1 Vakati hugo, lipinga likomi lya vanu vekekung'ese kangi na vakali vihela kyakuliya. Suwe Yesu akavakemela vachulila vake, akavalongie, 2 "Ndikuvawonela lusungu vanu hava kwa kuva twikalile pamwinga na nene kwa figono fidatu na vehela kyakula. 3 Pendivaleka vahelele kukaye vakiva na njala vichilika mung'asi, kwakuva vangi vihuma patali." 4 Vachulila vake vakamuhucha, "Baha kudasi twipata kwii mibumunda gya kuvagwitisa vanu vonda hava?" 5 Yesu akavahucha, "Mwigehe na mibumunda milinga?" Vakamwigile, "Tunagyo mibumunda saba hela." 6 Suwe, akavalongela vanu vakale panyi, kanyamula gila mibumunda saba, akamhongecha Nguluvi, akaidumula mibumunda, kavagavila vachulila vake, vene vavagavile vanu. 7 Vakali kangi na fisomba fidodo. Yesu akavifunyile, akavagavila kangi vachulila vake neke havagavile vanu. 8 Vanu vakalie, vakagwite. Vakung'asile masigalio gya kyakula vakamemiche mandilu saba. 9 Vanu vevalie vakali elufu chitai. Pambele Yesu akavelagile, 10 bahobaho, akaingila muliwato pamwinga na vachulila vake, vakahelela inyi lya Dalimanuta.

11 Vafalisayo vachile, vakavanga kumuhucha Yesu. Kwa kumgecha, vakakelie agite umanyitu kuvawonesa kuva umwimike vake uhumile kuluhano kwa Nguluvi. 12 Yesu akaswigime munumbula, kavalongela, "Wuli kilelo hiki kikela umanyitu? Ndakyene ndikuvalongela, kilelo hiki sekipatila umanyitu vovonda." 13 Suwe, akavalekile, akakang'ala kangi muliwato, akavanga kubita kuhelela kumwambo lya pili lya lihiva.

14 Vachulila va Yesu vasemwile kunyamula mibumunda, ila vakali na limwi hela mula muliwato. 15 Yesu akavahonyile, "Mlolile mno! Mwikale kutali na lisimika lya Vafalisayo na lisimika lya Helode." 16 Vachulila vakavanga valonganile vene kwa vene, "Iywanga ndena kwakuva twihela mibumunda." 17 Yesu achelege hago, akavalongie, "Wuli mwilongana kwakuva muhela mibumunda? Mwave semtambula vala kuchela? Wuli numbula chenu mikangafu kuchela? 18 Mwigehe na meho ila semlola? Mwigehe na misigicha ila sempulika? Be, semwikwiwuka? 19 Chipindi chila pendidumule gila mibumunda mihanu na kuvagavila vanu elefu chihanu? Mwilundisile vindilu vilinga gyegisigile?"

Vakamwigile, "Fikali kumi na fivili."

20 "Pendidumule gila mibumunda saba na kuvagavila vanu elefu chitai, mwikalundise vindilu fya mibumunda vilinga gyegisigile?" Vakamwigila, "Fikali saba." 21 Baho, akavahucha, "Mwave hela kuchela?"

22 Yesu akafikile Betisaida pamwinga na vachulila vake, ukoya vanu vakamletie munu yeabofwike meho, vakamsuka ambyalise. 23 Yesu akamkolela liwoko yula munu yeabofwike meho, akamsindika kwivala lya mwani. Akamfunyila miti mumeho ga yula munu yeabofwike meho na kumvikila mawoko mumeho, Yesu akamuhucha, "Wiwesa kulola kinu kyokyonda?" 24 Yula munu yeabofwike meho akalola, akalonga, "Ndilola vanu ila vewoneka ngita mibiki gyegigenda." 25 Yesu akamvikila kangi mawoko mumeho ga yula munu, nave akahulutule meho, umwimike vake va kulola ukamuhuya, akalola kila kinu savasava. 26 Yesu kamlongela ahelele kukaye lyake na kumkanila, "Ubihile kuchumbila kukijiji kingi chumbaniche kukaye lyako!"

27 Pambele Yesu na vachulila vake vakahelela ku fijiji fya Kaisalia Filipi. Pevagehe mung'asi, Yesu akavahucha vachulila vake, "Vanu vilonga nene ani?" 28 Vakamwigila, "Vanu vangi vilonga veve Yohani mbatisaji, vangi vilonga veve Elia na vangi vilonga veve mwingavao va vavichi va Ngulivi." 29 Pambele Yesu akavahucha, "Na nyenye mwilonga nene ani?" Peteli akamuhigile, "Veve ndive Kilisito yeahanguliwe na Nguluvi." 30 Yesu akavakanila, "Vabihile kumlongela munu yeyonda njowo lwake."

31 Baho Yesu akavangile kufafundisa vachulila vake kuva Mwana va Munu ipata maguda gyolofu na kukanwa na vagogolo na filongosi va vatekechi vakomi, na vawulanichi va malagicho na kudochwa, na pefichumbile figono fidatu ichulubuka. 32 Yesu akavalongela njowo hilyo vasivasi. Bahobaho Peteli akamnyamula palubali akavanga kumlongalonga. 33 Ila Yesu akaseduke na kuvalola vachulila vake, akamlakila Peteli akilonga, "Uhege kumbele lyangu Setani! Veve sewihocha gya Nguluvi bali uhocha gya vanu." 34 Pambele akaukemela lipinga lya vanu pamwinga na vachulila vake, akalonga, "Munu yeyonda ekela kunifuatila nene, ndi lasima ajileme mwene, anyamule kipindilihicho lyake, anifuatile. 35 Kwakuva munu yeyonda yeakela kuwokola uwumi gyake yumwene akuyayagicha, ila munu yeakuyayagicha uwumi gyake kwakuva nene na kwakuva lya Njowo Nofu lya Nguluvi, akuyawokola. 36 Munu apatila liki ngita akuupatila finu fyonda fya inyi yonda na kuyagicha uwumi gyake? 37 Awu munu ahecha kinu liki apatile kangi uwumi gyake. 38 Munu yeyonda yeaniwonela nyoni nene na malichwi gyangu pa filelo ifi fya ugoni na fya sambi, Mwana va Munu, akumuwonela nyoni chipindi peikwacha pa ukomi va Dadie vake pamwi na vandumindumi va Nguluvi kuluhano."