1 Yesu akahuma bahala akahelela kumwani lwa Yudeya, mbaka kumwambo lwa mgoka Yolidani. Lipinga lya vanu likamuheleliye kangi, mwene akavawulanicha kangi ngita peachovie.

2 Baho vamonga Vafalisayo vakamuheleliya na kumgecha, vakamuhucha, "Wuli ndiunofu mgosi kumleka mdala vake?"

3 Yesu akavahigile, "Wuli Musa avagavile malagicho liki?"

4 Vene vakamlongie, "Musa atulagiliche mgosi peamleka mdala vake kwa kumgavila talaka."

5 Yesu akavalongie, "Musa avaandikie Malagilicho, kwakuva lwa ukangafu lwa numbula chenu. 6 Kuhuma kuwumbwa kwa inyi, ‘Nguluvi awumbile mgosi na mdala.’ Masimbo gilonga, 7 ‘Mgosi akumleka dadi vake na maye vake na kuvecha pamwinga na mdala vake, 8 vavecha mvili wumwi.’ Ino vavecha mvili wumwi, setandi vavili. 9 Suwe, cheakiwunganise Nguluvi, munu seiwesa kuvalekanicha."

10 Pevaingile mukaye, vachulila vake vakamuhucha makani gala. 11 Mwene akavalongie, "Yeakumleka mdala vake na kumtola yungi, igita ugoni. 12 Na mdala yeakumleka mgosi vake na kutauka na yungi igita ugoni."

13 Vanu vamonga vakamsindikile Yesu vana vadodo avafunye, ila vachulila vake vakavalakilila vanu vala. 14 Yesu pevawonile akavipila akavalongie vachulila vake, "Valeke vana havo vache kwa nene, mubihile kuvakana, kwakuva Ung'achale va kuluhano kwa Nguluvi ndi kwa vanu vevagehe ngita vana hava. 15 Ndakyene ndikuvalongela, munu yeyonda yesewunuka Ung'achale va kuluhano kwa Nguluvi ngita mwana mdodo, seikwingila haa muung'achale va kuluhano kwa Nguluvi." 16 Baho akavanwike vana vala mumawoko gyake na akavakumbatila na akavafunya.

17 Yesu peavangile kangi lugendo lwake, munu yumwi kamnyililia, akafugamile pautalo lyake, akamuhucha "Muwulanichi mnofu, ndigite liki neke niuhale uwumi va mbepali?"

18 Yesu akamuhigila, "Wuli unikemela mnofu? Kuhela munu yeali msanji ila Nguluvi weka hela. 19 Ugachele Malagilicho, ‘Ubihile kugita ugoni, ubihile kudocha, ubihile kuhicha, ubihile kulonga udesi kwa myago na ubihile kulonga ufyangu, vaginye dadi vako na maye vako.’"

20 Munu yula akamuhigile, "Muwulanichi, hago gyonda ndigitile paudimi vangu."

21 Yesu akamlolile, akamkela, akamlongie, "Upemswe na kinu kimwi, helele ukaguche kila kinu kyeunakyo, uvagavile vahangala hicho sendi na veve uvecha na umosi wolofu kuluhano, baho vache unifuatile." 22 Yula munu peapulike hago, akasugwime, akahelela kuno ahunime, kwakuva akali na mali chongofu.

23 Yesu alolile palubali chonda, akavalongie vachulila vake, "Ivecha ikava ukangafu mno kwa vala vamosi kwingila mu Ung'achale va kuluhano kwa Nguluvi!"

24 Vachulila vakadudwive malichwi gyake. Ila Yesu akavalongie kangi, "Vana vangu, ndikanga mno kwingila mu Ung'achale va kuluhano kwa Nguluvi! 25 Ndi lipefu mno mnyama yeikemelwa ngamila kuchumba mulibwenge lya sasiya, kuliko mmosi kwingila mu Ung'achale va kuluhano kwa Nguluvi."Ngamila

26 Vachulila vake vakadudwive mno vakwiucha, "Ndi ani yeivesa kulowola?"

27 Yesu akavahutulie meho, akavalongie, "Kwa munu yili seliwanikie, ila kwa Nguluvi finu fyonda liwanikie."

28 Peteli akamlongie, "Tufilekile fyonda na kukufuatila veve!"

29 Yesu akalonga, "Ndakyene ndikuvalongela, kila munu yealekile kaye na lukololo na muhacha na dadi na maye na vana vake na migunda kwakuva lya nene na kwakuva lya Njowo Nofu, 30 ambaye ehombwa mala mia chipindi hugu, kaye na lukololo na muhacha na maye na vana na migunda pamwinga na maguda, figono fikwacha apokela uwumi va mbepali. 31 Ila volofu vevagehe va kwansa vavecha va kumwiso, na vevagehe va kumwiso vavecha va kwansa."

