukila vala tisini na tisa sevayagile. 14 Ndeni ndeni, Daada venu va kuluhano seikela ata yumwi va vadodo ava vayage.

15 "Lukolo vako peakugitila nongwa, muheleliye ukamulongele kila kyeakugitile, mugite ndeni pemugehe vavili ng'ani. Ngita akupulika uvecha umupatile lukolo vako. 16 Ngita alema kukupulika, mnyamule munu yumwi awu vavili pamwi na veve, neke mahocho gavaswida vavili awu vadatu njowo chonda chichengwekaya. 17 Ngita seakuvapulika avo, lilongele lipinga lya vanu vevamdikiye Kilisito. Ngita seakulipulika lipinga lya vanu vevamdikiye Kilisito, mlole ngita vanu sevakumdikila Nguluvi na vadumula kodi.

18 "Ndakyene ndikuvalongela, kyemwidinda muinyi kidindwa kuluhano kwa Nguluvi kyekidindulilwa muinyi dakidinduliwa kuluhano kwa Nguluvi.

19 "Kangi ndikuvalongela, vavili va muinyi pevakwidikila mulukani lyolyonde na kusuka, Daada vangu va kuluhano daigita lukani ulo. 20 Kwakuva pevilundise vavili awu vadatu kwakuva lya nene na nene ndivecha pamwi na vene."

21 Suwe, Peteli akamuheleliye Yesu, akamuhuchile, "Wuli, lukolo vangu ngakunigitila nongwa, ndimuhongeche mala chilinga? Mala saba?"

22 Yesu akamuhigile, "Sendilonga mala saba ng'ani, ila umuhongeche mweyago saba mala sabini." 23 Kwakuva Ung'achale va kuluhano uwana na mng'achale yumwi yealamule kulolela unofu luvalilo lya vanyigendwa vake. 24 Peavangile kuvalila, vakamsindikile munu yumwi yeali na lideni lya fisako elufu kyumi cha sahabu. 25 Munu uyo akali ihela kinu kyekyonda kya kuhomba, ndeni mng'achale vake akalongile aguchwe mwene na mdala vake na vana vake na finu fyonda fyeagehe nafyo, neke ahombe lila lideni. 26 Suwe, yula mnyigendwa akafugamile pautalo lyake, akalonga, unihuvilile ludodo nene dandikuhomba lideni lyonda! 27 Yula mng'achale akamuwonile lusungu, akamuhongecha lila lideni, akamleka ahelele. 28 Ila yula mnyigendwa akahelela, akatang'anile na mnyigendwa muyage yeakali na lideni sendi mia yimwi fya madini ga fesa. Akambatile na akamgudile kuno ilonga, hombe lideni lyako! 29 Uyo mnyigendwa muyage akafugamile na akalongile ubihile kundiguda nene ndikuhomba! 30 Ila mwene seakelie kumleka, akamdindile mukiwopo mbaka peihomba lila lideni. 31 Baho, vanyigendwa veyage pevalolile lukani lula vakasugwime hilo, vakahelela kumlongela mng'achale vawo makani gala gyevakagawene. 32 Baho, yula mng'achale kamkemela yula mnyigendwa, veve nde mnyigendwa semnofu! Ukanisukile, ndikuhongesha lideni lyako lyonda na nene ndikakuhongecha lideni lyako lyonda. 33 Wuli, veve seung'ang'wa kumwonela lusungu mnyigendwa muyago ngita pendikakuwonele lusungu? 34 "Baho, yula mng'achale akavipile hilo, akamsindike mukiwopo yula mnyigendwa agundwe mbaka pala peihomba lideni lyonda."

35 Yesu akamalile kulonga, "Daada yeakali kuluhano akuvagitila ndeni ngita kila yumwi seakumuhongecha lukolo vake kwa numbula lyake lyonda."