1 Yesu akavanga kuywanga navo kwa mifanu, munu yumwi alimile mgunda lya misabibu. Anyengetiche lukanji na pagati lyake akagimile kisimo kya valimi difwai, achengile lilingo. Pambele ahadisile mgunda gula kwa vakulima, mwene akahelela painyi lya kutali.Vanu vikama sabibu 2 Vakati va mabenelo, amlagichile mnyigendwa vake kwa vala vakulima, amletie masumulo gya mabenelo gya mgunda gwake. 3 Vala vakulima vakamwibatile, vamtovile, vakamwisile ahela kinu. 4 Akamlagiliche kangi mnyegendwa yungi na yula yeamlagiche vakamlemiche kituwe na vakamwanagile. 5 Yula mwunya mgunda akamlagilicha kangi mnyegendwa yungi, vakulima vala vamuhulege. Munya mgunda akavalagilicha vanyigendwa volofu ila vala vakulima vakavatova na vangi vakavadocha. 6 Munya mgunda asigie na munu yumwi va kumlagilicha, yula mwana vake yemkelie. Pambele amlagiliche yula mwana vake kuno elonga, vakumginya mwana vangu. 7 Ila vala vakulima valonganile, yula nde muhala, mwache tumdoche, neke uhala vake uvecha vetu. 8 Ino nde vambatile, vakamdocha na kumtaga kwivala lya gula mgunda lya misabibu. 9 "Yesu akavahuchile, mwihocha yula mwene mgunda agita liki? Ekwacha na kuvadocha vala vakulima na kulikodisa hilyo mgunda lya misabibu kwa vanu vangi. 10 Wuli semwikwimbile Masimbo haga? ‘Liganga levalikanile vachengaji ino livechile liganga likomi lya palubali. 11 Mtwa agitile njowo hilyi, nalyo ndi lya kududwiva mno kwanefwe.!’" 12 Vatekechi vakomi na vawulanichi va malagicho na vagogolo vachele lya kuva uwanganicho wula ukali unavahusu. Baho vakagecha kumbata, ila vakaogwipe lipinga lya vanu, vakamleka vakahelela.

13 Suwe, Vafalisayo na lipinga lya Helode vakalagichwa vamgomiche Yesu kwa kumuhucha mahucho. 14 Vanu vala vakamweleliye Yesu, vakamlongie, "Muwulanichi, tuchele kuva veve ndi munu mwidikilwa yeulonga ndakyene. Vala seulava ukomi va munu sekinu kwa veve, ila uvafundisa ng'asi lya undakyene va Nguluvi. Ndehalali kuhomba kodi kwa Ng'achale mkomi va Loma, awu sehalali? Tuhombe awu setuhombe?" 15 Ila Yesu achele ufyangu vawo, kavalongela, "Wuli mwigecha kunigomicha? Niwonise hilyo sendi." 16 Vakamgavila yila sendi, mwene akavahucha, "Wuso hugu na litawa hilyi lya ani?" Navo vakamwigila, "Lya Ng'achale mkomi va Loma." 17 Suwe, Yesu akavalongie, "Lya Ng'achale mkomi va Loma mgavile Ng'achale mkomi va Loma, na ga Nguluvi mgavile Nguluvi." Navo vakadudwile mno.

18 Baho Masadukayo vevakali vilonga kuva kuhela uchulubuko vakamweleliye Yesu, vakamuhucha, 19 "Muwulanichi Musa atulagiliche ndeni, ‘Mgosi akifua na kuleka mdala ihela vana, mkolo vake etakilwa amtole neke ambabie lukololwe vake vana.’ 20 Suwe, kukali na vakololo saba. Yealongue akatolile mdala, kafua bila kuleka mwana. 21 Lukolo vauvili akamtola yula mdala yefiliwe na mgosi vake na mwene akafua bila kuleka mwana, na lukolo va udatu ikavecha ndeni. 22 Vonda saba vafue bila kuleka mwana. Pambele yula maye akafua bila kuleka mwana. 23 Suwe, kigono kya vanu kuchulubuka, yula mdala ivecha va ani kwakuva akatawike na vakololo vonda saba?"

