1 Pembungamiye, vatekechi vakomi vakatanganile pamwinga na vagogolo, vawulanichi va malagicho na ludamo londa lya vayawudi, vakamuwopile Yesu kwa mnyololo, vakamsendika kwa Pilato. 2 Pilato akamuhucha Yesu, "Be veve ndi ng'achale va Vayawudi?" Yesu akahigile, "Igehe ngita peilonga veve." 3 Vatekechi vakomi vakamlata Yesu kwa makani gyolofu. 4 Pilato akamuhucha kangi Yesu, "Wuli sewihiga kinu? Lole vevihumicha malata gyolofu kukyanya lyako." 5 Ila Yesu seahigile kinu, Pilato akadudwive.

6 Kila chipindi va lihungu lya Pasaka, Pilato akali na achoviye kumdindulia munu yeali mukihopo yeikelwa na vanu. 7 Vakati hugo pakali na munu yumwi yeakemelwe Balaba akali adindilwe pamwinga na vanu yevaukanile ulongosi na vakagitile madocho makomi chipindi va ndewo. 8 Vanu volofu vamuhelelie Pilato na vamsukile avagitile ngita peachovie. 9 Pilato avahuchile, "Wuli mwikela ndivadinduliye Ng'achale va Vayawudi?" 10 Pilato alongile ndena kwakuva achele kuva vatekechi vakomi vamsindikile Yesu kwamwene kwakuva lya wifu. 11 Ila vatekechi vakomi vakavafung'achile vanu vamsuke Pilato avadindulie Balaba. 12 Pilato avahuchile kangi, "Ino mwisaka ndigite wuli na munu uyu yemukumkemela Ng'achale va Vayawudi?" 13 Vanu vonda vakalonga kwa lisauti likomi kangi, "Akong'olewe pa kipindilihicho!" 14 Pilato akavahucha, "Wuli! Agitile lihofu liki?" Ila vene vahendelile kutova kyowo mno, "Akong'olewe pa kipindilihicho!" 15 Pilato asakile kuvakedusa lila lipinga lya vanu, suwe akamuhumiche Balaba kuhuma mukihopo. Akavalongie Yesu atovwe ndomondo, pambele akamuhumiche akong'olwe pa kipindilihicho.

16 Baho vipuga vakamsindike Yesu mgati lya lidamwa, ku utengule na vakavakemela vapuga vonda. 17 Vakamfwalisile liingila lya langi lya sambalawu, vakabotile ingela lya mihomi, vakamfwalisile palituwe. 18 Vakavangila kumuhungila kwa kumbeda, "Aisenga Ng'achale va Vayawudi!" 19 Vakamtovile kwa lidenge pamtuwe, vakamfunyila miti, vakamfugamilie pautalo lyake na kumgundamila. 20 Pevambedile, vakamfulile lila liingila lya sambalau, vakamfwalila myenda gyake, pambele vakamuhumicha kwivala vakamsindika neke vamkong'olile pa kipindilihicho.

