1 Vafalisayo pamwinga na Vawulanichi va malagicho vevahumile pa Yelusalemu vilundisile pautalo pa Yesu. 2 Vakavawene vangi va vachulila vake vakulia kyakula kwa mawoko, bila kukalava ngita itakive na malagicho ga Vayawudi.

3 Kwakuva Vafalisayo na Vayawudi vonda sevilia kyakula mbaka vakalave mawoko gyawo mbaka pa kisugulumbi, ngita pevagitile vagogolo vawo. 4 Kangi pivihuma kusoko sevivesa kulia kinu kyekyonda bila kukalava mawoko gyawo. Kangi kugehe na mila chingi cholofu chevakuchifuata ngita chila cha kuhogoficha fikombe, fiviya na fyombo fya kyuma.

5 Suwe, Vafalisayo na vawulanichi va malagicho vakamuhucha Yesu, "Wuli vachulila vako sevafuatila mila cha vagogolo vetu, ila vene vekulia bila kukalava mawoko?"

6 Yesu akavahigile, "Mvichi Isaya alongile undakyene pealagule kukyanya yenu nyenye vafyangu, ngita peandikile, Nguluvi ilonga ‘Vanu ava vekuniginya kwa milomo gyawo, ila numbula chawo chigehe kutali na nene. 7 Kugundamila kwavo kwahofyo, kwakuva vewulanicha malagilicho gya vanu na kulonga kuva malagilicho gya Nguluvi!’

8 "Nyenye muleka Malagilicho gya Nguluvi na mukolela malagilicho gya vanu."

9 Yesu akagendelie kulonga, "Nyenye munalyo namuna lya luhala mnofu lya kuleka malagilicho gya Nguluvi, neke mwikolela malagilicho gyenu. 10 Kwakuva Musa alongile, ‘Vaginye dadi vako na maye vako na munu yeyonda yeakumliga daada awu maye vake adochwe.’ 11 Ila nyenye mwilonga, ngita munu yeali na kinu kya kumtanga daada awu mamiye, ila akilonga kinu hiki, Kolibani mana lyake, kihumichwe kwa Nguluvi, 12 suwe mwihocha munu uyo seivesa kumtanga daada awu mamiye. 13 Suwe mwibeda lichwi lya Nguluvi kwakuva lya mawulanichi gyenu mwifundisila. Kangi mwigita finu fyolofu gya namuna iyo."

14 Yesu kalikemela kangi lipinga lila lya vanu akavalongela, "Munipulike vonda na mchele. 15 Kuhela kinu kimwingila munu kivesa kumgita kuva seidikilwa pautalo pa Nguluvi. Ila kinu kyekimuhumila munu nde kikumgita seidikilwe pautalo pa Nguluvi." 16 Munu yeali na misigicha gya kupulikila na apulike! 17 Peaulekile lila lipinga lya vanu na kwikingila mugati, vachulila vake vakamuhucha mana lya uwanganicho wula. 18 Yesu kavahigile "Hata nyenye semwichela? Semchele kuva kinu kyekikumwingila munu kuhuma kwivala sekikumgita munu seidikilwe pautalo pa Nguluvi? 19 Kwakuva sekikumwingila munumbula, ila kikumwingila mulileme, na pambele kukihecha kwivala lya mvili?" Kwa kulonga ndena, Yesu alongile fyakula fyonda finofu kwa kuliya. 20 Endelie kulonga, "Kinu kimuhuma munu ndi kikumgita seidikilwe pautalo pa Nguluvi. 21 Kwakuva numbula lya munu gihuma mahocho mawofu, uhochi na uwichi na udochaji, 22 ugoni na uwimi na uwofu na udesi na ufuma na wifu na maligo na kidada na upufi. 23 Finu fyonda ifyo fihuma mugati lya mnumbula lya munu, nagyo gikumgita munu kuva seidikilwe pautalo pa Nguluvi."

24 Yesu akahega pono pala, akahelela pa inyi yeugehe pepi na mwani va Tilo. Uukoya akaingila pa kaye yimwi na seakelile munu yeyonda achele. Ila seavesile kwifia. 25 Baho pakali na mdala yumwi yeakali na muhinja yeakali na lihoka, akapulike njowo lwa Yesu. Suwe, akahelela na akafugamile pautalo pa Yesu. 26 Mdala yula seakali Myawudi na yeababilwe Silofoinike lya Siliya. Baho amsukile Yesu amuheche lihoka muhinja vake. 27 Ila Yesu akamlongie, "Leke tandi vana vigwite. Kwakuva seunofu kunyamula kyakula kya vana na kuvatagila mibuwa." 28 Mdala yula amuhigile, "Ndakyene Mtwa, ila hata libuwa vevali panyi lya mesa vilila masigalilo gya kyakula gya vana!" 29 Yesu amlongie, "Kwakuva kwa lihigilo lyako, helele kukaye yula lihoka kamuhega muhinja vako!" 30 Baho mdala yula akahelie kukaye lyake, akamwene mwana vake avasile paulili na lihoka limuhumile.

31 Baho Yesu akahega kuinyi lya Tilo, akachumbile pagati lya Sidoni, afikile hadi Dekapoli yaani inyi genye myani kumi, akafikile lihiva lya Galilaya. 32 Baho vanu vakamsindike munu munya kisaya na mdindamatu. Vakamsukile Yesu amvikile mawoko. 33 Yesu akamvikile patali na lipinga lya vanu. Akavika fyala fyake mulisigicha gya munu yula. Pambele akafunya miti mufyala fyake, na kuubyalisa lumili lwa munu yula. 34 Pambele Yesu akalolile kukyanya paluhano, akapepile muhe kwaludali na kumlongela munu yula, "Efata" Mana lyake "Dinduka!" 35 Bahobaho masigicha gya munu yula gikadinduka na lumili lwake ukali lipefu, akavanga kuywanga unofu. 36 Yesu akavakanila vabihile kumlongela munu yeyonda cheagitile. Ila kila peagina kuvakanila, ndifyo vakagina kulanducha njowo hicho. 37 Vanu vonda vakadudwive mno, vilonga, "Kagita fyonda finu unofu. Kavaponela vanu vadindamatu vaka pulika na vanu sevavesa kuywanga vakaywanga."