24 Yesu akavalongie, "Nyenye mkosiye kwakuva se mchele Masimbo ga Nguluvi vala ludali lwa Nguluvi. 25 Kwakuva vanu pevachulubuka se vatola awu kutawuka, vavecha ngita vandumindumi va kuluhano kwa Nguluvi. 26 Ila kwa njowo cha kuchulubuka kwa vafu, wuli semkwimbile kiganulo kya Musa pono pekiandikwe kila kisako kyekikali kikwaka lyoto? Nguluvi avalongile Musa, ‘Nene ndi Nguluvi va Ibulahimu na Nguluvi va Isaka na Nguluvi va Yakobo.’ 27 Suwe, mwene se Nguluvi vavanu vevafue, ila ndi Nguluvi va vevagehe wumi. Nyenye mukosele muno."

28 Muwulanichi yumwi va malagicho akafikile, kavapulika vilongana. Peamuonili Yesu avahigile unofu Masadukayo, nave akajihumiche, akamuhucha, "Pa malagicho lyonda ndi ikwii yeigehe ngomi kuchumba chonda?" 29 Yesu akamhigile, lulagilicho lukomi nde ulu, pulike nyenye vanu va Isilaeli! Mtwa Nguluvi vetu, agehe yumwi weka hela. 30 Mkele Mtwa Nguluvi vako kwa numbula lyako lyonda na kwa muhe lyako lyonda na kwa luhala lwako lwonda na ludali chako chonda. 31 Na amuli lya uvili ilonga ndeni, "Mkele myago ngita wikwikela yuve. Kwahela amuli yingi ngomi kuchumba iyi."

32 Yula muwulanichi va malagicho akamlongie Yesu, "Muwulanichi, uwigile unofu kuva Nguluvi ndi yumwi vala kwahela Nguluvi yungi ila yumwene. 33 Kumkela Nguluvi kwa numbula lyonda na kwa luhala londa na kwa ludali chonda na kumkela myego ngita akugikela mwene ndi ngiba hilo kuliko kuhumicha usembe na usembe va kunyanya kwa nguluvi." 34 Yesu pewonile kuva munu yula ahigile unofu, akamlongie, "Veve seugehe patali na Ung'achale va Nguluvi." Kuhuma kigono ikyo kwihela munu yeyonda yeagechile kumuhucha kinu Yesu.

35 Yesu peagehe kuvafundisa koya Kaye lya Nguluvi, akahucha, wuli vawulanichi va malagilicho vilonga kuva Kilisito ndi kilelo kya Dawudi? 36 Dawudi mwene akilonga kwa kulongochwa na Muhe lya Nguluvi akilonga,

Mtwa akamlongie Mtwa vangu.

Kale palubali vangu va kulia,

mbaka ndivavike vachundama vako panyi gya magulu gyako.

37 "Dawudi mwene amkemela Kilisito Mtwa. Kilisito ivecha wuli kuva mwana va Dawudi?"

Lipinga lya vanu ukali ukumpulikila kwa lukeduko. 38 Peagehe kuvafundisa, Yesu akalonga, "Mwikale kutali na vawulanichi va malagicho. Vawo ukela kugenda vakiva vafalile lihingila mitali na kuhungilwa na vanu kwa uginya pakivanja, 39 na kukala pafigoda fya pautalo pa Kaye lya kutang'anila Vayawudi na kwikala pafigoda fyapalutalo mulihungu. 40 Vakuvanyaga finu fyawo vadala yevafulilwe na vagosi na vakijigita vifunya lufunyo lutali! Kigono kya muhinga vapatila lihinga ng'ali."

41 Yesu akali ikalile pepi na sandiko lya kuhechela usembe. Akalolela vanu volofu yevagehe kuhecha sendi mulisanduku lya lusanja lya Kaye lya Nguluvi. Vamosi vakahechile sendi chongofu. 42 Ila maye yumwinga muhangala yeafwiliwe na mgosi akaachile, akahecha sendi chivili ndodo cha shaba. 43 Baho Yesu avakemele vachulila vake, kavalongela, "Ndakyene ndikuvalongela, maye uyu muhangala yeafwiliwe na mgosi kavika sendi chongofu mulisanduku lya lusanja kuchumba vanu vonda. 44 Kwakuva vongofu vonda vahumiche kuhumila mali chechilutie, ila maye uyu muhangala, ahumiche kila kinu kyenakyo hata kila kyakumtanga kwa kwikala."