21 Pevakali mung'asi, vatang'anile na munu yumwi akemelwe litawa lyake Simoni, munu va Kileni, dadi vawo Alekisanda na Lufu na chipindi hugo akali ihuma kwivala lya kumwani, vapuga vakasakile yula munu ategule kipindilihicho lya Yesu. 22 Baho vakamsindike Yesu hadi pono pakemeliwe Goligota, mana lyake pono pa Lifufu lya Mtuwe. 23 Vakamgavile difayi yeihanganiswe na mgoda ukemelwe manemane, ila mwene kalema kunyua. 24 Suwe, vakamkong'olela pa kipindilihicho na mwenda gyake vakagawine mugati mwao kwa kuchitovela kula valaamule ani agavilwa liki. 25 Yali saa datu pamilau pevamkong'olie pa kipindilihicho 26 Liyandikilwe landulo lya nongwa lyake, "Ng'achale va Vayawudi" 27 Filefile vakavakong'olela vanyaga vavili pamwinga na Yesu kila mwinga palipindilihicho lyake yungi palubali lya kulia na yungi palubali lwa kusoto. 28 Nago mayandiko gatimile, gala ge galongilwe, "Avalililwe pamwinga na vagita sambi" 29 Vanu pevali vechumba paoono ipo vamonile, vatikisile mituwe gao na kulonga, "Aha! Veve munya kudenya kaye lya Nguluvi na kulichenga kwaa figono fidatu! 30 Ino wike pa kipindulihicho ujiwokole yuve!" 31 Na filefile vatekechi vakomi pamwinga na vawulanichi va malagicho vaka mbedile vilonga, "Avaokuwe vanu vangi ila seivesa kwiwokola yumwene! 32 Pulike ati mwene nde Kilisito yeahaguliwe na Nguluvi, Ng'achale va Isilaeli! Kwike nondee kuhuma pakipindilihicho neke tulole na kwidikila." Na ata vanu vala yevakong'oliwe mupindilihicho palubali lyake na vene vakamligile.

33 Kuhuma saa sita pamunyi, inyi yonda igubukwe na kisi ngomi mbaka saa tisa. 34 Peifikile saa tisa palumie, Yesu avembile kwa lisauti likomi, akalongie, "Eloi, Eloi, lama sabakitani?" Mana lyake, "Nguluvi vangu, Nguluvi vangu, wuli unilekile?" 35 Vanu vangi vevaemile pala pevapulike ifyo, valongile, "Pulike! Ekumkemela Elia." 36 Munu yumwi akanyile, akaichwika lidodoki pa divai yeihatile, akavikile kukyanya lya lidenge na kumgavila Yesu anyuwe akilonga, "Suwe mumleke tulole ngita Elia ekwacha kumkwisa pakipindilihicho!" 37 Yesu akavemba sauti ngomi, akafue. 38 Pasia ngomi lya Kaye lya Nguluvi lyademuke fipande fivili kuvangila pakyanya hadi panyi. 39 Mkomi va vapuga yumwi yeali emile pautalo lya kipindilihicho lwa Yesu, peawonele namuna peadumula muhe, akalonga, "Ndakyene munu uyu akali Mwana va Nguluvi!" 40 Vekali na vadala yevalolile kwa utali, mugativawo akiva Malia munu va Magidalene na Mali maye va Yakobo mdodo na Yusufu na Salome. 41 Vadala havo vamfuatiile Yesu peali ku Galilaya na kumtumikila. Kukali na vadala vangi volofu vachile pa Yelusalemu pamwinga nave.

42 Muda va palumie peufikile, kwakuva ikali kigono kya maandaliso, kigono kimwi kabula kigono kya kutulula. 43 Akachile Yosefu, munu va Alimataya, mnanzi va Ludamo Likomi lya Vayawudi, yeaginywe mno. Yemwene akali ekuhuchindila kwacha kwa Ung'achale va Nguluvi. Suwe, akamuheleliye Pilato bila wogofi, asukile agavilwe mvili gwa Yesu. 44 Pilato akadudwive kupulika kuva Yesu akali afuwe dahaa. Suwe, amkemelie mkomi va vapuga, akamuhuchile kuva Yesu afuwe dahaa. 45 Pilato pealongilwe ndeni na yula mkomi va vapuga kuva Yesu afuwe, akamlekile Yosefu kunyamula mvili va Yesu. 46 Yosefu akagulile ligubiko, akaukwisa mvili va Yesu kuhuma pakipindulihicho, akaumilimili ligubiko. Akauvikile pa likabuli lyelikali lihogwile kumgamba. Pambele alibilingisa likanga likomi pautalo lya mlyangilo. 47 Malia yula va kuhuma Kumagidalena na Malia maye vake Yusufu pevalolile pala peuvikilwe mvili va Yesu.