1 Yesu endelie kuvalongela, "Ndakyene ndikuvalongela, vangi vagehe baha ambavo sevafua mbaka vauwone ung'achale va Nguluvi ukwacha kwa ludali."

2 Pefichumbile figono sita, Yesu akavanyamula Peteli na Yakobo na Yohani vakahelela pamwinga kukyanya pakidunda kitali viweka hela. Ukoya Yesu akaseduka wuso pautalo gawo, 3 myenda gyake gikali mivalafu ging'ala hilo, kuhela munu yeyonda pa inyi yeavesa kukanja ngita fila. 4 Baho Elia na Musa vakavahumie, vakava vaywangege na Yesu. 5 Peteli akamlongie Yesu, "Muwulanichi, ndi unofu nefwe twikale baha. Suwe, ngiba tuchenge fibudi fidatu, kimwi kya veve na kimwi kya Musa na kimwi kya Elia." 6 Peteli seachele kya kulonga kwakuva mwene na vayage vakali vakaogwipe mno. 7 Baho likahumila lifunde likavagubika na sauti ikapulikike pa lila lifunde, "Uyu Mwana Vangu ndimkeliye, mumpulike mwene." 8 Bahobaho vachulila havo vakalola kuno na kuno, sevamuonile kangi munu yungi, ila vamuonile Yesu. 9 Pevali vikwika kukidunda, Yesu akavakanila, "Vabihile kumlongela munu yeyonda njowo chevawonile, mbaka Mwana va Munu peichulubuka." 10 Vakalikolela lilagilicho lila, ila vakava vakwiwuchana, "Kuno kuchulubuka mana lyake liki?" 11 Vakamuhucha Yesu, "Wuli vawulanichi va malagicho vilonga kuva lasima awuye tandi Elia?" 12 Yesu akavahigile, "Ndakyene, Elia hekwacha tandi, neke kuwisa umiya njowo chonda. Ila pamwinga na agyo, iyandikwe kuva Mwana va Munu ni lasima akudwe mno na kubedaliwa? 13 Ila ndikuvalongela, Elia achile sue, navo vakamgitila vevakelie, ngita peisimbilwe."

14 Pevavafikie vala vachulila vangi, vawene lipinga likomi lya vanu livachungutile. Vangi vawulanichi va malangicho vakali vekibisana navo. 15 Vanu havo vakamuwonile Yesu, vakadudwive mno, vakamnyiliye vamsamuse. 16 Yesu akavahucha vachulila vake, "Mwibisana navo kuwusu liki?" 17 Bahala pala munu yumwi mulipinga lila lya vanu akahigile, "Muwulanichi, ndimletile mwana vangu kwa veve, munya lihoka yeamgitile seavese kuywanga. 18 Kila peakumwingila, akumkwisa panyi na kumgita ahumilwe na mafulofulo mumlomo na kusigina mino na kunyala mvili vake vonda. Vachulila vako ndivalongie vamuheche yula lihoka vakalemwile." 19 Yesu akavalongie, "Nyenye filelo sekihela na mbatwa! Ndivecha pamwinga na nyenye mbaka pandili? Ndikuvafumilila mbaka pandili? Mletile mdimi kwa nene!" 20 Vakamsindika kwa Yesu. Yula lihoko pevamuwene Yesu, baho akampeliye kilibisi yula mdimi, akamgwisa panyi, akagalawuka na kuhuma mifulofulo mumlomo. 21 Yesu kamuhuchile daada va yula mdimi, "Aga gimpatile kuhuma pandili?"

Akamhigile, "Kuhuma pauvana vake." 22 "Baho kwa baho lihoka akali akwimgwisa palyoto na mumalenga neke kumdochila. Ila ngita wiwesa kugita njowo chochonda, tusuka utuwonele lusungu ututange!"

