1 Aga nde matava gya lukolo va Yesu Kilisito yeababilwe mulukolo va Dawudi na dawudi akababilwe mulukolo va Ibulahimu.

2 Ibulahimu akambabile Isaka na Isaka akambabile Yakobo na Yakobo akambabile Yuda na vakolo vake, 3 Yuda akambabile Palesi na Zela maye vao akali Tamali. Palesi akambabile Esilomu na Esilomu akambabile Alamu, 4 Alamu akambabile Aminadabu na Aminadabu akambabile Nashoni na Nashoni akambabile Salimoni, 5 Salimoni akambabile Boazi, maye vake Boazi akali Lahabu na Boasi akambabile Obedi, maye vake Obedi akali Luti na Obedi akambabile Yese.

6 Yese akambabile Dawudi yeakali ng'achale na Dawudi akambabile Selemani maye vake Selemani akali mdala va Uliya. 7 Selemani akambabile Lehoboamu na Lehoboamu akambabile Abiya na Abiya akambabile Asa,

8 Asa akambabile Yehoshafati na Yehoshafati akambabile Yolamu na Yolamu akambabile Uzia.

9 Uzia akambabile Yosamu na Yosamu akambabile Ahazi na Ahasi akambabile Hesekia.

10 Hesekia akambabile Manase na Manase akambabile Amoni na Amoni akambabile Yosia.

11 Yosia akambabile Yekonia na vakolo vake. Chipindi Vayawudi pevahamichwe ku Babeli.

12 Vaisilaeli pevahamichwe ku Babeli, Yekonia akambabile Shealitieli na Shealitieli akambabile Zelubabeli. 13 Zelubabeli akambabile Abiudi, Abiudi akambabile Eliakimu na Eliakimu akambabile Azoli, 14 Azoli akambabile Sadoki, Sadoki akambabile Akimu na Akimu akambabile Eliudi, 15 Eliudi akambabile Eleazali,

Eliazali akambabile Matani na Matani akambabile Yakobo.

16 Yakobo akambabile Yusufu mgosi va Maliya, Maliya yeambabile Yesu yeikemelwa Kilisito yeahaguliwe na Nguluvi.

17 Suwe, kuhuma Ibulahimu mbaka kwa ng'achale Dawudi kukali na filelo kyumi na chitai. Kangi, kuhuma kwa ng'achale Dawudi mbaka Vaisilaeli pevahamiswe kusindikwa ku Babeli kukali na filelo fingi kyumi na chitai. Kangi kuhuma chipindi pevahamisilwe kufikila kubabwa kwa Kilisito yeahuguliwe na Nguluvi, kukali na filelo kyumi na fitai.

18 Suwe, kubabwa kwa Yesu Kilisito kukali ndena, Maliya maye vake Yesu, akali ahetilwe na Yusufu. Ila peave kumtola awonike kuva amilile miti lyeapatile kwa umwimike va Muhe va Nguluvi. 19 Yusufu mgosi va Maliya, akali munu yeidikilwa pautalo lya Nguluvi, seakele kumgavila nyoni mdala vake pawelu, akasakile kumleka kwa lupwepo. 20 Peave iwocha lukani lula, ndumindumi va Mtwa akamuhumiye munjosi na kumlongela, "Yusufu mwana va Dawudi, bihile kuwogofya kumtola Maliya, kwakuva apatile lusololo kwa umwimike va Muhe va Nguluvi. 21 Ibaba mwana mkigosi, dakumkemela litawa Yesu kwakuva akuvakombola vanu vake kuhuma musambi chawo."

22 Ago gyonda gahumile neke gatimile lichwi lya Mtwa lyalongile kuchumbila mvichi va Nguluvi kuva, 23 "Muhinja daimila miti. Ekumbaba mwana mgosi, mwene daikemelwa litawa Emanueli Mana lyake Nguluvi agehe pamwinga na nefwe."

24 Mwene Yusufu pealamwike, akamtola Maliya ngita ndumindumi va Mtwa peamlongile. 25 Ila seakagonile nave mbaka Maliya peababile mlongola mgosi. Suwe, Yusufu akamtambucha litawa Yesu.