32 Suwe, pevali mung'asi kuhelela pakyanya ku Yelusalemu na Yesu akali alonguwe. Vachulila vake vakaingilwe na uwogofi, navo vanu vevamfuatila vakaingilwa na uwogofi. Yesu kavanyamula kangi vala vachulila vake kumi na vavili, akavanga kuvalongela gyekumwachila. 33 Akavalongie, "Mpulike! Twihelela ku Yelusalemu, na koya Mwana va Munu esindikwa kwa vatekechi vakomi na vawulanichi va malagicho, navo vakumuhiga adochilwe, pambele vakumsindika kwa vanu seva Vayawudi. 34 Navo vekumkinila na kumfunyila miti, vakumtova na ndomondo na kumdocha. Ila pakigono kya udatu echulubuka."

35 Ndeni Yakobo na Yohani, vana va Sebedayo, vakamweleliye Yesu vakamlongia, "Muwulanicha, twikela utugitile kinu kyetukusuka." 36 Yesu akavahucha, "Mwikela ndivagitile liki?" 37 Vakamuhigile, "Peukalila pakigoda kyako kya ukomi kya Ung'achale, utuleke twikale palubali lwako lwa liwoko lya kulia na yungi akale paubali lya liwoko lya kusoto." 38 Yesu kavalongela, "Semwichela mwisuka liki! Mwivesa kufumilia magudo gyendikugapatila na kufua ngita nene pendifua?" 39 Vakamuhigile, "Twivesa."

Yesu akavalongiye, "Magudo gyendikugapatila nene nyenye mwiwesa kufumilia na kufa ngita nene pendifua. 40 Ila ndi ani yekukala palubali lya liwoko lya kulia awu kusoto. Se nene kulamula, ila Nguluvi yeamula ne ani akale kwii na ani akale kwii."

41 Vala vachulila vangi kumi pevapulike hago, vakavanga kuvavipila Yakobo na Yohani. 42 Yesu akavakemela vachulila vake vonda na akavalongie, "Mwichele kuva vatavala va inyi kuvatavala vanu vawo kwa ludali, na vakomi havo huvatumikisa vanu vawo. 43 Ila kwa nyenye semveche ndeni, ila yeikela kuva mkomi mugati yenu, itakilwa aveche mnyengendwa venu. 44 Munu yeasaka kuva mkomi, lasima aveche mndumendume va vonda. 45 Kwakuva Mwana va Munu seachile kugitilwa kasi ila achile kugita kasi na kuhuwecha uwumi vake kuva ukombosi kwa vanu vongofu."

46 Suwe vakafikile Yeliko, Yesu peakali ihuma kumwani na vachulila vake pamwinga na lipinga likomi lya vanu, munu yumwi yeabofwike meho, litawa lyake Balitimayo, mwana va Timayo akali akalile mulibali lya ng'asi esuka vamtange.

47 Peapulike kuva ndi Yesu va Nasaleti akali echumba bahala, akavanga kumkemela kwa lisauti likomi, "Yesu, Mwana va Dawudi! Muwonele lusungu!"

48 Vanu volofu vakamlakia na kumlongela achike, ila mwene akagina kukemela kwa lisauti likomi, "Mwana va Dawudi, niwonile lusungu!"

49 Yesu imile na kulonga, "Mumkemele."

Suwe vakamkemie yula yeabofwike meho, vakamlongie, "Wikangache! Wime akukukemela."

50 Mwene akatagile patali mwenda vake, akaimile na amuhelelie Yesu.

51 Yesu akamuhucha, "Ukela ndikugitie liki?"

Yula munu yeabofwike meho akamuhigile, "Muwalanichi, ndikela kulola."

52 Yesu akamlongie, "Bite, mbatwa lyako ikuponyile."

Bahobaho yula munu yeabofwike meho akavesile kulola, akamfuatile Yesu mumng'asi.