23 Yesu akamlongie, "Ngita wiwesa kwidikila, fyonda fikuwesenika kwa munu yeaidikile."

24 Baho daada va yula mdimi akatova kyowo akilonga, "Ndidikila, ila mbatwa lyangu seitosa, unitange." 25 Yesu peuwonile lipinga lya vanu liginakulutala kisatu pautalo lyake, akamlakila yula lihoka, "Veve lihoka yeukumgita mwana uyu kuva munu seiywanga na mdindamatu, ndikuamulu umuhege mwana uyu vala bihile kumwingila kangi!" 26 Baho yula lihoka akatova kyowo, akampelie kilibisi na kumgwisa panyi mwana yula, baho akamuhuma. Mwana awonike ngita munu yeafuwe, ifyo vanu volofu vakalonga, "Afue!" 27 Ila Yesu akamkolela liwoko yula mdimi, akamwinula na mwene akaimile.

28 Suwe, Yesu peaingile kukaye vachulila vake vakamuhucha pevagehe weka mugati, "Wuli nefwe tulemwile kumuhecha yula lihoka?"

29 Yesu akavahigile, "Lihoka ngita hava sevidagwa ndeni bila kumsuka Nguluvi."

30 Yesu na vachulila vake vakahega baho, vakachumbile ku Galilaya. Yesu sehakelie munu yeyonda achele pono pevagehe, 31 kwakuva akali ekuvafundisa vachulila vake. Akavalongie, "Mwana va Munu ekanwa na kubatwa na vanu navo vekumdocha, ila pefichumba figono fidatu kudochwa kwa mwene echulubuka."

32 Ila vachulila vake sevachele kila kyeakali akilonga ila vakaogwipe kumuhucha.

33 Suwe, vakafikile Kapelinaumu na pevagehe kukaye, Yesu akavahucha vachulila vake, "Mukali mwibisana liki mung'asi?"

34 Ila sevavesile kumhiga, kwakuva kung'asi vakali vikwiwucha ndi ani yeagehe mkomi mugati gawo. 35 Yesu akalile panyi, akavakemela vachulila vake vonda kumi na vavili, akavalongie, "Ngita munu yeyonda akikela kuva va kwansa lasima aveche va mwiso na muchulila va vonda." 36 Baho akamnyamue mwana mdodo, kamwimiche pagati gyawo, akamkumbatile, akavalongie, 37 "Munu yeyonda yeakumwanukila mwana ngita uyu kwa litawa lyangu, ekunjanukila nene. Namunu yeyonda yeakunyanukila nene, seakunjanuka nene hela, ila akumpokela na yula yeanitumile."

38 Yohani akamlongie, "Muwulanichi, tumwene munu yumwi akihecha lihoka kwa litawa lyako, nefwe tukamkanila kwakuva mwene semuyetu."

39 Ila Yesu akalonga, "Mbihile kumkanila, kwakuva kwa hela munu yeagitila umunyitu kwa litawa lyangu ambaye pambele udodo ewesa kulonga mahofu pakyanya lyangu. 40 Kwakuva yeyonda seipingana nefwe agehe palubali lyetu. 41 Munu yeyonda yekuvagavila malenga gya kunyuwa, kwakuva nyenye vanu va Kilisito ndakyene seikosa kupokela sawadi lyake."

42 "Munu yeyonda yaakuvagita vana hava vadodo kugita sambi vevakunidikila nene, ngiba awopilwe lwala likomi na kutagwa mulinyanza. 43 Liwoko lyako likikusababisila kugita sambi, udumule. Ngiba uwingile paumumi va mbepali na liwoko limwi, kuliko kwingila na mawoko givili. Pelyoto seuchimika mbepali." 44 Ukoya mifilifili sevifua vala lyoto seuchimika mbepali. 45 Na ligulu lyako likikusababisila kugita sambi, udumule!, Ngiba uwingile paumumi va mbepali wihela ligulu limwi, kuliko kuva na magulu gyonda givili na kutagwa palyoto lya figono fyonda seuchimika. 46 Ukoya mifilifili sevafua vala lyoto seuchimika. 47 Na liho lyako likikusababisila kugita sambi, ling'ole! Ngiba uwingile kuung'achale va Nguluvi na liho limwi hela, kuliko kuva na mewo gyonda givili na kutagwa palyoto va figono fyonda weseuchimika. 48 Mula mifilifili vake sevafua vala lyoto seuchimika.

49 "Kila munu ivikwa munyo kwa lyoto.

50 "Munyo nde nofu, ila ngita iyanangike, iwongelechwa na liki?

"Muveche na munyo mugati yenu, mwikale kwa lutengamaso yumwi na yungi."