1 Yesu avangile kuwulanicha kangi mung'umbu lya lihiva lya Galilaya. Lipinga likomi lya vanu limchungutile mbaka akalamuwe kwingila mu wato na kukala mula. Vanu vonda vakali vakalile mulung'umbu lya lihiva lya Galilaya. 2 Alivafundisa makani golofu kwa mifanu, kwa mawulanichi gyake alivalongela, 3 "Mpulikiche! Munu yumwi mvyalaji mbeyu akahele kumicha mbeyu. 4 Peagehe imicha mbeyu, chingi chikaguwe mung'asi, fidege fyachile fyaliye. 5 Chingi chaguwe pa maganga pahela mganga wolofu, chikamelile kisatu, kwa kuva mganga ukali mdodo. 6 Peliumile lichuwa, mimelo gikagama kwa kuva midadikwa gyake gikile hamu panyi. 7 Mbeyu chingi chaguwe pa mibiki gya mihomi, mihomi igyo gikakulile na kukekenecha mimelo ifyo seihumiche mabenelo. 8 Ila mbeyu chingi chikaguwe mumganga mnofu, chimelile unofu na kukula, chikahumicha mabenelo. Mbeyu yimwi ikahumiche mabenelo selasini na yingi ikahumiche mabenelo sitini na chingi chahumiche mabenelo mia yimwi!" 9 Pambele Yesu akalonga, "Munu yeali na misigicha gya kupulikila na apulike!"

10 Yesu peagehe weka hela, vala vanu vevamchungulite, pamwinga na vachulila vake kumi na vavili, vakahelela kwa Yesu vakamuhucha njowo lwa mifanu gyake. 11 Yesu kavalongela, "Nyenye mgavilwe umwimike va kuchela lupwepo lya Ung'achale va Nguluvi, ila vala yevagehe vilongelwa kila kinu kwa mifanu, 12 neke, ‘Mbepali valole ndakyene, ila vabihile kulola, mbepali vapulike, ila vabihile kuchela, vakuwesa kumsedukila Nguluvi, na mwene ivesa kuvalekela sambi chawo.’"

13 Pambele Yesu akavaucha, "Mchele hamu mana lya uwanganicho ugu? Suwe, wuli damuwesa kuchela mifanu gingi? 14 Mbeyu yeivyaliwe na munu yula yeivyala mbeyu ndi lichwi lya Nguluvi. 15 Vanu vangi ndi ngita mbeyu yeigwilie mung'asi ambapo lichwi livyalilwe. Ila baho hela pevikulipulika lichwi, Setani ikwacha na kulihecha lichwi hilyo lelivyalilwe munumbula chawo. 16 Vanu vangi ngita chila mbeyu chechigwilie pa maganga. Pevakulipulika lichwi, vipokela kwa kukeduka. 17 Ila kwa kuva lila lichwi selikwingila na kuvika midadikwa munumbula gyawo, baho vaendelesa kwa muda mdodo. Na chipindi va magudo na chipindi va utumama peihumila kwakuva lya lila lichwi, baho hela vakulileka lichwi. 18 Vanu vangi ndi ngita chila mbeyu chechigwilie pa mibiki gya mihomi. Hugo ndi vala vevipulika hilyo lichwi lya Nguluvi, 19 Ila wogofi va inyi hugu kukela na kwikedusa yuve magudo ga inyi na kukela mno kuvecha na mali cholofu na kukekeneka hilyo navo sevibaba manunu. 20 Ila vangi viwana na yila mbeyu chechivyalilwe pa mganga mnofu. Hava hulipulika lichwi lya Nguluvi, vakalipokela, vakababa manunu: Vangi selasini na vangi sitini na vangi miya.

21 "Yesu endeliye kuvalongela, wuli kibatali kikwaswa na kugubika panyi lya kiviya awu panyi pa ulili? Be seiwaswa na kuvika pakyanya pa kisusu? 22 Na kinu kyokyonda kyekifiilwe kiwoneka, na kinu kyekigubikwe kigubitulwa. 23 Munya masigicha gya kupulika na apulike."

24 Yesu akavalongela kangi, "Mpulike unofu gyempulika muhinga gila gwemwitumila kuva vingila vayenu nde hikyo hikyo kyekitumilwa kuvahinga piya kangi mwilutichilwa hilo. 25 Kwakuva yeali na kinu iongelechelwa, nave seinakyo kinu, hata kila kidodo kyeinakyo inyagwa."

26 Yesu endelie kulonga, "Ung'achale va Nguluvi ndi ngita, munu yeivyala mbeyu pa mgunda. 27 Peamalile kuvyala, peali avasile au agehe meho, na chipindi hugo mbeyu imela na kukula. Mweni seichela mbeyu peimela na kukula. 28 Mganga uwene huugita umele mimelo kukula na kubaba manunu, livanga likwati kumela, kangi lisina, pambele lihocho. 29 Mapemba pegakangie, yula munu uvanga kubena kwa kikwakwa kya kubenela mabenelo, kwa kuva chipindi va kubena ufikile." Munu ibena kwa kikwaka

30 Yesu akavalongie kangi, "Ung'achale va Nguluvi uwana na kinu liki? Tuhumulile kwa mufanu liki? 31 Iwanine ngita mbeyu lya haladali ambalyo nde ndodondodo kuchumba mbeyu chonda chechivyalwa pa mganga. 32 Peisindilwe kuvyalwa, imela na kuva mmelo mkomi kuchumba mimelo gyonda gya pamgunda. Kangi mimagwa gyake mikomi mbaka fidege vichenga fyaso fyawo pa mimagwa gyake." 33 Yesu alivadalikila unanzi vake kwa mifanu gingi gyongofu gya namuna hilyo; Kaywanga navo namuna pevavesile kupulika. 34 Sealongile navo lichwi lyolyonda bila kutumila mifanu; ila peagehe weka pamwinga na vachulila vake, alivalongela mana lya kila mifanu.

35 Kigono kikila palumie, Yesu avalongie vachulila vake, "Tuagame tuhelele kumwambo lya lihiva." 36 Suwe, vakaleka lila lipinga lya vanu, Vachulila vakaingile muwato peagehe Yesu vakahelela pamwinga. Fifila miwato gingi gimfuatile. 37 Suwe, likala likomi likavanga kupuga, madaba gakaitove ula wato likavanga kuingicha malenga mugati muwato.Madaba gautova wato 38 Yesu akali kumbele muwato, akiva agonile pakyanya lya msegamo. Vachulila vake vakamlamuse na kumlongela, "Muwulanichi, seulola kuva nefwe twisaka kufua?" 39 Yesu akalamwike, akalikanie ula likala na kuyalongela madaba, "Chike! Leke" Baho lukala gikachikila na kukasigala jii. 40 Pambele Yesu akavalongie vachulila vake, "Wuli mwikogopa? Be, mwave mwihela mbatwa hela?" 41 Navo vakakogwipe mno, vakava vekwihucha, "Uyu ani? Hata lukala na madaba gikumpulika!"