1 Pevali pepi na Yelusalemu na mwani Betifage na Betania pawip na kidunda lwa Miseituni. Baho Yesu akavalagilicha vachulila vake vavili, 2 avalongie, "Mwelele pakijiji chekigehe palutalo gyenu. Pemwingila mula, mumlola mwanapunda avopilwe, yeave kukang'alwa na munu yeyonda. Mdinduwe mumletile kwa nene. 3 Ngita munu akivahucha, wuli mwigita ndeni mumlongele, Mtwa akumkela na akumwisa baha badala lya muda mdodo."

4 Suwe, vakahelela, vakamwene mwanapunda awopwilwe paubali lya ng'asi, pepi na mlangilo lwa kaye, 5 pevali vakumuwopola, vanu vevakali vevimile pepi bahala pala vakavahucha, "Wuli mwimwopola mwanapunda?" 6 Vachulila vakahigila ngita Yesu yeavalongie, vanu vala vakavaleka vahelele na yula mwanapunda. 7 Vakamsindika kwa Yesu yula mwanapunda. Vakatalasa myenda gyawo kukyanya lya yula mwanapunda na Yesu kakang'ala kukyanya lyake. 8 Vanu volofu vakatandasile myenda gyawo mung'asi, vangi vakatandasile viputila fya mibiki fidodo fyefidumulwe pamigunda kuonesa kumginya. 9 Vanu vonda vevalonguwe na vala vevafuatile, vakalonga kwa lisauti likomi, "Njuma afunyilwe yeachile kwa litawa lya Mtwa! 10 Ufunyilwe ung'achale wiukwacha va daada vetu Dawudi njuma kwa Nguluvi yeagehe kukyanya hilo!"

11 Yesu ayingile ku Yelusalemu akahelela mbaka Kaye lya Nguluvi, akalolile kila kinu unofu. Ila kwa fila ikali palumie, akahelela Betania pamwinga na vala kumi na vavili.

12 Kilau lyake, pevagehe vihuya Betania, Yesu ivavwa njala. 13 Suwe, kwa utali awonile libiki lya Mtini likali na mikwati gyolofu. Akahelela neke awulole ngita yeugehe na manunu. Peafikile, akauwene huwela linunu lyelonda ila mikwati hela, kwakuva ukali sevakati va kubaba manunu. 14 Baho akaulongela libiki lya mtini, "Kuhuma neng'uli mbaka figono fyonda munu yeyonda abihile kulia manunu kuhuma kwa veve." Vachulila vake vakampulika malichwi hago.

15 Vafikile ku Yelusalemu. Yesu akaingila pa Kaya lya Nguluvi akavanga kuvadaga kwivala vanu vevakali vagucha na kugula vanyama kwajili lya usembe va kunyanya. Akachigalambula mesa cha vala vevakali vebadilisana sendi, na figoda fya vala vevali vigucha ng'unda. 16 Akanile munu yeyonda kunyamula kinu kyokyonda mulikanji lya Kaya lya Nguluvi. 17 Baho akavawulanicha, "Isimbilwe mumasimbo ga Nguluvi, ‘Kukaye lyangu ikemelwa kaye lya lwifunyo lwa vanu va inyi chonda.’ Ila nyenye mwigitila kuva manga lya vanyaga!"

18 Vatekechi vakomi na vawulanichi va malagilicho pevapulike ago, vakavanga kusaka ng'asi lya kumdocha Yesu. Ila vamuwogwipe ali na lipinga likomi lya vanu vadudwive na mawulanichi gyake.

19 Peifikile palumie, Yesu na vachulila vake vakahegile kumwani.

20 Nyolasagala, pevakali vekuchumba, vawene libiki lya mtini lyelinyalile kuvangila kukyanya mbaka panyi. 21 Peteli iwike na kumlongela Yesu, "Muwulanichi, lole! Lila libiki lya mtini lyeukotue, ugamile!"

22 Yesu akavalongie, "Mwidikile Nguluvi. 23 Ndikuvalongela ndakyene, munu yeakulongela kidunda iki, ‘Kuhukula ukatagwe muinyanza,’ Ila adikila kuva njowo chonda yeilonga gigitwa, agitilwa njowo icho. 24 Kwa ifyo ndikuvalongela, pemfunya na kusuka kinu, mwidikile kuva mupokela, nakyo kivecha kyenu. 25 Pemkwima kufunya, muvapyanile nongwa kila munu yeavavifiche kyokyonda, neke Dadie venu yeagehe kuluhano avalekela nongwa chenu na nyenye nogwa chenu." 26 Ila ngita nyenye semuvalekela nongwa vangi, hata Dadie yenu yeagehe kuluhano seakuvalekela nongwa chenu.

27 Suwe, vakafikila kangi ku Yelusalemu. Yesu peakali egenda mu Kaya lya Nguluvi, vatekechi vakomi na vawulanichi va malagicho na vagogolo vamuheleliye, 28 Valamuwucha, "Ugita makani aga kwa umwimika va ani? Ndi ani yeakugavile umwimika lya kugita njowo ichi?"

29 Yesu akavahigile, "Ndivahucha luhucho limwi, pemunihigila, na nene pia ndikuvalongela ndigita njowo hichi kwa umwimika va ani. 30 Mnilongele, umwimike va ubatiso va Yohani Mbatisa uhumile kwa vanu awu uhumile kuluhano kwa Nguluvi?"

31 Vakavangile kwiwucha, ngita ngatulonga, gihuma kuluhano kwa Nguluvi daatuhucha, wuli se mumwidikile Yohani mbatisa? 32 Ila tukilonga, gihuma kwa vanu, vakaogwipe vanu kwakuva vanu vonda vidikie kuva Yohani Mbatisa akali mvichi va Nguluvi ndakyene. 33 Suwe, vakamuhigila Yesu, nefwe setuchela.

Yesu akavalongela, "Nene sendikuvalongela ndigita umwimike ugu kwa umwimike va ani."