1 Yesu ingile kangi pa kaya lya kutang'anila Vayawudi, na ukoya pakali na munu munya liwokolugaso. 2 Vanu vakali vamchindile amponyele munu huyo kigono kya kutulula neke vapatile kumlata. 3 Yesu akamlongie yula munu munya liwokolugaso, "Wime pautalo neke kila munu akulole." 4 Suwe, Yesu akavahucha, "Ndeunofu kigono kya kutulula kugita njowo lunofu awu kugita njowo lihofu? Kuwokola maisa awu kudocha?" Ila vawo vakachikile. 5 Yesu kavalola vonda kwa kuvipa, akasugwime kwakuva lya usugu vawo. Suwe, akamlongie yula munu, "Gonjolola liwoko lyako!" Nave akagonjolola liwoko lyake, ukava uponile ndakyene. 6 Baho Mafalisayo vakahuma kwivala; vakapatine pamwinga na lipinga lya vanu va Helode, vakasakile namuna lya kumdocha Yesu.

7 Yesu pamwinga na vachulila vake vakahumile, vakahelela kung'umbu lya lihiva lya Galilaya, na lipinga likomi lya vanu kuhuma inyi lya Galilaya vivila vakamfuatile, 8 Idumea, kumwambo lya mgoka Yolidani, Tilo na Sidoni. Vanu havo volofu vakamheleliye Yesu kwakuva vapulikige njowo cholofu cheagitile. 9 Yesu akavalongie vachulila vake vavike unofu wato limwi, neke lipinga lya vanu libihile kumfuatila. 10 Kwa kuva aponyile vatamwa volofu, na vatamwa vonda vakali vekwisung'a neke vapatile kumkolela. 11 Na vanu vevali na mihoka pevamlole Yesu, vakaguwe panyi pautalo lyake na kutova kyowo vakilonga, "Veve ndi Mwana va Nguluvi." 12 Ila Yesu akavakanile mahoka vabihile kuvalongela vanu kuva mwene ni ani.

13 Yesu akang'ie kidunda, akavakemela vala yehavakelye. Navo vakahelela, 14 nave akavahaguwe vanu kumi na vavili ambawo yehavakemeliee vanjagila, neke vapate kuva pamwinga nave na kuvalagilicha kubita kudalika, 15 na vaveche na umwimike va kuvadaga mihoka. 16 Hava kumi na vavili yehavahaguwe nde hava: Simoni Yesu amkemelie Peteli, 17 Yakobo na Yohani vana va Sebedayo Yesu avakemelie litawa Boanelige, mana lyake "Vana va Mdilimo." 18 Andelea na Filipo na Batolomeo na Matayo na Tomasi na Yakobo mwana va Alifayo na Tadayo na Simoni munu va Kanani na 19 Yuda Isikaliyoti, yula yeamkanile Yesu.

20 Pambele Yesu akawuye kukaye, lipinga lya vanu vilundise kangi, mbaka Yesu na vanjagila vake vakalemwile kuliya kyakula. 21 Lukololo vake pevapatile njowo hicho vakehela kumnyamula kwakuva vanu vakali vakilonga, "Ana lukwale" 22 Vawulanichi va malagicho vakali vihuma Payelusalemu vakalonga, "Uyu akali Belisebuli mkomi va mihoka! Kangi, akuvadaga lihoka kwa ludali lya mkomi va lihoka." 23 Yesu akavakemela, akavalongie kwa mifanu, "Setani avesa wuli kumdaga Setani" 24 Ikiva ung'achale umwinga ugawanyike lipinga lipanga yakwipinga, ung'achale hugo wiguwa. 25 Kangi, ikiva vanu va kaye yimwi vakigavanyika mipinga mipinga gehipinganila, kaye iyo ikwanangika. 26 Na ngita, utavala va Setani ugavanyike mipinga mipinga seuvesa kwikala hilo ukwanangika. 27 Pahela munu ye ivesa kwingila kukaye lya munu yeali na ludali na kumnyaga finu fyake, avange tandi kumuwopa munu huyo munya ludali, ipo ndeivesa kumnyaga finu fyake.

28 "Ndikuvalongela ndakyene, vanu vilekelwa sambi chawo chonda na malichwi gyonda gya kumliga Nguluvi. 29 Ila yeyonda yeakumliga Muhe lya Nguluvi seilekelwa hamu, yeavecha na nongwa lya sambi lya mbepali." 30 Yesu akalongie ifyo kwa kuva vakali vilonga, "Yesu agehe na lihoka."

31 Pambele vachile maye vake Yesu pamwinga na lukololo vake. Vakiwa vaimile kwivala, vakamlagicha munu amkemele. 32 Lipinga likomi lya vanu likali limchungutile, vakamlongie, "Maye vako na vakololo vako vagehe kwivala, vakukemela." 33 Yesu akavauchile, "Maye vangu na vakololo vangu ndi ani?" 34 Pambele akavalola vanu yevalimchungutila, akalonga, "Hava nde maye vangu na lukolo vangu. 35 Munu yeyonda yeagitile yeakelie Nguluvi, uyu nde lukolo vangu na muhacha vangu na maye vangu."